Enter your Email Address to subscribe to our newsletters
शङ्कराचार्यस्य कथनम्—योगी आदित्यनाथस्य शासनस्य रामराज्येन सह तुलना करणं नितरां अनुचितम्
वाराणसी, ०४ नवम्बरमासः (हि.स.)। केन्द्रीयगृहमन्त्री अमितशाहेन उत्तरप्रदेशस्य भाजपासर्वकारस्य स्थितेः तुलना अङ्गदस्य चरणेन कृते सति ज्योतिष्पीठाधीश्वरः शङ्कराचार्यः स्वामी अविमुक्तेश्वरानन्दसरस्वती तीव्रां प्रतिक्रियां व्यक्तवान्। सः अवदत् यत् अङ्गदस्य चरणः कस्यापि सत्तायाः अथवा अहङ्कारस्य बलेन न, अपितु सत्यस्य, धर्मस्य, न्यायस्य च शक्त्या स्थिरः आसीत्।
शङ्कराचार्यः अवदत् यत् राजनीतिज्ञैः अवगन्तव्यं यत् धर्मग्रन्थानां प्रसङ्गानां प्रतीकानां च स्वकीयसुविधानुसारं राजनैतिकप्रयोजनाय उपयोगः धर्मस्य सम्मानः नास्ति, अपितु तस्य सरलीकरणम् अस्ति। अङ्गदमहोदयेन रावणस्य सभायां स्पष्टतया उक्तम् आसीत् यत् तस्य चरणः मर्यादापुरुषोत्तमस्य भगवान् श्रीरामस्य धर्मस्य, सत्यस्य, न्यायस्य च नीतिप्रभावेण अचलः अस्ति। अतः अङ्गदस्य चरणस्य प्रसङ्गं सत्तायाः अहङ्कारेण राजनैतिकदृढतया च सह सम्बद्धं करणम् अनुचितम् अस्ति।
उत्तरप्रदेशस्य योगी आदित्यनाथसर्वकारं प्रति लक्ष्यं कृत्वा सः अवदत् यत् यस्मिन् शासने बटुकानां शिखाः आकर्ष्यन्ते, सन्तेषु निर्दयतया प्रहाराः क्रियन्ते तथा लक्षशः गौमातॄणां वधस्य आरोपाः सन्ति, तस्य शासनस्य तुलना रामराज्येन कदापि कर्तुं न शक्यते।
शङ्कराचार्यः अवदत् यत् रामराज्यस्य मूलभावना धर्मे, न्याये, करुणायाम्, मर्यादायां लोककल्याणे च आधारिताऽऽसीत्। अतः कस्यापि सर्वकारस्य मूल्याङ्कनं सत्तायाः दृढतायाः आधारेण न, अपितु तस्य शासने धर्मस्य, न्यायस्य, जनकल्याणस्य च स्थितेः आधारेण कर्तव्यम्।
बुधवासरे शङ्कराचार्यस्य स्थानीयमीडियाप्रभारी सञ्जयपाण्डेयः एतां सूचनां प्रदत्तवान्।
Hindusthan Samachar / Dheeraj Maithani