नव दिल्ली, 03 नवंबरमासः (हि.स.)।

केन्द्रीयवाणिज्योद्योगमन्त्री पीयूषगोयलः मङ्गलवासरे स्पष्टं कृतवान् यत् भारतं कयापि मुक्तव्यापारसहमत्या स्वस्य दुग्धोत्पादनक्षेत्रं विदेशीयकम्पनीभ्यः अन्यदेशेभ्यश्च उद्घाटितवान् नास्ति तथा भविष्ये अपि आनुवंशिकरूपेण परिवर्तितानां उत्पादानाम् आयाताय अनुमतिं न प्रदास्यति।

गोयलः नवदेहल्यां किरोड़ीमलमहाविद्यालयस्य विद्यार्थिनः सम्बोधयन् एतत् उक्तवान्। केन्द्रीयमन्त्री उक्तवान् यत् भारतं कस्यामपि संवेदनशीलवस्तुनि कदापि सम्झौतां न कृतवान्। व्यापारसमझौतेषु च सर्वदा कृषकाणां, मत्स्यजीविनां तथा सूक्ष्मलघुमध्यमोद्यमानां (एमएसएमई) हितानां संरक्षणं कृतवान्।

व्यापारसमझौतेभ्यः सम्बद्धस्य प्रश्नस्य उत्तरं ददन् सः उक्तवान्, वयं कतिपयेषु कृष्युत्पादेषु तथा तासु वस्तुषु विपणिविस्तारविषये अत्यन्तं संवेदनशीलाः स्मः, येषु अस्माकं सुदृढा स्थितिः अस्ति, यथा समुद्रीयोत्पादाः। वयं स्वस्य दुग्धोत्पादनक्षेत्रस्य उद्घाटनविषये अत्यन्तं संवेदनशीलाः स्मः। वस्तुतः अद्यावधि वयं कस्यापि कृते दुग्धोत्पादनक्षेत्रं न उद्घाटितवन्तः।

वाणिज्यमन्त्री उक्तवान्, भारते आनुवंशिकरूपेण परिवर्तितानां उत्पादानाम् आगमनस्य विषये वयं अत्यन्तं सतर्काः स्मः। वयं कदापि तेषाम् आयातस्य अनुमतिं न दत्तवन्तः तथा भविष्ये अपि न दास्यामः। वयं धार्मिकसंवेदनशीलतानां विषये अपि विशेषतया सावधानाः स्मः।

सः उक्तवान् यत् विदेशेषु दुग्धोत्पादानां निर्माणसमये प्रायः वत्समांसस्य अथवा रेनेट् इति दुग्धजमनीकरणार्थं प्रयुक्तस्य पदार्थस्य उपयोगः क्रियते। वयं भारते तस्य अनुमतिं न दद्मः। अस्य कृते कठोरं प्रमाणनम् आवश्यकम् अस्ति, येन भारतस्य बहुसंख्यकजनानां धार्मिकभावनाः आहताः न भवेयुः।

मन्त्री उक्तवान् यत् अस्माकं प्रयासः नूतनानां रोजगारावसराणां सृजनम्, तेषां उत्पादानां कृते नवीनविपणीनां विकासश्च अस्ति, येषु वयं प्रतिस्पर्धां कर्तुं समर्थाः स्मः तथा येभ्यः भारतस्य विशालजनसमुदायस्य, सूक्ष्मलघुमध्यमोद्यमानां, कृषिक्षेत्रस्य कृषकाणां च सर्वेषां व्यापकः लाभः भवितुम् अर्हति।

देशस्य निर्यातविषये विद्यार्थिनः सूचयन् मन्त्री उक्तवान् यत् भारतस्य लक्ष्यं २०२६-२७ वित्तीयवर्षे एकलक्षकोटिः अमेरिकी-डॉलर्-मूल्यानां वस्तूनां सेवाणां च निर्यातं कर्तुम् अस्ति। अप्रैलमासात् सितम्बरमासपर्यन्तं २०२६ अवधौ भारतस्य निर्यातः प्रायः ४८० अब्ज-अमेरिकी-डॉलर्-परिमाणं प्राप्तवान्, यः गतवर्षस्य तुलनायां प्रायः चतुर्दशप्रतिशतं अधिकः अस्ति।

सः उक्तवान् यत् लक्ष्यप्राप्तये अवशिष्टेषु षट्सु मासेषु अस्माभिः ५२० अब्ज-अमेरिकी-डॉलर्-मूल्यानां निर्यातः करणीयः। अक्टोबरमासे अस्माकं निर्यातस्य आँकडाः अत्यन्तं उत्तमाः आसन्। अक्टोबरमासस्य व्यापारसम्बद्धानि आँकडानि नवम्बरमासस्य मध्यभागे आधिकारिकरूपेण प्रकाशितानि भविष्यन्ति।

चीनदेशेन सुरङ्गनिर्माणार्थं प्रयुक्तानां खननयन्त्राणां निर्यातोपरि नियन्त्रणं स्थापयितुं विषये पृष्टः सः उक्तवान् यत् यदि एतेषां यन्त्राणां आपूर्तिः प्रभाविता भवति, तर्हि भारतं स्वयमेव तेषां निर्माणस्य दिशि कार्यं करिष्यति। दुर्लभखनिजतत्त्वानां प्राप्तेः मार्गे अवरोधः उत्पन्नः सति अपि देशेन कस्यापि पुरतः सहायतायै हस्तः न प्रसारितः।

गोयलः उक्तवान् यत् देशे विमानानां उपलब्धतां वर्धयितुं भारतं एम्ब्रेर्, एयरबस् तथा बोइङ्ग् इत्येताभिः विमाननिर्मातृकम्पनीभिः सह कार्यं कुर्वन् अस्ति। एतेन पर्यटनक्षेत्रस्य अपि प्रोत्साहनं भविष्यति।

केन्द्रीयमन्त्री सामाजिकमाध्यममञ्चे एक्स इत्यत्र प्रकाशिते सन्देशे उक्तवान्, भारतस्य प्रगतियात्रायां यद्यपि कापि बाधा आगच्छति, तथापि वयं सर्वाणि बन्धनानि भेत्तुं शक्नुमः। अद्य अमिताभबच्चनस्य महाविद्यालये विद्यार्थिभिः सह भारतस्य विकासयात्रायाः विषये चर्चां कृतवान्।

---------------

Hindusthan Samachar / Dheeraj Maithani