रुद्रप्रयागः, 10 नवंबरमासः (हि.स.)।

राष्ट्रीयस्वयंसेवकसङ्घस्य स्थापनायाः शतवर्षाणां पूर्त्यवसरे विश्वप्रसिद्धे तुङ्गनाथमहादेवमन्दिरे स्वयंसेवकैः सामूहिकप्रार्थना कृता। तैः हिमालयस्य संरक्षणस्य, विश्वकल्याणस्य, शान्तेः उत्तराखण्डस्य सुखसमृद्ध्योश्च कामना कृता। मन्दिरस्य कपाटानां शीतकालाय पिधानात् पूर्वम् आयोजिते कार्यक्रमे स्वयंसेवकैः भगवान् भोलेनाथस्य श्रीचरणेषु प्रणम्य प्रदेशस्य मङ्गलमयभविष्याय प्रार्थना कृता। अस्मिन् अवसरे तैः मन्दिरे दर्शनार्थम् आगतान् श्रद्धालून् हिमालयस्य प्राकृतिकसम्पदः पर्यावरणसंरक्षणस्य च विषये जागरूकाः कृताः।

स्वयंसेवकैः श्रद्धालुभ्यः धार्मिकयात्राणां समये प्लास्टिकवस्तूनि अन्यानि च अपशिष्टानि इतस्ततः न क्षेप्तुं तथा देवभूमेः स्वच्छतां पवित्रतां च संरक्षितुं आग्रहः कृतः। तैः उक्तं यत् हिमालयः केवलं धार्मिकश्रद्धायाः केन्द्रं नास्ति, अपितु राष्ट्रस्य अमूल्या प्राकृतिकसम्पद् अपि अस्ति। अस्य स्वच्छतां, हरितिमां प्राकृतिकसन्तुलनं च संरक्षितुं सर्वेषां सामूहिकं दायित्वम् अस्ति। धार्मिकश्रद्धया सह प्रकृतेः प्रति स्वदायित्वस्य निर्वहणम् अपि प्रत्येकस्य व्यक्तेः कर्तव्यम् अस्ति।

श्रद्धालुभिः स्वयंसेवकानाम् अस्याः पहलस्य प्रशंसा कृता तथा पर्यावरणसंरक्षणस्य सन्देशं जनजनं प्रति प्रसारयितुं सङ्कल्पः स्वीकृतः।

---------

Hindusthan Samachar / Dheeraj Maithani