— उपराष्ट्रपतिना तथा भारतीयलोकप्रशासनसंस्थानस्य अध्यक्षेन सी.पी. राधाकृष्णनेन नवदिल्ली इत्यत्र प्रदत्तः पुरस्कारः, आर. रामनी तथा के. रविन्दरनायकेन स्वीकृतः सम्मानः।

— देशस्य पञ्चविंशतिशाखासु उत्तरप्रदेशीयक्षेत्रीयशाखया सर्वोच्चं स्थानं प्राप्तम्, २०२५-२६ तमवर्षाय प्राप्तः राष्ट्रियसम्मानः।

लखनऊ, नवम्बरमासः ०२ दिनाङ्कः (हि.स.)। भारतीयलोकप्रशासनसंस्थानस्य उत्तरप्रदेशीयक्षेत्रीयशाखा २०२५-२६ वर्षाय देशस्य सर्वश्रेष्ठशाखारूपेण सम्मानिता अस्ति। संस्थानस्य देशे सञ्चालितानां पञ्चविंशतिशाखानां मध्ये उत्कृष्टप्रदर्शनस्य आधारेण उत्तरप्रदेशीयशाखायै अयं प्रतिष्ठितः पुरस्कारः प्रदत्तः।

नवदिल्ली इत्यत्र स्थितस्य भारतीयलोकप्रशासनसंस्थानस्य मुख्यालये आयोजिते कार्यक्रमे भारतस्य उपराष्ट्रपतिना तथा भारतीयलोकप्रशासनसंस्थानस्य अध्यक्षेन सी.पी. राधाकृष्णनेन अयं पुरस्कारः प्रदत्तः। अस्मिन् अवसरे केन्द्रीयमन्त्री डॉ. जितेन्द्रसिंहः तथा भारतीयलोकप्रशासनसंस्थानस्य मुख्यालयस्य महानिदेशकः डॉ. सुरेन्द्रकुमारबागडे अपि उपस्थितौ आस्ताम्। उत्तरप्रदेशीयक्षेत्रीयशाखायाः पक्षतः अध्यक्षः आर. रामनी तथा मानदसचिवः के. रविन्दरनायकः पुरस्कारं स्वीकृतवन्तौ।

अयं सम्मानः उत्तरप्रदेशीयक्षेत्रीयशाखायाः संस्थागतसक्रियतायाः, लोकप्रशासनक्षेत्रे उत्कृष्टकार्याणाम्, प्रशासनिकक्षमतानिर्माणस्य, जनहितसम्बद्धविषयेषु कृतप्रयत्नानां च कृते राष्ट्रियस्तरे प्राप्तः महत्त्वपूर्णः सम्मानः अस्ति। देशस्य पञ्चविंशतिशाखानां मध्ये सर्वश्रेष्ठस्थानं प्राप्तम् इत्यनेन उत्तरप्रदेशीयशाखायाः कार्यकुशलता सामूहिकप्रतिबद्धता च अपि प्रदर्शिता भवति।

उत्तरप्रदेशीयक्षेत्रीयशाखायाः अध्यक्षः आर. रामनी इमाम् उपलब्धिं शाखायाः सर्वेषां सदस्यानां सामूहिकप्रयत्नानां परिणामम् अवदत्।

तेन उक्तं यत् अयं सम्मानः कस्यचित् एकस्य व्यक्तेः उपलब्धिः नास्ति, अपितु संस्थानेन सम्बद्धानां सर्वेषां सम्मानितसदस्यानां, पदाधिकारिणां, कर्मचारिणां, सहयोगिनां च निरन्तरयोगदानस्य फलम् अस्ति। भविष्ये अपि अस्याः उपलब्धेः प्रतिष्ठितस्थानस्य च रक्षणार्थं सर्वान् समानया प्रतिबद्धतया कार्यं निरन्तरं कर्तुम् आह्वानं कृतवान्।

तेन सूचितं यत् भारतसर्वकारेण स्थापितं भारतीयलोकप्रशासनसंस्थानं लोकतान्त्रिकप्रशासनस्य, सुशासनस्य, लोककल्याणस्य, प्रशासनिकसुधारस्य, जनसहभागितायाश्च प्रोत्साहनाय कार्यं करोति।

अस्य उत्तरप्रदेशीयक्षेत्रीयशाखा लखनऊ-नगरे सञ्चाल्यते। शाखया लोकप्रशासनसम्बद्धविषयेषु शैक्षणिकविमर्शस्य, प्रशिक्षणस्य, क्षमतानिर्माणस्य, विविधसंस्थागतक्रियाकलापानां च माध्यमेन योगदानं प्रदीयते।

मुख्यमन्त्रिणः योगी आदित्यनाथस्य नेतृत्वे उत्तरप्रदेशे उत्तरदायिप्रशासनाय, पारदर्शितायै, जनकल्याणकारीयोजनानां प्रभाविप्रवर्तनाय च प्राथमिकता दीयते। उत्तरप्रदेशीयशाखायै प्राप्तः अयं राष्ट्रियसम्मानः प्रदेशे लोकप्रशासनसम्बद्धानां संस्थागतप्रयत्नानां प्रशासनिकोत्कृष्टतायाः दिशि क्रियमाणानां कार्याणां च नूतनं परिचयं प्रददाति।

Hindusthan Samachar / Divya Ranjan