भोपालनगरम्, १२ मार्चमासः (हि.स.)। मध्यप्रदेशस्य राजधान्यां भोपालनगरे अद्य गुरुवासरे विश्वसंवादकेन्द्र–मध्यप्रदेशः तथा सतपुड़ा–चलचित्र–समितेः संयुक्ततत्त्वावधानेन राष्ट्रीयस्वयंसेवकसंघस्य (आरएसएस) शताब्दीवर्षयात्रायाः आधारेण निर्मितस्य “शतकम्” नामकस्य चलचित्रस्य विशेषप्रदर्शनम् आयोजितम्। कार्यक्रमः डीडीएक्स–सिनेमा–कोलारः इति स्थले अभवत्, यस्मिन् शताधिकाः श्रोतारः सहभागिनः अभवन्।

अस्मिन् चलचित्रे राष्ट्रीयस्वयंसेवकसंघस्य गतशतवर्षाणां वैचारिकी तथा संगठनात्मकयात्रा प्रस्तूता अस्ति। तत्र संघस्य कार्यविस्तारः, समाजे तस्य योगदानम् तथा राष्ट्रसेवायै समर्पितानां व्यक्तित्वानां निर्माणम् इत्यादिषु विषयेषु प्रकाशः अपि पातितः।

विशेषज्ञाः श्रोतारश्च अनुभवम् अवदन्

कार्यक्रमे पत्रकाराः, शोधार्थिनः, समाजसेविनः, शिक्षाविदः तथा पत्रकारिताविद्यार्थिनः सहभागिनः अभवन्। केचन श्रोतारः स्वपरिवारैः सह चलचित्रं द्रष्टुम् आगतवन्तः। चलचित्रप्रदर्शनानन्तरं स्वविचारान् व्यक्तवन्तः श्रोतारः अवदन् यत् “शतकम्” केवलं चलचित्रं न, अपितु वैचारिकान्दोलनस्य यात्रायाः तथ्यम् अस्ति।

ते अपि उक्तवन्तः यत् संघेन समाजस्य विभिन्नेषु क्षेत्रेषु एतेदृशाः कार्यकर्तारः निर्मिताः सन्ति, ये निःस्वार्थभावेन राष्ट्रस्य समाजस्य च सेवायां निरताः सन्ति। केचन श्रोतारः एतत् व्यापकविचारधारारूपेण अपि अपश्यन्, या समाजस्य विविधेषु पक्षेषु प्रभावं ददाति।

यूनां कृते प्रेरणादायकः अनुभवः

युवानः विद्यार्थिनः च चलचित्रम् प्रेरणादायकम् इति उक्तवन्तः। तेषां मतम् आसीत् यत् अद्यतनस्य ‘जेन-जी’ इति कथ्यमानस्य युववंशस्य कृते एतादृशानां चलचित्राणां दर्शनम् आवश्यकम्। अनेन ते राष्ट्रीयस्वयंसेवकसंघं सम्यक् अवगन्तुं तस्य योगदानं च ज्ञातुं अवसरं प्राप्नुवन्ति।

श्रोतारः एतत् अपि मन्यन्ते स्म यत् चलचित्रदर्शनस्य उद्देश्यं संघेन सह सम्बद्धता न, अपितु तस्य विचारधारां समाजे तस्य भूमिकां च अवगन्तुम् एव भवेत्। कार्यक्रमस्य समापनम् उपस्थितान् सर्वान् श्रोतृन् प्रति आभारप्रदर्शनम् तथा चलचित्रस्य वैचारिकयात्रायाः प्रशंसया सह अभवत्।

हिन्दुस्थान समाचार / अंशु गुप्ता