उज्जयिनीम्, ०७ नवम्बरमासः (हि.स.)। मध्यप्रदेशस्य उज्जयिन्यां स्थिते विश्वप्रसिद्धे श्रीमहाकालेश्वरमन्दिरे शनि-वासरे प्रातःकाले भगवत: महाकालस्य भस्मारार्तिकी विशेषशृङ्गारेण सम्पन्ना। कार्तिकमासस्य कृष्णपक्षस्य त्रयोदश्यां प्रातः ४ वादने मन्दिरस्य द्वाराणि उद्घाटितानि। ततः गर्भगृहे विराजमानानां देवीदेवतानां पूजनं कृत्वा भगवत: महाकालस्य जलाभिषेकः कृतः। दुग्धेन, दध्ना, घृतेन, मधुना, शर्करया फलरसैश्च निर्मितेन पञ्चामृतेन अभिषेकं विधाय विधिविधानपूर्वकं पूजनं कृतम्।

पूजनस्य समये प्रथमं घण्टानादं कृत्वा भगवते हरिओमजलम् अर्पितम्। ततः बाबा महाकालस्य मनोहरः शृङ्गारः कृतः। ज्योतिर्लिङ्गं रजतमयेन ॐ-चिह्नेन, बिल्वपत्रनिर्मितेन मुकुटेन रुद्राक्षमालया च सुशोभितम्। भगवतः मस्तके त्रिपुण्ड्रं त्रिशूलं च अलङ्कृतम्। तथैव डमरुः, शेषनागस्य रजतमुकुटः, रजतमुण्डमाला तथा सुगन्धितपुष्पमालाः समर्पिताः। भाङ्गेन चन्दनेन च भगवतः अलङ्करणम् अपि कृतम्। अभिषेकस्य शृङ्गारस्य च अनन्तरं भगवान् महाकालः फलैः मिष्टान्नैश्च उपहारं समर्पितवान्। कर्पूरारार्तिकीं नैवेद्यपूजनं च कृत्वा भस्मारार्तिक्या: प्रक्रिया प्रारब्धा। मन्त्राणाम् उच्चारणस्य मध्ये ज्योतिर्लिङ्गं वस्त्रेण आच्छाद्य भस्म समर्पितम्।

भस्मारार्तिक्या: समये परम्परानुसारं महानिर्वाणी-अखाडा इत्यस्य पक्षतः भगवते महाकालाय भस्म समर्पितम्। मान्यता अस्ति यत् भस्मसमर्पणानन्तरं भगवान् महाकालः निराकारस्वरूपात् साकारस्वरूपेण भक्तेभ्यः दर्शनं ददाति। अस्याः अलौकिकायाः आरार्तिक्याः दर्शनार्थं बहुसङ्ख्यकाः श्रद्धालवः नन्दी-मण्डपे मन्दिरपरिसरे च उपस्थिताः आसन्। श्रद्धालवः बाबा महाकालस्य दर्शनं कृत्वा आशीर्वादं प्राप्तवन्तः। अनेके भक्ताः नन्दीमहाराजस्य दर्शनं कृत्वा तस्य कर्णे स्वकामनाः निवेदितवन्तः। अस्मिन् अवसरे मन्दिरपरिसरः बाबा महाकालस्य जयघोषैः गुञ्जितः अभवत्।

Hindusthan Samachar / Divya Ranjan