जयपुरम्, १२ नवम्बरमासः (हि.स.)। राजस्थानस्य पूर्वमुख्यमन्त्री अशोक-गहलोतः पचपद्रास्थायाः रिफाइनरी इत्यस्य पेट्रोक्षेत्रे च पेट्रोरसाय-नाधारितानाम् उद्योगानां स्थापनां प्रति भाजपासर्वकारस्य आलोचनां कृतवान्। गहलोतः अवदत् यत् रिफाइनरीस्य स्थापना राजस्थानस्य कृते महत्त्वपूर्णः अवसरः आसीत्, किन्तु भाजपासर्वकारः अस्य अवसरस्य लाभं ग्रहीतुं विफलः अभवत्।

तेन आरोपितं यत् रिफाइनरीस्य स्थापनायाः अनन्तरमपि अद्यावधि पेट्रोक्षेत्रे पेट्रोरसायनाधारितानाम् उद्योगानाम् आरम्भः न अभवत्। गहलोतः गुरुवासरे सामाजिकमाध्यमे ‘एक्स’ इत्यत्र सन्देशं प्रेष्य अवदत् यत् काङ्ग्रेससर्वकारेण स्वकीयस्य दूरदर्शितापूर्णस्य योजनायाः तत्कालीनस्य यूपीए-सर्वकारस्य सहयोगेन च पचपद्रायां रिफाइनरी-स्थापनस्य निर्णयः कृतः आसीत्। अस्याः योजनायाः अन्तर्गतं पेट्रोक्षेत्राय भूमिः अपि आवण्टिता आसीत्। तस्य कथनानुसारं काङ्ग्रेससर्वकारस्य कार्यकाले रिफाइनरी इत्यस्य कार्यं प्रायः पूर्णम् अभवत् तथा च भाजपासर्वकारेण केवलम् एतादृशं औद्योगिकवातावरणं निर्मातव्यम् आसीत्, येन पेट्रोरसायनाधारितानां नूतनानाम् उद्योगानां स्थापना भवेत्।

पूर्वमुख्यमन्त्री अवदत् यत् एतेन प्रदेशस्य युवभ्यः प्रत्यक्षाप्रत्यक्षरूपेण च रोजगारस्य महान्तः अवसराः उत्पद्येरन्, किन्तु भाजपासर्वकारस्य विगतेषु त्रिषु वर्षेषु अस्मिन् दिशि अपेक्षिता गम्भीरता तत्परता च न प्रदर्शिता। गहलोतेन उक्तं यत् राजस्थानस्य भूमौ रिफाइनरीस्य निर्माणे सत्यपि तस्य कच्चं मालं प्रसंस्करणाय अन्यराज्येषु प्रेषयिष्यते। एतेन अन्यराज्येभ्यः उद्योगस्य रोजगारस्य च लाभः प्राप्तुं शक्यते इति आशङ्कां प्रकटयन् सः भाजपासर्वकारं पृष्टवान् यत् राजस्थानस्य भाग्ये प्राप्तव्यः रोजगारः अन्ततः कस्य खाते गच्छति?

सः अवदत् यत् रिफाइनरी इत्यस्य पेट्रोक्षेत्रस्य च सम्पूर्णः लाभः राजस्थानाय प्राप्येत, एतदर्थं पेट्रोरसायनाधारितानाम् उद्योगानां स्थापना निवेशानुकूलस्य वातावरणस्य निर्माणं च सर्वकारस्य प्राथमिकता भवितव्या।

Hindusthan Samachar / Divya Ranjan