दीपोत्सवेन २०२६ नवयुवकपीढीः सह सम्बद्धा भविष्यति, प्रौद्योगिक्या सह दृश्यते रामनगर्याः सांस्कृतिकवैभवम् : जयवीरसिंहः

लखनऊम्, ०३ नवम्बरमासः (हि.स.)। अयोध्यायां दीपोत्सवः २०२६ अस्मिन् वर्षे नवयुवकपीढ्याः (जेन-जी) रुच्यनुसारं विशेषरूपेण आयोजयिष्यते। पारम्परिकदीपानां प्रकाशेन सह आधुनिकप्रौद्योगिक्याः समन्वयेन सरयूतीरेषु एतादृशं दृश्यं निर्मास्यते, यत् विशेषरूपेण युवानः आकर्षयिष्यति। उत्तरप्रदेशपर्यटनविभागस्य पक्षतः दीपोत्सवावसरे बहुमाध्यमीयप्रक्षेपणं लेजरप्रदर्शनं च सह शताधिककलाकाराणां सजीवकलाप्रस्तुतिः भविष्यति। रामकीपैडीस्थले नवम्बरमासस्य सप्तमे दिनाङ्के आयोज्यमाने भव्यकार्यक्रमे दीपानां शोभां कृत्रिमप्रकाशेन, प्रौद्योगिक्या, सांस्कृतिकप्रस्तुतिभिश्च संयोज्य आगन्तुकेभ्यः विशेषानुभूतिः प्रदास्यते।

पर्यटनसंस्कृतिमन्त्री जयवीरसिंहः अवदत् यत् दीपोत्सवावसरे पारम्परिकदीपानां प्रकाशेन देदीप्यमाना रामनगरी प्रौद्योगिक्याः कलायाश्च अद्भुतसमन्वयस्य साक्षिणी अपि भविष्यति। अस्मिन् अवसरे विशेषप्रस्तुतयः विशेषतः नवयुवकसंततेः रुचिं ध्यात्वा परिकल्पिताः सन्ति। प्रभुश्रीरामस्य अयोध्याप्रत्यागमनस्य कथां प्रक्षेपणचित्राङ्कनस्य, लेजरप्रकाशस्य, आकाशीयकलाप्रदर्शनस्य, कलाकाराणां प्रस्तुतिनां च माध्यमेन सजीवीं करिष्यन्ति। प्रायः अष्टाविंशतिनिमेषात्मकस्य भव्यप्रदर्शनस्य माध्यमेन भारतीयपरम्परा, आधुनिकप्रौद्योगिकी, मञ्चीयप्रस्तुतयश्च समन्वित्य रामभक्तानां समक्षं रामायणस्य प्रसङ्गाः प्रस्तुताः भविष्यन्ति।

नवम्बरमासस्य नवमदिनाङ्कपर्यन्तं भविष्यन्ति भव्याः कार्यक्रमाः

दीपोत्सवस्य २०२६ अवसरे रामनगर्यां नवम्बरमासस्य पञ्चमदिनाङ्कतः नवमदिनाङ्कपर्यन्तं बहुमाध्यमीयप्रक्षेपणं लेजरप्रदर्शनं च आकर्षणस्य केन्द्रं भविष्यतः। नवम्बरमासस्य पञ्चमदिनाङ्के द्वाभ्यां परीक्षणप्रदर्शनाभ्यां कार्यक्रमस्य शुभारम्भः भविष्यति, षष्ठे दिनाङ्के पूर्णवेषाभ्यासः भविष्यति। सप्तमे दिनाङ्के दीपोत्सवस्य सायंकाले मुख्यमन्त्री योगी आदित्यनाथस्य समक्षं विशेषप्रस्तुतिः प्रदर्शयिष्यते। एतदतिरिक्तं सामान्यजनानां कृते त्रयः अतिरिक्तप्रदर्शनकार्यक्रमाः अपि आयोजयिष्यन्ते। अष्टमे दिनाङ्के दीपावलीपर्वणि चत्वारः प्रदर्शनकार्यक्रमाः भविष्यन्ति, तथापि तेषु नृत्यकार्यक्रमः न भविष्यति। अयोध्यानिवासिनां कृते नवमे दिनाङ्के विशेषस्य ड्रोन्-प्रदर्शनस्य आयोजनं भविष्यति।

नवीनशैली नवयुवकान् आकर्षयिष्यति

दीपोत्सवे बहुमाध्यमीयप्रक्षेपणं लेजरप्रदर्शनं च विगतेषु वर्षेष्वपि आकर्षणस्य केन्द्रम् आस्ताम्। अस्मिन् वर्षे पर्यटनविभागेन नवयुवकपीढ्याः रुचिं ध्यात्वा प्रस्तुतिषु नवीनतायाः विशेषः आग्रहः कृतः अस्ति। अस्य अन्तर्गतं पूर्वकार्यक्रमेषु प्रयुक्तानां दृश्यचित्राणां, सङ्गीतस्य, कथापटस्य, चलच्चित्राङ्कनस्य च पुनरावृत्तिं विहाय नवीनसामग्रीणां माध्यमेन युवपर्यटकान् भगवान् श्रीरामस्य श्रद्धया अयोध्यायाः सांस्कृतिकवैभवेन च सम्बद्धुं सज्जता क्रियते।

चलमञ्चे कलाकाराणां प्रस्तुतीकरणम्

रामकीपैडीस्थले जलस्य मध्ये चलमञ्चस्य निर्माणं क्रियमाणम् अस्ति। अस्मिन् मञ्चे कलाकाराणां प्रस्तुतिभिः सह प्रौद्योगिकप्रभावानाम् अपि प्रदर्शनं भविष्यति। कार्यक्रमे द्विविमीयं, त्रिविमीयं, मानवनिर्मितम् आकाशीयकलाप्रदर्शनं च सह सजीवचलमञ्चसामग्रीणां प्रयोगः भविष्यति। सम्पूर्णायां व्यवस्थायां सुरक्षामानकानां विशेषं ध्यानं दीयते।

शताधिकाः कलाकाराः रामायणस्य प्रसङ्गान् प्रदर्शयिष्यन्ति

नवम्बरमासस्य सप्तमे दिनाङ्के दीपोत्सवस्य मुख्यकार्यक्रमे शताधिकाः भारतीयलोककलाकाराः शास्त्रीयकलाकाराश्च स्वप्रस्तुतिं दास्यन्ति। सर्वेषां कलाकाराणां वेशभूषा दीपोत्सवस्य सांस्कृतिकविषयाधारिता भविष्यति। कथायाः, नृत्यस्य, सङ्गीतस्य, स्वरवर्णनस्य, प्रकाशप्रभावाणां च समन्वयेन श्रीरामस्य अयोध्यागमनस्य कथा क्रमबद्धरूपेण प्रस्तुतिः भविष्यति। हिन्दीभाषायां निर्मितस्य पटकथालेखस्य नाटकीयस्वरूपप्रदाने प्रसिद्धस्य अथवा राष्ट्रियपुरस्कारप्राप्तस्य सृजनात्मकनिर्देशकस्य अथवा पटकथालेखकस्य निर्देशनं भविष्यति।

चलदूरभाषे दृश्यन्ते रामायणस्य प्रसङ्गाः

नवयुवकपीढ्याः प्रौद्योगिक्या सह सम्बन्धः सर्वविदितः अस्ति। एतदेव ध्यात्वा रामायणस्य पञ्च त्रिविमीयदृश्यानि चलदूरभाषे प्रदर्शयितुं सज्जता क्रियते। समग्रतया दीपोत्सवे दर्शकाः संवर्धितवास्तविकतायाः (एआर) अनुभूतिमपि प्राप्स्यन्ति। रामकीपैडीक्षेत्राय आईओएस तथा एण्ड्रॉयड् अनुप्रयोगस्य निर्माणं भविष्यति। चलदूरभाषेण निर्धारितस्थानस्य सङ्केतं परिगृह्य रामायणस्य पञ्च त्रिविमीयदृश्यानि वास्तविकपरिवेशे दृश्यन्ते। दर्शकाः एतानि दृश्यानि अभिलेखयित्वा सामाजिकमाध्यमेषु प्रसारयितुमपि शक्ष्यन्ति। अनुप्रयोगः भौगोलिकसीमाङ्कनप्रणाल्या सह सम्बद्धः भविष्यति। एषा सुविधा केवलं रामकीपैडीक्षेत्रे एव कार्यं करिष्यति।

भव्यं लेजरबहुमाध्यमीयप्रक्षेपणप्रदर्शनम्

मुख्यप्रस्तुतेः अतिरिक्तम् अष्टनिमेषात्मकं लेजरप्रदर्शनम् अपि भविष्यति। अस्मिन् दीपावल्याः श्रीरामस्य अयोध्याप्रत्यागमनस्य च विषयाधारितानां दृश्यानां, सङ्गीतस्य, स्वरवर्णनस्य च समन्वयः भविष्यति। सहस्राधिकदर्शकान् ध्यात्वा उत्तमध्वनिव्यवस्थायाः प्रबन्धः क्रियते। दर्शकानां सुविधायै बहिःस्थापितानां एलईडी-प्रकाशपट्टिकानाम् अपि व्यवस्था भविष्यति। एतदतिरिक्तं विंशनिमेषात्मकं बहुमाध्यमीयं प्रक्षेपणचित्राङ्कनप्रदर्शनम् अपि भविष्यति।

दीपोत्सवः २०२६ नवयुवकपीढ्या सह सम्बद्धः भवति

पर्यटनसंस्कृतिधर्मार्थकार्यविभागस्य अपरमुख्यसचिवः अमृताभिजातः अवदत् यत् दीपोत्सवे २०२६ परम्परायाः प्रौद्योगिक्याश्च एतादृशः समन्वयः द्रष्टुं लप्स्यते, यः अयोध्यायाः सांस्कृतिकवैभवं नवयुवकपीढ्या सह सम्बद्धुं माध्यमं भविष्यति। प्रक्षेपणचित्राङ्कनस्य, लेजरप्रदर्शनस्य, आकाशीयकलाप्रदर्शनस्य, सजीवकलाप्रस्तुतीनां, संवर्धितवास्तविकतायाश्च इत्यादीनां प्रौद्योगिकप्रयोगाणां माध्यमेन भगवान् श्रीरामस्य अयोध्यागमनस्य कथा नवीनशैल्या प्रस्तुतः भविष्यति। विजिट् माय् स्टेट् अभियानस्य अपि प्रोत्साहनं भविष्यति। अस्माकं प्रयासः अस्ति यत् देशविदेशेभ्यः आगच्छन्तः श्रद्धालवः पर्यटकाः च अयोध्यायाः श्रद्धायाः, संस्कृतेः, दीपोत्सवस्य भव्यतायाश्च अविस्मरणीयम् अनुभवं स्वीकृत्य प्रत्यागच्छेयुः।

Hindusthan Samachar / Dheeraj Maithani