नोएडा, 12 नवंबरमासः (हि.स.)। मुख्यमन्त्री योगी आदित्यनाथः सीएनएच-संस्थाः आधारशिलाम् अस्थापयत्, अवदत् च उत्तरप्रदेशे देशविदेशीयाः कम्पन्यः निवेशं कुर्वन्ति।

मुख्यमन्त्री योगी आदित्यनाथः अद्य यमुनानगरे सेक्टर्-८ इत्यत्र १०० एकर्-परिमितायां भूमौ १२२० कोटिरूप्यकाणां व्ययेन निर्मीयमाणायाः सीएनएच-कम्पन्याः आधारशिलाम् लखनऊनगरात् अन्तर्जालमाध्यमेन अस्थापयत्। अस्मिन् अवसरे जेवरनगरे आयोजिते कार्यक्रमे गौतमबुद्धनगरस्य सांसदः डॉ. महेशशर्मा, राज्यसभायाः सदस्यः सुरेन्द्रनागरः, दादरीक्षेत्रस्य विधायकः तेजपालनागरः, जेवरक्षेत्रस्य विधायकः धीरेन्द्रसिंहः, क्षेत्रीयाध्यक्षः नवाबसिंहनागरः, विधानपरिषदः सदस्यः श्रीचन्दशर्मा, सीएनएच इण्डस्ट्रियल् एनवी इत्यस्य मुख्यकार्यकारी अधिकारी गेरिट् मार्क्स, सीएनएच इण्डिया रीजन् इत्यस्य अध्यक्षः प्रबन्धनिदेशकश्च नरेन्द्रमित्तलः, कम्पन्याः वरिष्ठाधिकारिणः, निदेशकाः अन्ये च अधिकारिणः उपस्थिताः आसन्।

यमुना औद्योगिकविकासप्राधिकरणेन सीएनएच-कम्पन्यै सेक्टर्-८ इत्यत्र १०० एकर्-परिमिता भूमिः आवण्टिता अस्ति। अत्र कम्पनी ट्रैक्टरयानानि अन्यानि च कृषियन्त्राणि निर्मास्यति। गुरुवासरे प्रातः दशवादने मुख्यमन्त्री अस्याः कम्पन्याः आधारशिलाम् आभासीयमाध्यमेन अस्थापयत्।

अस्मिन् अवसरे मुख्यमन्त्री अवदत् यत् उत्तरप्रदेशे विश्वासं प्रकटितवते सीएनएच-कम्पन्याः प्रबन्धनाय अहं हृदयपूर्वकं कृतज्ञतां ज्ञापयामि। मम विश्वासः अस्ति यत् अयं परियोजनाप्रकल्पः प्रदेशस्य कृषिक्षेत्रे, विकासे, आधुनिकनिर्माणोद्योगे च नवीनां गतिं प्रदास्यति। अनेन परियोजनाप्रकल्पेन स्थानीययुवभ्यः रोजगारस्य व्यापारस्य च अवसराः प्राप्स्यन्ति।

सः अवदत् यत् यस्य प्रदेशस्य नाम्नि एव उत्तरशब्दः विद्यते, तस्य पुरतः २०१७ तः पूर्वम् अनेकाः प्रश्नाः आसन्। पलायनस्य, उपेक्षायाः, पिछडेपनस्य, परिचयस्य, अराजकतायाश्च प्रश्नाः आसन्। प्रधानमन्त्री नरेन्द्रमोदिनः मार्गदर्शने उत्तरप्रदेशः अद्य उपद्रवप्रदेशात् उत्सवप्रदेशत्वं प्राप्तवान् अस्ति। प्रदेशे माफियाशासनस्य स्थाने विधिशासनं स्थापितम् अस्ति। उत्तमायाः विधिव्यवस्थायाः कारणेन उत्तरप्रदेशे निवेशः वर्धितः। प्रदेशः विकासक्षेत्रे तीव्रगत्या अग्रे सरति।

उत्तमविधिव्यवस्थायाः उद्योगक्षेत्रे च प्रदीयमानानां उत्कृष्टसुविधानां कारणेन देशविदेशेभ्यः कम्पन्यः अत्र निवेशं कर्तुं पङ्क्तिबद्धाः सन्ति। अद्य उत्तरप्रदेशः देशस्य प्रमुखनिवेशकेन्द्ररूपेण नवीनां परिचितिम् अर्जितवान् अस्ति।

सः अवदत् यत् उत्तरप्रदेशे विधिव्यवस्थायाः स्थापनायाः पृष्ठे केवलं आरक्षिभर्ती एव कारणं नास्ति, अपितु आरक्षिबलस्य आधुनिकीकरणेन सह अपराधस्य अपराधिनां च प्रति सर्वकारस्य कठोरदृष्टिकोणः अपि प्रमुखं कारणम् अस्ति।

अस्मिन् अवसरे सः विनोदपूर्वकम् अवदत् यत् भवन्तः उत्तरप्रदेशस्य बुलडोजरस्य विषये अवश्यं श्रुतवन्तः स्युः। अतः अहं कम्पन्याः प्रबन्धनम् अस्मिन् विषये वदामि यत् भवन्तः उत्तरप्रदेशे बुलडोजरयानानां ट्रैक्टरयानानां च निर्माणार्थम् आगतवन्तः सन्ति, अतः देशे विदेशे च एतेषां यन्त्राणां मागः स्वतः एव भविष्यति। बुलडोजरयानम् अत्रत्यं विशिष्टं परिचायकचिह्नम् अभवत्।

सः अवदत् यत् उत्तरप्रदेशसर्वकारेण निवेशानुकूलं वातावरणं निर्मितम् अस्ति। उद्योगक्षेत्रस्य विकासाय प्रदेशे अनेके नीतिनियमाः प्रवर्तिताः सन्ति। विशालः औद्योगिकभूमिसङ्ग्रहः आधारभूतसुविधां प्रददाति। निवेशक्षेत्रे प्रदेशः अग्रणीस्थाने अस्ति। एक्स्प्रेस्-मार्गाः, विमानपत्तनानि, समर्पितमालवाहकमार्गाश्च प्रदेशस्य सम्पर्कव्यवस्थायै नवीनां शक्तिं प्रदत्तवन्तः।

सः अवदत् यत् टाटा, सैमसङ्ग, माइक्रोसॉफ्ट्, आईबीएम्, इन्फोसिस्, एचसीएल्, हिन्दुजा-समूहः इत्यादिभिः संस्थाभिः सह संयुक्तरूपेण उत्तरप्रदेशे औद्योगिकविकासः क्रियमाणः अस्ति। सूचनाप्रौद्योगिकी, इलेक्ट्रॉनिक्स्, कृत्रिमबुद्धिमत्ता, अर्धचालकाः, नवोद्यमाः, आँकडाकेन्द्राणि, साइबर्-प्रौद्योगिकी, रोबोटिक्स्, विद्युत्वाहनानि, पर्यटनम्, आतिथ्यसेवा, क्रीडाक्षेत्रम् इत्यादिषु क्षेत्रेषु उत्तरप्रदेशः अद्य तीव्रगत्या प्रगतिम् अनुभवति। निवेशस्य, नवाचारस्य, रोजगारस्य च नूतनान् अवसरान् अन्विष्यति।

योगी आदित्यनाथः अवदत् यत् यमुना एक्स्प्रेस्-मार्ग औद्योगिकविकासप्राधिकरणम् उत्तरप्रदेशस्य औद्योगिकस्य आर्थिकस्य च विकासे महत्त्वपूर्णं योगदानं ददाति। अस्य विकासः पञ्चविंशतिसहस्रहेक्टेयर्-परिमितायां भूमौ क्रियमाणः अस्ति। नरेन्द्रमोदी-अन्ताराष्ट्रियम् विमानपत्तनस्य, नोएडा-जेवरस्य च विकासेन सह सम्पूर्णमिदं क्षेत्रं विशालम् औद्योगिकम् आर्थिकं च केन्द्रं तथा रसदव्यवस्थायाः प्रमुखकेन्द्रं रूपेण विकसितं क्रियमाणम् अस्ति।

विमानपत्तनम्, द्रुतमार्गाः, औद्योगिकभूमिः, आधुनिकसम्पर्कव्यवस्था च अस्य क्षेत्रस्य निवेशस्य नवीनं केन्द्रं निर्मितवन्तः। सः अवदत् यत् अद्य अत्र अर्धचालकनिर्माणसंयन्त्रम्, इलेक्ट्रॉनिक्स्-निर्माणसमूहः, परिधानोद्यानम्, चिकित्सोपकरणोद्यानम्, क्रीडनोद्यानम्, सूक्ष्मलघुमध्यमोद्योगोद्यानम्, हस्तशिल्पोद्यानम्, आँकडाकेन्द्रोद्यानम् इत्यादयः महत्त्वपूर्णाः परियोजनाः विकसिताः भवन्ति। एतेषां सर्वेषां विकासकार्याणां पृष्ठे जेवरक्षेत्रस्य अन्नदातृकृषकाणां सकारात्मकं योगदानम् अस्ति।

सः सर्वेभ्यः अन्नदातृकृषकेभ्यः हृदयपूर्वकं कृतज्ञतां ज्ञापितवान् तथा तेषाम् अभिनन्दनम् अकरोत्। सः अवदत् यत् यस्मिन् क्षेत्रे कदाचित् गोलिकाप्रहाराः भवन्ति स्म, यत् क्षेत्रं देशे अपराधस्य दृष्ट्या सर्वाधिकं कुख्यातम् आसीत्, तत् अद्य उत्तमजनप्रतिनिधीनां निर्वाचनेन, जनतया सह तेषां सुमधुरसम्बन्धैः, समन्वयेन च, तेषां प्रयासैः च भारतस्य वास्तविकं रत्नं (जेवरम्) इव प्रतिष्ठितं भवति।

अस्य कृते अहं तत्रत्यस्य विधायकस्य, सांसदस्य, अन्नदातृकृषकाणां च हृदयतः अभिनन्दनं करोमि। सः कृषकाणां मुक्तकण्ठेन प्रशंसाम् अकरोत्। तेषामेव सकारात्मकप्रयासानां कारणेन जेवरक्षेत्रे विकासकार्याणि प्रगतिपथे अग्रसराणि सन्ति।

---------------

Hindusthan Samachar / Dheeraj Maithani