Enter your Email Address to subscribe to our newsletters
रायपुरम्, ०३ नवम्बरमासः (हि.स.)। केन्द्रीय-गृह-तथा-सहकारिता-मन्त्री अमितशाहः मङ्गलवासरे छत्तीसगढ-राज्योत्सवस्य समापन-समारोहे भागं ग्रहीतुम् एकदिवसीय-प्रवासे रायपुरं प्राप्तवान्। केन्द्रीय-गृह-मन्त्रिणा अत्र देवेन्द्रनगरे त्रिशत-शय्या-युतस्य ‘आर्टेमिस् शान्ति-चिकित्सालयस्य’ उद्घाटनं कृतम्।
अस्मात् पूर्वं केन्द्रीय-गृह-मन्त्रिणः शाहस्य रायपुर-प्राप्तौ स्वामी-विवेकानन्द-विमानपत्तने मुख्यमन्त्री विष्णुदेवसायः सहिताः प्रदेशसर्वकारस्य मन्त्रिणः तस्य आत्मीयं स्वागतम् अकुर्वन्। मुख्यमन्त्रिणा प्रदेशवासिनां पक्षतः केन्द्रीय-गृह-मन्त्रिणः अभिनन्दनं विहितम्।
विमानपत्तने स्वागतात् परं केन्द्रीय-गृह-मन्त्री देवेन्द्रनगरं प्राप्तवान्, यत्र सः ३०० शय्या-युतस्य ‘आर्टेमिस् शान्ति-चिकित्सालयस्य’ उद्घाटनम् अकरोत्। अस्मिन् काले महत्यां सङ्ख्यायाम् उपस्थितानां जनानाम् अभिवादनं स्वीकर्तुं सः सुरक्षा-वलयं दूरीकृत्य जनानाम् अभिनन्दनं स्वीकृतवान्।
अस्मिन् अवसरे मुख्यमन्त्री विष्णुदेवसायः अवदत् यत् छत्तीसगढं प्रति केन्द्रीय-गृह-मन्त्रिणः अमितशाहस्य आत्मीयः स्नेहः प्रदेशवासिनां कृते शक्तेः विश्वासस्य च सम्बलः अस्ति। प्रदेशस्य शान्तेः, सुरक्षायाः, विकासस्य च प्रति तस्य प्रतिबद्धतया निरन्तर-सहयोगेन च ‘विकसित-छत्तीसगढस्य’ सङ्कल्पाय नूतना ऊर्जा लभ्यमाना अस्ति। मुख्यमन्त्री सायः अकथयत् यत् केन्द्रसर्वकारस्य सहयोगेन मार्गदर्शनेन च छत्तीसगढ-राज्यं शान्तेः, सुरक्षायाः, विकासस्य च विविधेषु क्षेत्रेषु अग्रे सरति।
उल्लेखनीयम् अस्ति यत् त्रिदिवसीयस्य ‘छत्तीसगढ-राज्योत्सवः-२०२६’ इत्यस्य समापनम् अद्य ‘नवा रायपुर अटलनगर’ स्थिते राज्योत्सव-प्राङ्गणे भविष्यति। समापन-समारोहे केन्द्रीय-गृह-तथा-सहकारिता-मन्त्री अमितशाहः मुख्यातिथिः भविष्यति, यदा तु मुख्यमन्त्री विष्णुदेवसायः कार्यक्रमस्य अध्यक्षतां विधास्यति। अस्मिन् अवसरे आयोजिष्यमाणे राज्य-अलङ्करण-समारोहे विविधेषु क्षेत्रेषु उत्कृष्टं योगदानं दत्तवत्यः प्रदेशस्य विभूतयः सम्मानयिष्यन्ते।
–––––––––––––––––––––––––––––––––––––––––––––––––––––––––––––––––
Hindusthan Samachar / अंशु गुप्ता