भोपालनगरम्, ०६ फेब्रुवरीमासः (हि.स.)। मध्यप्रदेशस्य सीहोर–जनपदे शनिवासरे राष्ट्रिय–सम्मेलनस्य आयोजनं भविष्यति, यस्मिन् केन्द्रीय–कृषि–मन्त्री शिवराजसिंह–चौहानः तथा मुख्यमन्त्री डॉ.मोहन–यादवः सहभागं करिष्यतः। सीहोर–जनपदस्य अमलाहा–स्थाने स्थिते खाद्य–दलहन–अनुसन्धान–केन्द्रे शनिवासरे, ०७ फेब्रुवरीमासे, दलहन–आत्मनिर्भरता–राष्ट्रियाभियानस्य अन्तर्गतं राष्ट्रिय–परामर्श–तथा रणनीति–सम्मेलनस्य आयोजनं विधास्यते। मध्यप्रदेशस्य किसान–कल्याण–तथा कृषि–विकास–मन्त्री एदलसिंह–कंषाणः शुक्रवासरे सूचितवान् यत् अस्मिन् सम्मेलने उत्पादन–उत्पादकता–सम्बद्धेषु विविधेषु विषयेषु गहनः विचार–विमर्शः भविष्यति। दलहन–क्षेत्रस्य मूल–संवेदनाः, वर्तमान-समस्या: तथा भविष्यस्य सम्भावनाः विषये विस्तृतं चिन्तनं क्रियते। देशस्य प्रमुख–दलहन–उत्पादक–राज्यानां कृषि–मन्त्रिणः, वरिष्ठ–अधिकारिणः, दलहन–अनुसन्धान–सम्बद्धाः वैज्ञानिकाः, शासकीय–बीज–उत्पादक–संस्थाः, दाल–उद्योग–सम्बद्धाः प्रतिनिधयः तथा अन्याः सहयोगी–संस्थाः अस्मिन् सम्मेलने भागं ग्रहीष्यन्ति। अस्मिन् अवसरे केन्द्रीय–मन्त्री चौहानः तथा मुख्यमन्त्री डॉ.यादवः खाद्य–दलहन–अनुसन्धान–केन्द्रस्य अत्याधुनिक–सुविधानां लोकार्पणमपि करिष्यतः।

कृषि–मन्त्री कंषाणः अवदत् यत् सम्मेलने दलहन–उत्पादनस्य सुदृढीकरणं, कृषकाणां आय–वृद्धिः तथा उन्नत–तन्त्रज्ञानस्य माध्यमेन उत्पादकता–वर्धनं विषये विचाराः विनिमेष्यन्ते। एतत् सम्मेलनं दलहन–क्षेत्रे नीति–निर्धारणे तथा अनुसन्धान–क्षेत्रे मील–स्तम्भरूपेण सिद्धं भविष्यति। अस्य सम्मेलनस्य उद्देश्यं कृषकान् प्रति नवीन–अनुसन्धान–परिणामान्, गुणवत्तायुक्त–बीजानि, आधुनिक–कृषि–पद्धति: तथा विपणन–सम्बद्धां सूचनां प्रेषयितुं, येन दलहन–क्षेत्रे आत्मनिर्भरता प्रोत्साहिता भविष्यति। विविध–राज्यानां अनुभव–विनिमयेन राष्ट्रिय–स्तरे दलहन–विकासाय दृढ–रणनीतिः अपि निर्मीयते।

एतेषु राज्येषु कृषि–मन्त्रिणः उपस्थिताः भविष्यन्ति—

ओडिशा–राज्यात् कनकवर्धनसिंह–देवः, पञ्जाब–राज्यात् सरदार–गुरुमीतसिंह–खुडियनः, छत्तीसगढ–राज्यात् रामविचार–नेतामः, बिहार–राज्यात् रामकृपाल–यादवः, गुजरात–राज्यात् रमेशभाई–कटारा, उत्तरप्रदेश–राज्यात् सूर्यप्रताप–साही, हरियाणा–राज्यात् श्यामसिंह–राणा, पश्चिमबङ्गाल–राज्यात् सोवानदेव–चट्टोपाध्यायः।

कार्यक्रमस्य आरम्भः शनिवासरे प्रातः १०:४५ वादने पादप–रोपणेन भविष्यति। केन्द्रीय–कृषि–मन्त्री चौहानः कृषि–क्षेत्रे उन्नत–प्रौद्योगिकीनां तथा दलहनस्य नूतन–प्रजातीनां अवलोकनं करिष्यति, कृषकैः सह संवादं च करिष्यति। सः प्रशासनिक–भवनस्य, कृषक–प्रशिक्षण–केन्द्रस्य तथा पादप–जीनोमिक्स्, ऊतक–संवर्धन, प्रजनन–रोग–विज्ञान–सम्बद्धानां अत्याधुनिक–प्रयोगशालानां उद्घाटनमपि करिष्यति।

तदनन्तरं दलहनस्य उन्नत–बीजैः, उत्पादैः तथा तन्त्रज्ञानैः सम्बद्धायाः प्रदर्शिन्याः अवलोकनानन्तरं “दलहन–आत्मनिर्भरता–राष्ट्रिय–अभियान” विषयकं राष्ट्रिय–परामर्शं आरभ्यते। सम्मेलने “पल्सेस–अभियान–पटलम्” इत्यस्य लोकार्पणं भविष्यति, तथा प्रगतिशील–कृषकेभ्यः उन्नत–प्रजातीनां बीजानां प्रतीकात्मक–वितरणमपि क्रियते।

हिन्दुस्थान समाचार / अंशु गुप्ता