धर्मशाला, 06 नवंबरमासः (हि.स.)।

शाहपुरस्य विधायकः उपमुख्यसचेतकश्च केवलसिंहपठानिया उक्तवान् यत् शाहपुरचिकित्सालयस्य नूतनभवनस्य उद्घाटनं शीघ्रमेव प्रदेशस्य मुख्यमन्त्रिणा सुखविन्दरसिंहसुक्खुना विधास्यते तथा च तत् जनसमर्पणं करिष्यते।

केवलसिंहपठानिया उक्तवान् यत् विगतेषु सार्धत्रिषु वर्षेषु नागरिकचिकित्सालये शाहपुरे प्रायः षोडशकोटिरूप्यकाणि व्ययीकृत्य जनानां कृते उत्तमस्वास्थ्यसेवानाम् उपलब्धता सुनिश्चिता कृता। तेन सह आधुनिकचिकित्सासुविधानां विस्तारः अपि कृतः।

पठानिया शुक्रवासरे धनत्रयोदश्याः अवसरे नागरिकचिकित्सालये शाहपुरे नवीनाम् रुग्णवाहिकासेवां हरितध्वजं प्रदर्श्य प्रस्थापयन् एतदुक्तवान्। सः अवदत् यत् तस्य भगवतः समीपे प्रार्थना अस्ति यत् कोऽपि जनः रोगग्रस्तः न भवेत्, किन्तु दुर्भाग्यवशात् रोगस्य अथवा दुर्घटनायाः स्थितौ नूतना रुग्णवाहिकासेवा जनानां कृते लाभप्रदा सिद्धा भविष्यति।

सः उक्तवान् यत् प्रदेशस्य सर्वकारः जनानां कृते उत्तमस्वास्थ्यसेवानाम् उपलब्धतां सुनिश्चितुं प्रतिबद्धः अस्ति। अस्य कृते सः प्रदेशस्य मुख्यमन्त्रिणे स्वास्थ्य मन्त्रिणे च कृतज्ञतां ज्ञापितवान्, याभ्यां शाहपुरचिकित्सालयाय पर्याप्ता धनराशिः प्रदत्ता।

तेन सूचितं यत् नागरिकचिकित्सालयः शाहपुरः शाहपुरविधानसभाक्षेत्रस्य अतिरिक्तं जवाली तथा भटियातविधानसभाक्षेत्रयोः जनानाम् अपि स्वास्थ्यसेवाः प्रददाति। सम्प्रति चिकित्सालये सप्तदश चिकित्सकाः सेवां कुर्वन्ति तथा च शीघ्रमेव चिकित्सकानां द्वौ रिक्तौ पदौ अपि पूरयिष्येते।

केवलसिंहपठानिया उक्तवान् यत् रोगिणः टाण्डाचिकित्सालयं गन्तुं न बाध्येरन् इति उद्देशेन सार्धैककोटिरूप्यकाणां व्ययेन आधुनिकं मॉड्यूलर शल्यक्रियागृहं स्थापितम् अस्ति, यत्र अधुना शल्यक्रियाः अपि क्रियन्ते।

एतदतिरिक्तं चिकित्सालये सप्तलक्षपञ्चाशत्सहस्ररूप्यकाणां व्ययेन नवीनः उच्चस्तम्भदीपः, पञ्चविंशतिलक्षरूप्यकाणां व्ययेन नवीनं अल्ट्रासाउण्डयन्त्रम्, पञ्चाशल्लक्षरूप्यकाणां व्ययेन च खण्डस्तरीयः सार्वजनिकस्वास्थ्यएककः स्थापितः अस्ति। एतेन रोगाणां समयपूर्वं परीक्षणं तथा निवारणं सुनिश्चितं भविष्यति।

Hindusthan Samachar / Dheeraj Maithani