Enter your Email Address to subscribe to our newsletters
हरिद्वारम्, 19 फ़रवरीमासः (हि.स.)।
श्री रामकृष्ण परमहंस-महाभागस्य एकोननवत्यधिकशततमः जन्मजयन्त्योत्सवः रामकृष्ण मिशन सेवाश्रम कनखल-संस्थायां धूमधामेन सम्यग् आचरितः। अस्मिन् अवसरे सेवाश्रममठात् शोभायात्रा निर्गता या कनखलप्रदेशस्य प्रमुखबाजारमार्गान् परिभ्रम्य पुनः सेवाश्रमे समापिता।
मङ्गलारार्तिः, हवनम्, जपः, ध्यानम् इत्यादीनाम् अपि आयोजनम् अभवत्।
अस्मिन् सन्तसम्मेलने मुख्यातिथिरूपेण वक्तुं प्रवृत्तः महामण्डलेश्वरः स्वामी हरिचेतनानन्दमहाराजः अवदत् यत् रामकृष्णपरमहंसः सिद्धयोगी आसीत्। तेन विश्वाय महतीं धरोहरं रूपेण महान् शिष्यः स्वामी विवेकानंद दत्तः, येन समग्रे विश्वे भारतस्य संस्कृतेः प्रचारः प्रसारश्च कृतः, तथा भारतस्य आध्यात्मिकशक्तेः वैश्विकमान्यता स्थापिताऽभूत्।
सन्तसम्मेलनस्य अध्यक्षतां कुर्वन् अखिल भारतीय अखाड़ा परिषद-अध्यक्षः तथा पंचायती श्री महानिर्वाणी अखाड़ा-सचिवः महन्तः रवीन्द्रपुरीमहाराजः अवदत् यत् अस्माकं अखाडस्य परमं गौरवविषयः अस्ति यत् रामकृष्णपरमहंसमहाभागेन अस्माकं अखाडस्य श्रीमहन्त-तोतापुरीमहाराजात् संन्यासदीक्षा गृहीता। अनेन प्रकारेण सः आदि जगद्गुरु शंकराचार्य-प्रणीतायां दशनाम-संन्यास-परम्परायां समाविष्टः, अस्यां परम्परायां च तस्य अतीव उच्चकोटिस्थानम् अस्ति। सः अपि अवदत् यत् रामकृष्णः महान् साधकः अभवत्, यतः सः परमहंसावस्थां प्राप्तवान् तथा समाजाय ऐक्यसन्देशं दत्तवान्।
मुख्यवक्ता स्वामी अव्ययात्मानन्दमहाराजः अवदत् यत् यदा यदा समाजस्य आवश्यकता भवति तदा तदा महापुरुषाः अवतारपुरुषाश्च आगत्य समाजं दिशं प्रददति। एवं रामकृष्णपरमहंसदेवः अपि अवतीर्य स्वकाले समाजाय नूतनां दिशं दत्तवान्, मानवसेवायाः सन्देशं च प्रसारितवान्।
अस्मिन् अवसरे सर्वान् सन्तान् स्वागतं कुर्वन् सेवाश्रमस्य सचिवः स्वामी दयामूर्त्यानन्दमहाराजः अवदत् यत् रामकृष्णपरमहंसः सर्वधर्मान् आचरित्वा एतत् उपदिष्टवान् यत् ईश्वरः एकः अस्ति, तं प्राप्तुं मार्गाः विभिन्नाः सन्ति। अतः सर्वधर्मावलम्बिनः मिलित्वा निवसेयुः, मानवसेवायै च कार्यं कुर्युः।
अस्मिन् अवसरे महामण्डलेश्वरः परमात्मदेवः, महामण्डलेश्वरः स्वामी रामेश्वरानन्दः, महामण्डलेश्वरः स्वामी विज्ञानानन्दः, महामण्डलेश्वरः स्वामी भगवत्स्वरूपः, महामण्डलेश्वरः स्वामी ललितानन्दगिरिः, महामण्डलेश्वरः स्वामी अभयात्मानन्दः, कोठारी राघवेन्द्रदासः च स्वकीयां भावाञ्जलिं समर्पितवन्तः।
हिन्दुस्थान समाचार