—प्रथमवारं प्रदत्ताः पुरस्काराः, प्रत्येकस्मै बालकाय ५१ सहस्ररूप्यकाणि, पदकं प्रशस्तिपत्रं च प्रदत्तम्।

देहरादूनम्, ०६ नवम्बरमासः (हि.स.)। उत्तराखण्डे साहसस्य सूझबूझस्य च परिचयं दत्त्वा अन्येषां प्राणान् रक्षितवन्तः षड् बालकाः शुक्रवासरे प्रथममुख्यमन्त्रिराज्यबालवीरतापुरस्कारेण सम्मानिताः। परेडग्राउण्डे आयोजिते राज्योत्सवसमारोहे केन्द्रीयगृहमन्त्री सहकारितामन्त्री अमितशाहः तथा मुख्यमन्त्री पुष्करसिंहधामी च बालकेभ्यः पदकानि प्रशस्तिपत्राणि च प्रदत्तवन्तौ। प्रत्येकस्मै पुरस्कारविजेत्रे ५१ सहस्ररूप्यकाणाम् धनराशिः अपि प्रदत्ता।

महिलासशक्तीकरणबालविकासविभागस्य पक्षतः वित्तीयवर्षे २०२६-२७ प्रथमवारम् एते पुरस्काराः प्रदत्ताः। राज्यस्तरे प्राप्तेषु आवेदनपत्रेषु षड् बालकानां चयनं कृतम्। एतेषु चमोलीजनपदस्य त्रयः तथा चम्पावत्, देहरादून, टिहरीगढवालजनपदानां एकैकः बालकः सम्मिलितः अस्ति।

चमोलीजनपदस्य दिव्या, दीपिका तथा आरवसिंहः भाल्वाक्रमणस्य समये प्रदर्शितस्य साहसस्य कृते सम्मानिताः। २०२५ तमस्य वर्षस्य दिसम्बरमासस्य २२ दिनाङ्के जीआईसी यूपीएस हरिशङ्करविद्यालयस्य परिसरे भालूना षष्ठीकक्षायाः छात्रः आरवसिंहः आक्रान्तः आसीत्। अस्मिन् समये अष्टमकक्षायाः छात्रा दिव्या आरवस्य रक्षणस्य प्रयासं कृतवती तथा तं सुरक्षितरूपेण विद्यालयं प्रति नेतुम् अपि साहाय्यं कृतवती। अपरतः दीपिका तत्क्षणमेव अन्यान् नव विद्यार्थिनः सप्तमकक्षायाः कक्षे नीत्वा सुरक्षितान् अकरोत्।

चम्पावतजनपदस्य मायायै नद्याः तीव्रप्रवाहे निमग्नायाः बालिकायाः प्राणरक्षणार्थं पुरस्कारः प्रदत्तः। २०२५ तमस्य वर्षस्य अगस्तमासस्य पञ्चमे दिनाङ्के अतिवृष्टेः समये नदीप्रवाहे प्रवहन्तीं बालिकां माया स्वप्राणानाम् अवहेलनां कृत्वा सुरक्षितरूपेण बहिः निष्कासितवती। अस्मिन् प्रयासे सा स्वयम् अपि आहताभवत्।

देहरादूनस्य आराध्या २०२६ तमस्य वर्षस्य जूनमासस्य द्वितीये दिनाङ्के मेघस्फोटस्य घटनायाः समये प्रदर्शितायाः सूझबूझस्य कृते सम्मानिता। अतिवृष्ट्या मलबाप्रवाहस्य जलप्रवाहस्य च स्थितौ सा गृहे उपस्थितान् सप्तदश जनान् तत्क्षणमेव सावधानान् कृत्वा सुरक्षितस्थाने प्रेषितवती। सा त्रिवर्षीयां बालिकाम् अपि तीव्रजलप्रवाहात् रक्षितवती।

टिहरीगढवालजनपदस्य श्वेता मार्गदुर्घटनायाः आशङ्कायां वृद्धस्य प्राणरक्षणार्थं सम्मानिता। २०२५ तमस्य वर्षस्य जनवरीमासस्य त्रिंशत्तमे दिनाङ्के तीव्रगत्या आगच्छन्तं वाहनं दृष्ट्वा सा तत्क्षणमेव वृद्धस्य हस्तं गृहीत्वा तं मार्गस्य पार्श्वे सुरक्षितस्थाने नीतवती।

राज्यसर्वकारस्य अनुसारं मुख्यमन्त्रिराज्यबालवीरतापुरस्कारस्य उद्देश्यम् असाधारणसाहसं, संवेदनशीलतां सूझबूझं च प्रदर्शयन्तः बालकान् प्रोत्साहितुं तथा तेषां कार्यैः अन्यबालकान् प्रेरयितुम् अस्ति।

Hindusthan Samachar / Dheeraj Maithani