Enter your Email Address to subscribe to our newsletters
'
जम्मूः, 12 मार्चमासः(हि.स.)।
अनुभवीराजनेता तथा जम्मूकश्मीरराज्यस्य पूर्वमुख्यमन्त्री फारूक अब्दुल्ला बुधवासरस्य रात्रौ अत्र आयोजिते विवाहसमारोहे एकेन व्यक्तिना तस्य हत्याप्रयासः कृतः इति घटनानन्तरं स्वस्य प्रथमप्रतिक्रियायां उक्तवान् यत् “भगवता अहं रक्षितः अस्मि।”
कमलसिंहजामवाल इति नाम्ना परिचितः आक्रमणकारी नगरस्य बहिर्भागे स्थिते ग्रेटर कैलाश नाम्नि क्षेत्रे कार्यक्रमकाले अब्दुल्लां लक्ष्यीकृतवान्। सः सत्तारूढस्य नेशनल कॉन्फ्रेंस दलस्य अध्यक्षः अपि अस्ति। तस्मिन् समये अब्दुल्ला बालबालं रक्षितः, यतः सः कार्यक्रमस्थलात् निर्गच्छन् आसीत्, तस्मिन्नेव समये शस्त्रधारी पृष्ठतः गोलिकाः प्रक्षिप्तवान्।
गुरुवासरे प्रातःकाले अब्दुल्ला उक्तवान् यद् “अहं कुशलः अस्मि तथा भगवता मम रक्षा कृता।” सः तं भयङ्करं क्षणं स्मरन् अवदत् यत् आक्रमणकारी तस्य ग्रीवाया: पृष्ठभागपर्यन्तं आगन्तुं सफलः अभवत्। तेन उक्तं— “अन्तिमक्षणे एनएसजीसहिताः सुरक्षाकर्मिणः तम् आवृत्य निगृहीतवन्तः। तत्क्षणमेव मां मम वाहनम् आरोप्य सुरक्षितरूपेण निष्कासितवन्तः।”
अब्दुल्लायाः उपरि एषः आक्रमणः संवेदनशीलकेन्द्रशासितप्रदेशे सुरक्षाव्यवस्थायाः विषये गम्भीरचिन्तां जनितवान्। एतेषां उच्चपदस्थव्यक्तीनां सुरक्षायाः मानकप्रोटोकॉलानुसारं क्षेत्रं पूर्वमेव शुद्धीकृत्य कठोरप्रवेशनियन्त्रणं स्थापनीयम् भवति। यद्यपि वरिष्ठः अब्दुल्ला सुरक्षादोषस्य विषये वक्तुं न इच्छति, तथापि तस्य पुत्रः तथा जम्मूकश्मीरस्य मुख्यमन्त्री उमर अब्दुल्ला एक्स इत्यस्मिन् माध्यमे स्वचिन्तां व्यक्तवान्।
सः अवदत् “यत् ज्ञातं तावत् एतत् यत् पूर्णभरितपिस्तोलधारी कश्चित् व्यक्ति अत्यन्तसमीपपर्यन्तम् आगत्य गोलिकां प्रक्षेपितुं समर्थः अभवत्। केवलं निकटसुरक्षादलेनैव सा गोली परिवर्तिता तथा हत्याप्रयासः विफलः कृतः।” सः अपि अवदत् यत् अद्य अपि अनेकाः प्रश्नाः अनुत्तरिताः सन्ति, विशेषतः एषः प्रश्नः यत् जेडप्लस एनएसजी सुरक्षा प्राप्तस्य पूर्वमुख्यमन्त्रिणः इत्थं समीपं कश्चित् कथं प्राप्तवान्।
घटनानन्तरं मुख्यमन्त्री जम्मूनगरं प्राप्तवान् तथा प्रत्यक्षं पितुः निवासं गतवान्।
अधुना शीर्षाधिकारिणः जम्मूकश्मीरप्रदेशे केन्द्रसरकारेण सुरक्षा प्राप्तानां सर्वेषां व्यक्तीनां सुरक्षायाः पुनरावलोकनं कुर्वन्ति। सुरक्षायाः अधिकसुदृढीकरणार्थं उपायाः अपि क्रियन्ते, येषु काफिलेषु प्रयुज्यमानानां जैमरयन्त्राणां उन्नयनम् अपि सम्मिलितम् अस्ति।
---------------
हिन्दुस्थान समाचार