* आङ्ग्लानां नीतिविरुद्धं जनजातीयसमाजं सङ्घट्य महतः आन्दोलनस्य नेतृत्वं कृतवान्

* नवम्बरमासस्य १८ दिनाङ्कपर्यन्तं प्रदेशस्य सर्वेषु भागेषु जनजातीयगौरवदिवसस्य कार्यक्रमाः आयोजयिष्यन्ते

देहरादूनम्, 15नवम्बरमासः (हि.स.)। भारतीयजनतापक्षस्य राष्ट्रियमहासचिवः उत्तराखण्डप्रदेशप्रभारी च राममाधवः अवदत् यत् भगवान् बिरसा मुण्डा इत्यस्य सङ्घर्षः, नेतृत्वं बलिदानञ्च भारतीयस्वातन्त्र्यसङ्ग्रामस्य इतिहासस्य गौरवपूर्णम् अध्यायम् अस्ति। एतत् नवपीढ्याः यावत् प्रापयितुम् आवश्यकम् अस्ति। आङ्ग्लशासनस्य दमनकारीनीतीनां विरुद्धं जनजातीयसमाजं जागरूकं सङ्घटितञ्च कृत्वा तेन यत् आन्दोलनं नेतृत्वं कृतम्, तेन स्वातन्त्र्यसङ्घर्षाय नूतना ऊर्जा प्रदत्ता। बिरसा मुण्डा केवलं जनजातीयसमाजस्य नायकः न, अपितु सम्पूर्णभारतीयसमाजस्य गौरवस्य प्रेरणायाश्च प्रतीकः अस्ति।

राममाधवः रविवासरे भारतीयजनतापक्षस्य प्रदेशमुख्यालये भगवान् बिरसा मुण्डा इत्यस्य १५१ तमस्य जन्मजयन्त्यवसरे आयोजिते श्रद्धाञ्जलिकार्यक्रमे एतत् उक्तवान्। अस्मात् पूर्वं भाजपा मुख्यालये आयोजिते कार्यक्रमे राष्ट्रियसङ्गठनमहासचिवः बीएल सन्तोषः, राष्ट्रिय उपाध्यक्षः प्रदेशप्रभारी च राममाधवः, प्रदेशसहप्रभारी अरविन्दमेननः, सहप्रभारी बाँसुरीस्वराजः, प्रदेशाध्यक्षः महेन्द्रभट्टः, प्रदेशसङ्गठनमहामन्त्री फणीन्द्रनाथशर्मा च भगवान् बिरसा मुण्डा इत्यस्य चित्रे पुष्पाञ्जलिं समर्प्य श्रद्धाञ्जलिं दत्तवन्तः।

सः अवदत् यत् नवम्बरमासस्य १५ दिनाङ्कः देशस्य जनजातीयसमाजस्य इतिहासे विशेषमहत्त्वं धारयति। झारखण्डभूम्या सम्बद्धः बिरसा मुण्डा आङ्ग्लानां जनजातिविरोधिनीनीतीनां शोषणस्य च विरुद्धं समाजं सङ्घटितवान्। सः जनेषु जागरूकतां जनयित्वा महद् आन्दोलनम् आरब्धवान् तथा च देशस्य स्वातन्त्र्यार्थं स्वसर्वस्वं समर्पितवान्।

प्रदेशप्रभारी अवदत् यत् प्रधानमन्त्री नरेन्द्रमोदी २०२१ तमे वर्षे बिरसा मुण्डा इत्यस्य जन्मजयन्ती जनजातीयगौरवदिवसरूपेण आयोजयितुं प्रयत्नम् अकरोत्। अस्य उद्देश्यम् अस्ति स्वातन्त्र्यसङ्ग्रामे जनजातीयसमाजस्य योगदानस्य राष्ट्रस्तरे समुचितां मान्यतां प्रदातुं तस्य गौरवपूर्णेन इतिहासेन च देशं परिचितं कारयितुम्। सः अवदत् यत् भारतस्य स्वातन्त्र्यान्दोलने जनजातीयसमाजस्य भूमिका अत्यन्तं महत्त्वपूर्णा आसीत्। उत्तराखण्डेऽपि विविधजनजातीयसमुदायानां समृद्धाः परम्पराः ऐतिहासिकं योगदानञ्च विद्यते। भाजपा अस्याः धरोहरायाः सम्मानं कर्तुं जनसामान्यं यावत् च प्रापयितुं प्रदेशव्यापिनः कार्यक्रमान् आयोजयिष्यति। जनजातिबहुलक्षेत्रेषु पार्टीजनपदकार्यालयेषु च कार्यक्रमाः भविष्यन्ति।

अस्मिन् अवसरे प्रदेशाध्यक्षः राज्यसभासदस्यश्च महेन्द्रभट्टः अवदत् यत् देशस्य स्वातन्त्र्यान्दोलनं कस्यचित् एकस्य वर्गस्य, दलस्य अथवा सङ्गठनस्य सीमायां बद्ध्वा न द्रष्टव्यम्। एतत् समाजस्य सर्वेषां वर्गाणां सङ्घर्षस्य बलिदानस्य च परिणामः आसीत्। जनजातीयसमाजेनापि आङ्ग्लशासनस्य विरुद्धे सङ्घर्षे महत्त्वपूर्णा भूमिका निर्व्यूढा, किन्तु तस्य योगदानं व्यापकस्तरे प्रकाशयितुम् आवश्यकता अस्ति।

महेन्द्रभट्टः अवदत् यत् प्रधानमन्त्री नरेन्द्रमोदिनः नेतृत्वे जनजातीयसमाजस्य सम्मानाय उन्नतये च विशेषमहत्त्वं दीयते। बिरसा मुण्डा इत्यस्य जन्मजयन्त्यवसरे नवम्बरमासस्य १८ दिनाङ्कपर्यन्तं प्रदेशस्य जनजातीयक्षेत्रेषु विविधाः कार्यक्रमाः आयोजयिष्यन्ते। एतेषां कार्यक्रमाणां माध्यमेन तस्य सङ्घर्षस्य, बलिदानस्य सामाजिकजागरणसन्देशस्य च जनसामान्यं यावत् प्रचारः करिष्यते, येन नवसंततिः स्वस्य इतिहासेन स्वातन्त्र्यसङ्ग्रामस्य नायकानां योगदानेन च परिचिता भवेत्।

कार्यक्रमे मन्त्रिमण्डलमन्त्री खजानदासः, देहरादूनकैन्टक्षेत्रस्य विधायकः सविताकपूरः, प्रदेशमहामन्त्री कुन्दनपरिहारः, तरुणबंसलः, दीप्तिरावतः, दायित्वधारी ज्योतिप्रसादगैरोला, प्रदेशकार्यालयसचिवः जगमोहनरावतः, प्रदेशमीडियाप्रभारी मनवीरसिंहचौहानः इत्यादयः अनेके दलपदाधिकारिणः वरिष्ठकार्यकर्तारश्च उपस्थिताः आसन्।

Hindusthan Samachar / Dheeraj Maithani