नवदिल्ली, १० मार्चमासः (हि.स.)। दिल्ली–राज्यस्य शिक्षामन्त्री आशीष–सूदः अवदत् यत् विकसित–दिल्ली–निर्माणाय सर्वकारस्य उद्योग–क्षेत्रस्य च मध्ये सुदृढ–सहयोगस्य आवश्यकता अस्ति।

सः मङ्गलवासरे नव–दिल्ली–नगरे आयोजिते सीआईआई–दिल्ली–स्टेट–वार्षिक–अधिवेशन–२०२५–२६ तथा व्यवसाय–सम्मेलने भागं गृह्णन् एतत् उक्तवान्। अस्य सम्मेलनस्य आयोजनं कॉन्फेडरेशन–ऑफ–इण्डियन–इण्डस्ट्री (सीआईआई) इत्यनेन कृतम्। अस्मिन् विभिन्न–क्षेत्रेभ्यः उद्योग–प्रतिनिधयः, नीतिनिर्मातारः विशेषज्ञाः सहभागिन: च अभवन्।

सः “दिल्ली २०४७ : विकास–नवाचार–वैश्विक–सहभागितानां राजधानी” इति विषये आयोजितं सत्रं सम्बोधयन् अवदत् यत् गत–केषुचित् वर्षेषु दिल्ली–व्यापार–जगतः व्यापार–वृद्धेः, रोजगार–सृजनस्य नगरस्य अर्थव्यवस्थायां उद्योगानां योगदानस्य च सम्बन्धितान् अनेकान् विषयान् उत्थापितवान्। एतेषु आधारभूत–संरचना, नीतिगत–व्यवस्था तथा भूमेः उपलब्धता इत्यादयः विषयाः अपि अन्तर्भवन्ति।

सः अवदत् यत् दिल्ली–सर्वकार: उद्योग–जगता सह निरन्तर–संवादेन भविष्याय नीतिनिर्माणं कर्तुं तथा उत्तमं व्यावसायिक–परिवेशं निर्मातुं प्रतिबद्ध: अस्ति। डीरिगुलेशन–प्रक्रियया तथा नीतिगत–संशोधनै: दिल्ली–नगरे व्यापार–उद्योगयोः अनुकूलः परिवेशः निर्मीयते। व्यापारिणां, उद्यमिनां उद्योगानां च सहभागितां वर्धयितुं सर्वकार: उद्योग–सङ्घटनैः हितधारकैः च सह निरन्तरं संवादं कुर्वन् अस्ति, यस्य सकारात्मक–परिणामाः अपि दृश्यन्ते।

सूदः अवदत् यत् सर्वकार: शिक्षा–व्यवस्थां उद्योग–आवश्यकतानुसारं कर्तुं प्रयतते। अस्यान्तर्गतं औद्योगिक–प्रशिक्षण–संस्थानानां (आईटीआई) पाठ्यक्रमः आधुनिक–तन्त्रज्ञान–युक्तः क्रियते, येन छात्राः उद्योगानां परिवर्तमाना-आवश्यकतानुसारं कौशल–प्रशिक्षणं प्राप्नुयुः। तेन दिल्ली–यूनां मध्ये उद्यमिता–प्रोत्साहनाय कृतानां प्रयासानां अपि उल्लेखः कृतः।

दिल्ली–सर्वकारेण सम्प्रतिकाले आयोजितेन “स्टार्टअप–युवा–फेस्टिवल” कार्यक्रमेण अनेकानां नवोन्मेष–प्रधानानां स्टार्टअप–विचाराणां आर्थिक–सहायता प्रदत्ता। तथा च सर्वकार: नूतनां इन्क्यूबेशन–नीतिं निर्मातुं कार्यं करोति, यस्याः अन्तर्गतं अग्रिम–पञ्चवर्षेषु प्रायः ३२५ कोटि–रूप्यकाणां निवेशेन २०३५ पर्यन्तं प्रायः ५००० स्टार्टअप–संस्थाः समर्थयितुं योजना अस्ति।

सूदः अवदत् यत् असङ्गठित–सेवा–क्षेत्रे कार्यरत–श्रमिकेभ्यः सामाजिक–सुरक्षां प्रदातुं सर्वकार: विभिन्न–स्तरेषु विचारं करोति, यत् अग्रिम–नीतिगत–उपक्रमेषु अन्तर्भवितुं शक्नोति। सः अवदत् यत् दिल्लीनगरे “ईज़–ऑफ–डूइङ्ग–बिजनेस” सुदृढीकरणाय अनेकानि संशोधनानि क्रियन्ते। तेषु अग्नि–एनओसी–प्रक्रियायाः सरलीकरणम्, श्रम–नियमेषु आतिथ्य–क्षेत्रस्य कतिपय–अनुज्ञा–प्रावधानानां जनहितकारी–परिवर्तनानि च अन्तर्भवन्ति।

अन्ते सः अवदत् यत् सर्वकारस्य, उद्योग–जगतः समाजस्य च मध्ये सुदृढः सहयोगः एव दिल्ली–नगरं विकास–नवाचार–अवसराणां वैश्विक–केन्द्रं कर्तुं महत्त्वपूर्णां भूमिकां निर्वहिष्यति।

हिन्दुस्थान–समाचारः।

हिन्दुस्थान समाचार / अंशु गुप्ता