हुगली, 06 नवंबरमासः (हि. स.)।

देशस्य स्वातन्त्र्यप्राप्तेः ७९ वर्षाणि व्यतीतानि, तथापि हुगलीजनपदस्य एकस्मिन् ग्रामे विद्युत्सुविधा नोपलब्धा आसीत्। अन्ततः दीपावल्याः पूर्वं तारकेश्वरविधानसभाक्षेत्रान्तर्गतस्य अस्त्रदत्तपुरग्रामस्य जनाः प्रथमवारं विद्युदालोकं प्राप्तवन्तः। विद्युत्प्रकाशेन ग्रामस्य प्रायः चत्वारि शतानि जनजातीयपरिवाराणि हर्षोल्लासपूर्णानि सन्ति।

स्थानीयग्रामवासिनां कथनानुसारं कतिपयवर्षेभ्यः पूर्वं ग्रामे विद्युत्स्तम्भाः स्थापिताः आसन्, किन्तु तेषु विद्युत्ताराः न प्रसारिताः। अतः ग्रामवासिनः अद्यावधि विद्युत्सुविधायाः वञ्चिताः आसन्। अस्याः समस्यायाः सर्वाधिकं दुष्प्रभावः ग्रामस्य बालकेषु विद्यार्थिषु च आसीत्। सायंकालानन्तरं तेभ्यः अध्ययनं कर्तुं बहवः काठिन्याः भवन्ति स्म।

स्थानीयवासिनी रुई बाड़ी इत्येषा स्वस्य हर्षं प्रकटयन्ती अवदत् यत् स्वातन्त्र्यप्राप्तेः अनन्तरं प्रथमवारं तेषां ग्रामे विद्युत्सुविधा सम्प्राप्ता। तथापि सा पूर्वतनायाः तृणमूलकाङ्ग्रेसशासनव्यवस्थायाः उपरि राजनैतिककारणैः ग्रामे विद्युत्सुविधां न प्रदत्तवती इति आरोपमपि कृतवती।

भाजपाविधायकः सन्तु पान इत्यनेन दावीकृतं यत् ग्रामवासिनः १९९७-९८ वर्षात् आरभ्य भाजपादलाय मतदानं कुर्वन्ति स्म। अस्यैव कारणात् दीर्घकालपर्यन्तं ग्रामः विद्युत्सुविधया वञ्चितः आसीत्। विधायकस्य कथनानुसारं निर्वाचनप्रचारकाले ग्रामवासिनां समस्यां ज्ञात्वा सः निर्वाचनविजयस्य अनन्तरं सर्वप्रथमं ग्रामे विद्युत्सुविधां प्रदास्यामीति प्रतिज्ञां कृतवान् आसीत्।

सन्तु पान इत्यनेन सूचितं यत् प्रायः एकमासपूर्वं जनपदीयविद्युत्विभागस्य माध्यमेन गृहे गृहे विद्युत्मापकयन्त्राणि स्थापयितुं कार्यमारब्धम्। बीपीएलसूच्यां समाविष्टेभ्यः परिवारेभ्यः निःशुल्कं विद्युत्संयोजनं प्रदास्यते। अद्यावधि पञ्चाशत् गृहेषु नूतनानि विद्युत्मापकयन्त्रपेटिकानि स्थापितानि सन्ति तथा च शताधिकपरिवारान् विद्युत्संयोजनस्य परिधौ आनेतुं प्रक्रिया प्रचलति।

ग्रामस्य सर्वे परिवाराः जनजातीयसमुदायस्य सन्ति तथा च तेषाम् आजीविका मुख्यतया कृषिकार्ये आश्रिता अस्ति। दीर्घप्रतीक्षायाः अनन्तरं ग्रामे विद्युत्सुविधायाः आगमनम् एतेषां परिवाराणां कृते दीपावल्याः पूर्वं प्रकाशपर्वणः आनन्दात् न्यूनं नास्ति।

---------------

Hindusthan Samachar / Dheeraj Maithani