चेन्नईनगरम्, १३ फरवरीमासः (हि.स.)। तमिलनाडु–राज्यस्य मुख्यमन्त्री एम.के.स्टालिन: घोषणां कृतवान् यत् तमिलनाडु–राज्ये महिलाभ्यः प्रदीयमाना मासिक–अधिकार–राशिः १००० रूप्यकाणि ‘द्रविड–मॉडल २.०’ (अग्रिम: डीएमके–सर्वकार:) मध्ये वर्धयित्वा २००० रूप्यकाणि करिष्यते। सः अवदत् यत् अग्रिमाणां त्रयाणां मासानां (फरवरी, मार्च, अप्रैल) अग्रिम–अधिकार–राशिः ३००० रूप्यकाणि तथा ग्रीष्मकालीन–विशेष–सहायता–रूपेण २००० रूप्यकाणि—एवं समष्ट्या ५००० रूप्यकाणि—अद्य प्रभाते महिलानां धनागारेषु प्रेषितानि सन्ति।

तमिलनाडु–राज्ये महिला–अधिकार–राशि–योजना डीएमके–सर्वकारेण प्रवर्तिता अस्ति। अस्यां योजनायां १५ सितम्बर २०२३ तः प्रत्येकं परिवारस्य महिला–मुख्यायाः धनागारे प्रतिमासं १००० रूप्यकाणि निक्षिप्यन्ते। एतस्याः योजनायाः लाभं इदानीन्तनं यावत् १.१४ कोटि महिलाः अलभन्त। गतवर्षे एप्रिल–मासे मुख्यमन्त्री स्टालिनः नूतन–लाभार्थिनां समावेशनस्य घोषणा अपि कृतवान्।

तदनुसारं गतवर्षे जून–मासे तमिलनाडु–राज्यस्य ९००० स्थानेषु ‘मक्कलुडन् मुख्यमन्त्री’ (जनतया सह मुख्यमन्त्री) इति शिविराणि आयोजितानि, येषु चतुर्थ–चरणे महिला–अधिकार–राश्यै आवेदनानि स्वीकृतानि। पूर्वं वञ्चिताः महिलाः अपि अस्मिन् चरणे समावेशयितुं अनुमताः। अद्य लाभार्थिनां संख्या वर्धित्वा १.३१ कोटि अभवत्।

मुख्यमन्त्री स्टालिनः स्वस्य ‘एक्स’ (पूर्व–ट्विटर) लेखने लिखितवान्— “महिलानां कृते स्टालिनेन दत्तं वचनमेव अधिकार–राशिः। कश्चित् अपि बाधां कर्तुं प्रयतेत्, अहं न निवर्तिष्ये। निर्वाचनस्य व्याजेन त्रयाणां मासानां राशिं रोद्धुं प्रयासः क्रियते; किन्तु अस्माकं द्रविड–मॉडल–सर्वकारेण पूर्वमेव राशि: विमोचिता। फरवरी–मार्च–एप्रिल–मासानां कृते ३००० रूप्यकाणि अग्रिमा ग्रीष्मकालीन–विशेष–सहायता २००० रूप्यकाणि, एवं आहत्य ५००० रूप्यकाणि—अद्य प्रभाते १.३१ कोटि लाभार्थिनां धनागारेषु प्रेषितानि। तमिल–महिलानां समर्थनात् वयं पुनः विजेष्यामः। द्रविड–मॉडल २.० मध्ये १००० रूप्यकाणां अधिकार–राशिः २००० रूप्यकाणि करिष्यते। एतत् मम भगिनीनां कृते मुथुवेल करुणानिधि–स्टालिनस्य वचनम्।”

अपरं, भाजपाया: पूर्व–राज्य–अध्यक्षा तमिलिसाई सौंदरराजन् अवदत् यत् टीएएसएमएसी (राज्य–मद्य–विक्रय–संस्था) विषये निर्णयं विना महिलाभ्यः राशि–वितरणं आलोचनीयम् अस्ति।

हिन्दुस्थान समाचार / अंशु गुप्ता