गान्धीनगरम्, नवम्बरमासस्य ०२ दिनाङ्कः (हि.स.)। मुख्यमन्त्रिणा भूपेन्द्रपटेलेन राज्यस्य प्राथमिकशिक्षाविभागे नव नियुक्ताः विद्याध्यापकाः अमृतकालस्य प्रहरिणः इति कथिताः। तेषां स्कन्धेषु विकसितभारतस्य सङ्कल्पं साकारं कर्तुं महत्त्वपूर्णं दायित्वं वर्तते। तेन उक्तं यत् राज्यसेवायां सम्मिलिताः शिक्षकाः विद्यार्थिनां सुदृढं शैक्षणिकं नैतिकं च निर्माणं कुर्युः, येन ते विकसितभारतस्य निर्माणे स्वकीयम् पूर्णं योगदानं दातुं शक्नुयुः।

अडालजस्थे त्रिमन्दिरे प्राथमिकशिक्षाविभागस्य अन्तर्गतं चयनितानां नवनियुक्तानां विद्याध्यापकानाम् अभिनन्दनस्य नियुक्त्यनुशंसापत्रवितरणस्य च समारोहः आयोजितः। अस्मिन् अवसरे मुख्यमन्त्रिणा ८,१६९ नवनियुक्तेभ्यः विद्याध्यापकेभ्यः अनुशंसापत्राणि प्रदत्तानि। कार्यक्रमे मन्त्रिमण्डलस्य शिक्षामन्त्री डॉ. प्रद्युम्नवाजा तथा शिक्षाराज्यमन्त्री रिवाबा जडेजा अपि उपस्थिते आस्ताम्।

मुख्यमन्त्रिणा उक्तं यत् अष्टसहस्राधिकानां विद्याध्यापकानां नियुक्तिप्रक्रियायां षट्सहस्राधिकानां महिलाभ्यर्थिनीनां चयनं शिक्षाक्षेत्रे नारीशक्तेः वर्धमानसहभागितायाः प्रमाणम् अस्ति। प्रधानमन्त्रिणा नरेन्द्रमोदिना गुजरातराज्ये प्रारब्धः कन्याकेळवणीमहोत्सवस्य शालाप्रवेशोत्सवस्य च अभियानम् अधुना विशालवटवृक्षरूपं प्राप्तम् अस्ति तथा च तस्य सकारात्मकाः परिणामाः दृश्यन्ते।

तेन उक्तं यत् नियुक्तिप्रक्रिया पूर्णतया पारदर्शितया सम्पन्ना। अभ्यर्थिभ्यः स्वस्य परिश्रमस्य योग्यतायाः च आधारेण एव नियुक्तिः प्राप्ता। अस्याः उपलब्धेः कारणेन अभिभावकेषु परिवारजनेषु च हर्षस्य गौरवस्य च वातावरणं वर्तते। मुख्यमन्त्रिणा एतदपि सूचितं यत् शिक्षाविभागः अग्रिमकाले प्रायः दशसहस्राणाम् अन्येषां शिक्षकाणां नियुक्तेः योजनां करोति।

शिक्षकपदं समाजे सर्वाधिकसम्मानितम्

शिक्षकस्य महत्त्वे बलं प्रयच्छन् मुख्यमन्त्रिणा उक्तं यत् समाजे शिक्षकस्य स्थानम् अत्यन्तं सम्माननीयम् अस्ति। कश्चित् जनः कियत् अपि महान् चिकित्सकः, अभियन्ता अथवा वैज्ञानिकः भवतु, सः स्वशिक्षकस्य पुरतः सदैव नतमस्तकः भवति। सन्तज्ञानेश्वरस्य उदाहरणं दत्त्वा तेन नवनियुक्तेभ्यः शिक्षकेभ्यः अङ्कीयमाध्यमानां सामाजिकमाध्यमानां च विवेकपूर्णम् उपयोगं कर्तुं परामर्शः प्रदत्तः। तेन उक्तं यत् शिक्षकस्य व्यवहारः आचरणं च बालकानां मनसि गहनं प्रभावं जनयति।

बालकान् कण्ठस्थीकरणस्य स्थाने अवबोधाधारितया शिक्षया पाठयन्तु

मन्त्रिमण्डलस्य शिक्षामन्त्रिणा डॉ. प्रद्युम्नवाजेन उक्तं यत् मुख्यमन्त्रिणः भूपेन्द्रपटेलस्य नेतृत्वे गुजरातसर्वकारेण प्राथमिकशिक्षायाः आधारं सुदृढं कर्तुम् प्रायः द्वादशसहस्राणां विद्याध्यापकानां ऐतिहासिकी नियुक्तिप्रक्रिया सम्पन्ना। अस्यां प्रक्रियायां प्रथमकक्षातः पञ्चमकक्षापर्यन्तं गुजरातीमाध्यमस्य प्रायः एकादशसहस्राणि तथा अन्येषां माध्यमानां प्रायः ९८७ रिक्तपदानि समाविष्टानि सन्ति। तेन उक्तं यत् सम्पूर्णा चयनप्रक्रिया योग्यतायाः प्रौद्योगिक्याः च आधारेण निर्मितया पारदर्शिव्यवस्थया सम्पन्ना।

राष्ट्रियशिक्षानीतेः उल्लेखं कुर्वन् तेन उक्तं यत् बालकेषु आधारभूतसाक्षरता, सङ्ख्यात्मकज्ञानम्, कौशलविकासः, अनुभवानाम् आधारेण शिक्षणं च प्रोत्साहयितुं आवश्यकम् अस्ति। बालकान् कण्ठस्थीकरणस्य स्थाने अवबोधस्य आधारेण पाठयितव्यम्। तेन शिक्षकान् कथानां, क्रियाकलापानाम्, प्रयोगाणां, प्रौद्योगिक्याः च माध्यमेन कक्षाः अधिकाः रोचकाः सजीवाश्च कर्तुम् आह्वानं कृतम्।

शिक्षाराज्यमन्त्रिणी रिवाबा जडेजा इत्यनया उक्तं यत् शिक्षकाः केवलं पाठयितारः न भवन्ति, अपितु भविष्यस्य निर्मातारः अपि भवन्ति। राष्ट्रस्य भविष्यं कक्षासु एव निर्मीयते। शिक्षायाः उद्देश्यम् केवलम् अक्षरज्ञानं प्रदातुं न, अपितु बालकेषु उत्तमसंस्काराणां, मूल्यानां, कौशलानां, चरित्रस्य च निर्माणम् अपि अस्ति। तया नवनियुक्तेभ्यः शिक्षकेभ्यः आह्वानं कृतं यत् ते बालकेषु ज्ञानस्य संस्काराणां च विकासं कृत्वा राज्यस्य देशस्य च गौरवं वर्धयेयुः।

Hindusthan Samachar / Divya Ranjan