पश्चिममेदिनीपुरम्, ०५ नवम्बरमासः (हि.स.)। पश्चिममेदिनीपुरजनपदस्य नारायणगढहाटपरिसरे बहुवर्षेभ्यः विरता पारम्परिककालीपूजा पुनः प्रारब्धा अस्ति। स्थानीयग्रामीणानां प्रयासेन अस्थायि-मन्दिरस्य निर्माणं कृत्वा मातुः कालीदेव्याः पूजनम् आरब्धम्। दीर्घकालानन्तरं प्राचीनपरम्परायाः पुनरागमनेन क्षेत्रस्य जनाः प्रसन्नाः सन्ति।

स्थानीयः निवासी रामकृष्णबेरा अवदत् यत् पूर्वं नारायणगढहाटपरिसरे मातुः कालीदेव्याः एकं मन्दिरम् आसीत्। ग्रामवासिनः सामूहिकरूपेण तत्र पूजायाः आयोजनं कुर्वन्ति स्म। किन्तु अनन्तरं हाटसञ्चालनसमित्या सह मतभेदानां कारणात् पूजा स्थगिता अभवत्। ततः परं बहुवर्षाणि यावत् अत्र कालीपूजायाः आयोजनं न अभवत्।

स्थानीयग्रामीणानां कथनमस्ति यत् राज्ये सत्तापरिवर्तनानन्तरं भाजपानेतॄणां सहयोगेन पूजाम् पुनः प्रारब्धुं प्रयासः कृतः। अस्य अन्तर्गतं ग्रामवासिनः एकत्रिताः भूत्वा अस्थायिमन्दिरस्य निर्माणम् अकुर्वन् तथा च तत्र पाषाणनिर्मितां मातुः कालीदेव्याः प्रतिमां संस्थाप्य पूजाम् आरब्धवन्तः।

अस्मिन् विषये गुरुवासरे स्थानीय-भाजपानेता प्रद्युतभुइयाः हिन्दुस्थान-समाचारं प्रति अवदत् यत् नारायणगढहाटे दीर्घकालात् कालीपूजा प्रचलिता आसीत्। स्थानीयजनाः एव सामूहिकरूपेण अस्याः आयोजनं कुर्वन्ति स्म, किन्तु विगतेषु कतिपयेषु वर्षेषु पूजा स्थगिता आसीत्। ग्रामीणाः तस्य समीपम् आगत्य स्वकीयां समस्यां प्रस्तुतवन्तः। ततः सर्वसम्मत्या पूजायाः पुनः शुभारम्भे सहयोगं कर्तुं निर्णयः स्वीकृतः।

तेन सूचितं यत् कालीपूजादिने स्थायी-मन्दिरस्य स्थापनायै अपि प्रयासः कर्तुं योजना अस्ति, येन स्थानीयजनाः वर्षपर्यन्तं मन्दिरम् आगत्य मातुः कालीदेव्याः पूजार्चनां च कर्तुं शक्नुयुः।

दीर्घकालात् स्थगितायाः धार्मिक-परम्परायाः पुनः शुभारम्भार्थं कृतेन अस्मिन् प्रयासेन क्षेत्रे उत्साहस्य वातावरणं वर्तते।

Hindusthan Samachar / Divya Ranjan