नव दिल्ली, 02 नवंबरमासः (हि.स.)।

धार्मिकग्रन्थेषु वर्णितानां जीवनमूल्यानाम् अनुरूपम् आचरणं कुर्वन्तः जनाः सन्तोषस्य प्रसन्नतायाश्च अनुभवं कुर्वन्ति। संसारस्य सर्वे प्राणिनः द्वेषं शत्रुतां च परित्यज्य परस्परं मैत्रीभावं विकसितं कुर्वन्तु। इति विचारं देशस्य पूर्वमुख्यन्यायाधीशः डी.वाई. चन्द्रचूडः अत्र इन्दिरागान्धी इन्डोर्-स्टेडियम् इत्यत्र अखिलविश्वगायत्रीपरिवारेण आयोजिते मातृभगवतीदेवीशर्मणः जन्मशताब्दीमहोत्सवस्य अखण्डदीपशताब्दीमहोत्सवस्य च समापनसमारोहे व्यक्तवान्।

त्रिदिवसीयमहोत्सवस्य समापनं ज्ञानयज्ञस्य मशालशोभायात्रया विश्वकल्याणस्य महत्सङ्कल्पेन च अभवत्। समारोहे विचारक्रान्तेः, मानवीयैकतायाः, सामाजिकसद्भावस्य तथा नवयुगनिर्माणस्य सन्देशः प्रदत्तः। अस्मिन्नवसरे वक्तारः अवदन् यत् जन्मशताब्दीमहोत्सवस्य समापनं युगनिर्माणयात्रायाः समाप्तिः न, अपितु गुरुदेवमातृदेव्याः सङ्कल्पान् नवीनया ऊर्जया अग्रे नेतुम् अवसरः अस्ति।

न्यायमूर्तिना चन्द्रचूडेन सन्तज्ञानेश्वरविरचितस्य ‘पसायदान’ इत्यस्य पद्यानाम् उल्लेखं कुर्वता मानवीयमूल्यानां महत्त्वं प्रतिपादितम्। तेन दुर्वृत्तीनाम् अन्तः, सत्कर्मसु अनुरागः तथा सर्वेषां प्राणिनां मध्ये मैत्रीभावविकासस्य सन्देशः व्याख्यातः।

न्यायमूर्तिः चन्द्रचूडः अवदत् यत् धार्मिकग्रन्थेषु वर्णितानां जीवनमूल्यानाम् अनुरूपम् आचरणेन मानवजीवनं सन्तोषेण प्रसन्नतया च परिपूर्णं भवति। सदाचारः, परस्परप्रेम तथा मानवीयसंवेदनानां जीवनव्यवहारे समावेशः आवश्यकः अस्ति। संसारस्य सर्वे प्राणिनः परस्परं द्वेषस्य शत्रुतायाश्च भावनां परित्यज्य मैत्रीपूर्णम् आचरणं कुर्वन्तु।

केन्द्रीयवाणिज्योद्योगमन्त्री पीयूषगोयलः अवदत् यत् मातृभगवतीदेवीशर्मणः सम्पूर्णं जीवनं सेवायाः, समर्पणस्य, सरलतायाः समन्वयस्य च अनुपमम् उदाहरणम् अस्ति। गायत्रीपरिवारः मानवीयमूल्यानां, आध्यात्मिकचेतनायाः तथा समाजकल्याणस्य आदर्शैः सम्बद्धः विशालः परिवारः अस्ति। गुरुदेवमातृदेव्याः तपसा, त्यागेन लोकमङ्गलसङ्कल्पैश्च अयं परिवारः व्यापकस्य सामाजिकचेतनायाः स्वरूपं प्राप्तवान्। मातुः जीवनादर्शाः अद्यापि सेवया, सद्भावेन सामूहिकसहकारितया च समाजे सकारात्मकपरिवर्तनस्य प्रेरणां ददति।

विदाईसत्रे ‘ज्योतिः कदापि न निर्वाप्यते’ इति विषये समारोहस्य दलनायकः देवसंस्कृतिविश्वविद्यालयस्य उपाध्यक्षः च डॉ. चिन्मयपण्ड्या वर्षम् २०२६ गायत्रीपरिवाराय ‘सौभाग्यस्य प्रयागः’ इति उक्तवान्। तेन कथितं यत् एतद्वर्षं ऐतिहासिकोपलब्धीनां, आध्यात्मिकसाधनायाः तथा गुरुदेवमातृदेव्याः सङ्कल्पानां सङ्गमस्य पावनम् अवसरः अस्ति।

डॉ. पण्ड्येन उक्तं यत् ‘गायत्रीपरिवारः गुरुदेवस्य लुप्तप्राप्तिविभागः अस्ति।’ गुरुदेवस्य विचारैः आदर्शैश्च दूरे गच्छन्तीं मानवीयचेतनां पुनः संयोजयितुं तथा तस्य सङ्कल्पान् समाजे प्रतिष्ठापयितुं प्रत्येकस्य गायत्रीपरिजनस्य दायित्वम् अस्ति।

समापनावसरे आयोजिता ज्ञानयज्ञस्य मशालशोभायात्रा विश्वशान्तेः, मानवीयैकतायाः, सामाजिकसद्भावस्य तथा सकारात्मकचिन्तनस्य सन्देशम् अददात्। मशालया गुरुदेवमातृदेव्याः विचारान् जनसामान्यं प्रति प्रसारयितुं तथा व्यक्तिनिर्माणस्य, परिवारनिर्माणस्य, राष्ट्रनिर्माणस्य च सङ्कल्पान् व्यापकजनान्दोलनस्य स्वरूपं दातुम् आह्वानं कृतम्।

त्रिदिवसीयमहोत्सवस्य समापनसमारोहेन अयं सन्देशः प्रदत्तः यत् गुरुदेवमातृदेव्याः युगनिर्माणसङ्कल्पानां यात्रा निरन्तरं प्रवर्तिष्यते। ज्ञानयज्ञस्य मशाल अखण्डप्रेरणायाः, विचारक्रान्तेः तथा विश्वकल्याणाभियानस्य अग्रे प्रसारणस्य प्रतीकम् अभवत्। अस्मिन्नवसरे देहलीप्रदेशसहितं आयोजनस्य सफलतायां महत्त्वपूर्णं योगदानं कृतवन्तः साधकाः सम्मानिताः।

------------

Hindusthan Samachar / Dheeraj Maithani