हरिद्वारम्, 03 नवंबरमासः (हि.स.)।

रानीपुरविधानसभाक्षेत्रस्य टीराटोंगियाग्रामे पेयजलसङ्कटस्य निवारणार्थं ७८.४० लक्षरूप्यकाणां योजनायाः शुभारम्भः कृतः। विधायकः आदेशचौहानः विधिवत् पूजनं कृत्वा योजनायाः निर्माणकार्यस्य शुभारम्भम् अकरोत्। अनया योजनया टीराटोंगिया, खालाटीरा तथा टांडाटीरा ग्रामाणां शतशः परिवाराणां कृते उत्तमपेयजलसुविधायाः उपलब्धतायाः आशा अस्ति।

ग्रीष्मऋतौ ग्रामीणाः नियमितरूपेण पर्याप्तं जलं न प्राप्नुवन्तः समस्याम् अनुभवन्ति स्म। अस्मात् पूर्वं क्षेत्रे प्रायः द्विकोटिरूप्यकाणां व्ययेन पेयजलनलिकाः स्थापिताः तथा उच्चस्थजलभाण्डारस्य निर्माणं कारितम् आसीत्। तथापि पुरातननलकूपस्य क्षमता पर्याप्ता नासीत् इत्यतः जलापूर्तेः समस्या निरन्तरं विद्यमाना आसीत्। नवीनयोजना अस्याः समस्यायाः समाधानदिशि महत्त्वपूर्णं पदक्षेपं मन्यते।

अस्मिन्नवसरे विधायकः आदेशचौहानः अवदत् यत् जनतायै मूलभूतसुविधानाम् उपलब्धीकरणं तस्य प्राथमिकता अस्ति। पेयजलं प्रत्येकस्य परिवारस्य आधारभूता आवश्यकता अस्ति। ग्रीष्मकाले ग्रामीणाः जलसमस्यया पीडिताः न भवेयुः इत्यर्थं योजनायाः स्वीकृतिं प्राप्य निर्माणकार्यस्य आरम्भः कारितः अस्ति। सः अवदत् यत् रानीपुरविधानसभाक्षेत्रस्य प्रत्येकं ग्रामं प्रत्येकं परिवारं च स्वच्छं पर्याप्तं च पेयजलं प्रापयितुं प्रयासः क्रियते। क्षेत्रस्य समग्रविकासः जनसमस्यानां स्थायिसमाधानं च तस्य प्रतिबद्धता अस्ति।

क्षेत्रीयजिलापञ्चायतसदस्या बिमलेशदेवी विधायकं प्रति कृतज्ञतां प्रकटयन्ती अवदत् यत् त्रयाणां ग्रामाणां ग्रामीणाः दीर्घकालात् पर्याप्तपेयजलस्य अनुपलब्धतायाः समस्यया पीडिताः आसन्। विधायकेन समस्यां गम्भीरतया गृहीत्वा ७८.४० लक्षरूप्यकाणां योजनायाः स्वीकृतिं कारयित्वा कार्यस्य शुभारम्भः कारितः अस्ति। अनया योजनया शतशः परिवाराणां कृते समस्यायाः निवारणस्य आशा अस्ति।

शुभारम्भावसरे ग्रामप्रधानः अनिलकुमारः, क्षेत्रपञ्चायतसदस्यः रविकुमारः, प्रदीपराठौरः, रामपालसिंहः, नाथीसिंहः, डॉ. कुलदीपचौहानः, नरेशराठौरः, जसप्रीतसिंहः, सुरेशप्रधानः इत्यादयः अनेके गणमान्यजनाः ग्रामीणाश्च उपस्थिताः आसन्।

Hindusthan Samachar / Dheeraj Maithani