हरिद्वारम्, 05 नवंबरमासः (हि.स.)।

भारत हेवी इलेक्ट्रिकल्स लिमिटेड् (बीएचईएल) संस्थायै देशे चतुर्णां तापविद्युत्परियोजनानां स्थापनार्थम् अदाणी पावर लिमिटेड् संस्थातः बृहद् स्वदेशीयाः निर्माणादेशाः प्राप्ताः। हरिद्वारस्थेन बीएचईएल-संस्थायाः सूचनासम्पर्कविभागेन निर्गतस्य वार्तापत्रकस्य अनुसारम्, एतेषां संविदानाम् अन्तर्गतं बीएचईएल संस्था चतुर्णां परियोजनानां कृते महत्त्वपूर्णानां विद्युतुत्पादनयन्त्राणां प्रदायं करिष्यति, तदर्थम् आवश्यकाः सेवाः अपि उपलब्धाः करिष्यति।

प्रत्येकस्याः परियोजनायाः क्षमता २८०० मेगावाट् इति निर्धारिता अस्ति। एवं चतुर्णां परियोजनानां प्रस्ताविता समग्रक्षमता ६४०० मेगावाट् भविष्यति। संविदानुसारं बीएचईएल संस्था वाष्पित्राणां, आवर्तित्राणां, विद्युद्जनित्राणां तथा तैः सम्बद्धानाम् सहायकयन्त्राणां प्रदायं करिष्यति। परियोजनानां कार्यान्वयनम् अदाणी पावर संस्थायाः आवश्यकतानुसारं भविष्यति।

बीएचईएल संस्थायै एते विशालाः निर्माणादेशाः महत्त्वपूर्णा उपलब्धिः इति मन्यते। एते आदेशाः संस्थायाः प्रौद्योगिकीयदक्षतायाः, निर्माणसामर्थ्यस्य तथा विशालविद्युत्परियोजनानां कार्यान्वयने तस्याः विशेषज्ञतायाः विषये ग्राहकस्य विश्वासम् अपि प्रकाशयन्ति।

विद्युतुत्पादनयन्त्राणां क्षेत्रे बीएचईएल संस्थायाः देशे विदेशेषु च सुदृढा उपस्थितिः अस्ति। संस्था अद्यावधि विश्वे २१४ गिगावाट् इत्यधिकक्षमतायुक्तानि विद्युतुत्पादनयन्त्राणि स्थापयितुं सफला अभवत्। २०२५-२६ वित्तवर्षस्य समाप्तिपर्यन्तं देशस्य उपयोगितास्तरीयायां तापविद्युत्क्षमतायां बीएचईएल संस्थायाः योगदानं ५४ प्रतिशतं, परमाणुऊर्जायाः द्वितीयकपक्षे ६० प्रतिशतं, जलविद्युत्क्षेत्रे च ४३ प्रतिशतं आसीत्। अपरतः देशस्य समग्रायाः उपयोगितास्तरीयायाः पारम्परिकविद्युतुत्पादनक्षमतायाः ५३ प्रतिशतं योगदानम् अस्याः संस्थायाः अस्ति।

अदाणी पावर संस्थातः प्राप्ताः एते प्रतिष्ठिताः संविदादेशाः बीएचईएल संस्थायाः प्रौद्योगिकीयनेतृत्वं विपण्यां च तस्याः सुदृढां स्थितिं अधिकं सुदृढां करिष्यन्ति। एतासां परियोजनानां माध्यमेन देशस्य विद्युतुत्पादनक्षमतायाः वर्धने, ऊर्जासुरक्षायाः सुनिश्चितीकरणे तथा आत्मनिर्भरभारतस्य लक्ष्यप्राप्तेः गतिवर्धने च साहाय्यं भविष्यति।

Hindusthan Samachar / Dheeraj Maithani