भोपालनगरम्, १९ फरवरीमासः (हि.स.)। अद्य गुरुवासरे राष्ट्रवादी-विचारकः, राष्ट्रीय-स्वयंसेवक-संघस्य द्वितीयः सरसंघचालकः माधवरावसदाशिवगोलवलकर ‘गुरुजी’ तथा राष्ट्रप्रेमी-योद्धा छत्रपतिशिवाजी महाराज—एतयोः जयंती अस्ति। अस्मिन् अवसरे मध्यप्रदेशस्य मुख्यमन्त्री मोहनयादवः द्वयोः अपि महापुरुषयोः स्मरणं कृत्वा विनम्रं नमनं अकरोत्।

मुख्यमन्त्री डॉ.यादवः माधवराव-सदाशिव-गोलवलकरस्य जयंती-अवसरे नमनं कुर्वन् अवदत्— “राष्ट्रीय-स्वयंसेवक-संघस्य द्वितीयः सरसंघचालकः, परमश्रद्धेयः माधवराव-सदाशिव-गोलवलकरः ‘गुरुजी’—तस्य जयंती-अवसरे सादरं नमनं करोमि। राष्ट्रं प्रति भवतः प्रखरं चिन्तनं, ओजस्विनः विचाराः, समर्पितं जीवनं च अस्मान् सर्वान् प्रतिक्षणं राष्ट्रसेवायै प्रेरयिष्यन्ति।”

अन्यस्मिन् सन्देशे मुख्यमन्त्री डॉ.यादवः छत्रपति-शिवाजी-महाराजस्य जयंतीं स्मरन् अवदत्— “हिन्दवी-स्वराज्यस्य संस्थापकः, वीर-शिरोमणिः छत्रपति-शिवाजी-महाराजः—तस्य जयंती-अवसरे कोटिशः नमनं करोमि। तेन अभूतपूर्वेण पराक्रमेण, शौर्येण युद्धकौशलेन च अखण्ड-भारतस्य सङ्कल्पः साकारः कृतः, मातृभारत्याः स्वाभिमानाय च जीवनं समर्पितम्। तस्य जीवनं यूनः सदैव प्रेरयिष्यति।”

स्वतन्त्रता-सेनानी गोपालकृष्ण-गोखले-इत्यस्य पुण्यतिथौ श्रद्धाञ्जलिः

अद्य एव स्वतन्त्रता-सेनानिनः गोपाल-कृष्ण-गोखले-इत्यस्य पुण्यतिथिः अपि अस्ति। अस्मिन् अवसरे मुख्यमन्त्री डॉ.यादवः तस्मै श्रद्धाञ्जलिं अर्पयन् अवदत्— “स्वतन्त्रता-सेनानी गोपालकृष्ण-गोखले-इत्यस्य पुण्यतिथौ विनम्रां श्रद्धाञ्जलिं अर्पयामि। तेन शिक्षा-कौशलयोः माध्यमेन आत्मनिर्भरतायाः विकासाय अत्यावश्यकता प्रतिपादिता, तथा च यूनः सदा प्रेरिताः। तस्य ओजस्विनः विचाराः सदैव अस्मान् मार्गं दर्शयिष्यन्ति।”

हिन्दुस्थान समाचार / अंशु गुप्ता