हिसारः, ०९ फरवरीमासः (हि.स.)।राजकीय-महाविद्यालये नलवा इत्यत्र आयोजितस्य सप्तदिवसीय-विशेष-राष्ट्रीय-सेवा-योजना (एनएसएस) शिविरस्य समापन-समारोहः जिला-उच्चतर-शिक्षा-अधिकारी तथा महाविद्यालयस्य प्राचार्या डॉ. कमलेश दुहन इत्यस्य अध्यक्षतायां सम्पन्नः। अस्मिन् विशेष-शिविरे राष्ट्रीय-सेवा-योजनायाः पञ्चाशत् (५०) स्वयंसेवकाः सक्रियतया सहभागितां कृतवन्तः।

शिविरावधौ पर्यावरण-संरक्षणम्, नारी-सशक्तीकरणम्, नशा-निवारणम्, मार्ग-सुरक्षा, नैतिक-मूल्यानि, साइबर-सुरक्षा तथा “बेटी बचाओ–बेटी पढ़ाओ” इत्यादयः महत्त्वपूर्णाः सामाजिक-विषयाः आधारीकृत्य जागरूकता-कार्यक्रमाः आयोजिताः। स्वयंसेवकैः ग्रामे नलवा इत्यत्र जनयात्राभिः, स्वच्छता-अभियानेन, योग- क्रीडा-गतिविधिभिः, डिजिटल-साक्षरतया, वृद्धजनैः सह संवादेन तथा सामाजिक-विषयक-कार्यक्रमैः समाजं प्रति स्वीयं दायित्वं प्रतिपादितम्।

समापन-समारोहं सम्बोधयन्ती प्राचार्या डॉ. कमलेश दुहनः सोमवासरे अवदत् यत् राष्ट्रीय-सेवा-योजनायाः मुख्यः उद्देश्यः विद्यार्थिषु “अहं न, वयम्” इति भावनायाः विकासः अस्ति। सा अवदत् यत् एनएसएस-शिविराणि विद्यार्थिनां चरित्र-निर्माणे, नेतृत्व-क्षमतायां तथा सामाजिक-चेतनायां सुदृढीकरणं कुर्वन्ति, यत् केवलं कक्षा-शिक्षणेन साध्यं न भवति। तया एनएसएस-कार्यक्रम-शिक्षकानां, अधिकरिणां तथा कर्मचारिणां प्रयासाः प्रशंसिताः, स्वयंसेवकान् च जीवनपर्यन्तं सेवा-भावनाम् अनुवर्तितुं प्रेरितवती।

अस्मिन् अवसरे मुख्य-वक्ता-रूपेण ग्राम-नलवा इत्यस्य सरपञ्चः सुशील कौशिकः उपस्थितः आसीत्। सः बालिका-शिक्षायाः महत्त्वं प्रकाशयन् अवदत् यत् शिक्षिताः कन्याः आत्मनिर्भराः भूत्वा समाजं राष्ट्रं च सम्यक् दिशां नयन्ति। एषः सप्तदिवसीयः विशेष-शिविरः एनएसएस-नोडल-अधिकारी प्रो. राजीव कुमारस्य कुशल-मार्गदर्शने सम्पन्नः।

कार्यक्रमे डॉ. मीनाक्षी शर्मा, डॉ. सुनीता, डॉ. नेहा रानी, प्रदीपः, डॉ. राकेशः तथा अन्ये महाविद्यालयस्य कर्मचारी-सदस्याः उपस्थिताः आसन्। समापन-अवसरे स्वयंसेवकैः स्वीय-अनुभवाः साझा-कृताः, समाज-सेवां जीवनस्य अभिन्न-अङ्गं कर्तुम् संकल्पः कृतः, तथा राष्ट्रगानेन सह कार्यक्रमस्य विधिवत् समापनं कृतम्।

हिन्दुस्थान समाचार