लखनऊनगरम्, २८ फरवरीमासः (हि.स.)। भारतीयजनता-पक्षस्य वरिष्ठ-नेता तथा राज्यसभासदस्यः डा.दिनेश: शर्मा अवदत् यत् भारतं विश्वस्य नेतृत्वं करणदिशि वेगेन अग्रसरं वर्तते। आक्रान्तारः देशं लुण्ठितवन्तः, परन्तु भारतस्य संस्कृतिं संस्कारांश्च लुण्ठयितुं न अशक्नुवन्। अद्यतन-काले जात्या न, अपि तु सनातनेन तथा समाजस्य एकतया एव आवश्यकता अस्ति। दीर्घकालानन्तरं समाजः एकत्रित: अभवत्। महाकुम्भः, माघ-मेलापक:, उत्सवाश्च समाजस्य ऐक्यं सुदृढीकृतवन्तः; अधुना तद् ऐक्यं न विखण्डनीयं। गतकेषु केषुचिद् वर्षेषु देशे महत् परिवर्तनं दृष्टम् इति तेन उक्तम्।

सः अखिल-भारतीय-ब्राह्मण-महासभया इन्दिरा-गान्धी-प्रतिष्ठाने शनिवासरे आयोजितं प्रबुद्ध-समागमं सम्बोधितवान्।डा. शर्मा अवदत् यत् भारतस्य संस्कृतिः संस्काराश्च तेन समाज-वर्गेण संरक्षिताः, यः धर्मस्थानानां रक्षण-भावेन सह वेदानां पठन-पाठनं करोति स्म। मुगलाः तथा आङ्ग्लाः भारतस्य समाजं जातिषु विभजितवन्तः, येन सनातनानुयायिनः एकत्र न समायुञ्जीरन्। समाजस्य एकतां भग्नं कर्तुं शिखा-यज्ञोपवित-धारिणः शास्त्र-पाठकाः प्रथमं प्रताडिताः। यः समाज-वर्गः “ब्राह्मण” इति अभिहितः, सः सर्वदा समाजं संयोजयितुं कृतवान्—इति तेन प्रतिपादितम्। विवाह-प्रसङ्गं दृष्टान्तीकृत्य तेन उक्तं यत् तत्रापि सर्वेषां वर्गाणां पृथक्-पृथक् दायित्व-निर्देशेन समाजस्य ऐक्यं साधितम्।

डा.शर्मा पुनरवदत् यत् ब्राह्मणस्य कर्तव्यं परम्पराणां संरक्षणं, सनातनस्य समाजस्य च संयोजनं, देवतानां सम्मान-रक्षणं च अस्ति। देशस्य सांस्कृतिक-गौरवं पुनरागतं वर्तते; एषः सनातन-जागरणस्य कालः अस्ति। महाकुम्भे अस्य दृश्यं विश्वेन दृष्टम्। श्री-राम-जन्मभूमि-मन्दिरस्य, काशी-विश्वनाथ-परिसरस्य, महाकाल-लोकस्य, विन्ध्यवासिनी-माता-मन्दिर-क्षेत्रस्य पुनर्निर्माणं, नैमिषारण्यतः मथुरा-चित्रकूट-धामपर्यन्तं कृतानि विकास-कार्याणि च—एतानि सर्वाणि नवायाः सनातन-संस्कृतेः प्रज्वलनस्य इतिहासं रचितवन्ति।

कार्यक्रम-आयोजकानां सर्व-जाति-जन-सम्मान-आधारित-आयोजन-भावनां सः विशेषतया प्रशंसितवान्।

हिन्दुस्थान समाचार / अंशु गुप्ता