-पटनायां ‘फिट इंडिया कार्निवल–2026’इत्यस्य आयोजनं, खेल मंत्री श्रेयसी सिंहः युवभ्यः आरोग्यतायाः अददात् संदेशम् पटना, 15 मार्चमासः (हि.स.)। भारतीय क्रीडा प्राधिकरणस्य पटना केन्द्रेण रविवासरे “फिट् इण्डिया कार्निवल–२०२६” इति कार्यक्रमस्य भव्यं सफलं च आयोजनं कृतम्। अस्मिन् कार्यक्रमे बिहारराज्यस्य क्रीडामन्त्री श्रेयसी सिंह मुख्यातिथिरूपेण उपस्थितवती। अस्मिन् अवसरे केन्द्रप्रभारी सोमेश्वर राव चव्हाण तां पुष्पगुच्छेन शालया च सम्मानितवान्। कार्यक्रमं सम्बोधयन्ती क्रीडामन्त्री श्रेयसी सिंह युवान् सामान्यनागरिकान् च स्वदैनिकजीवने स्वास्थ्यसम्बद्धाः क्रियाः समावेशयितुम् आह्वयत्। सा अवदत् यत् स्वस्थस्य सक्रियस्य च जीवनस्य कृते नियमिताः शारीरिकक्रियाः अत्यावश्यकाः सन्ति। तया उक्तं यत् स्वास्थ्याभ्यासः केवलं किञ्चित्कालस्य अभ्यासपर्यन्तं सीमितः न भवेत्, अपितु जीवनशैलायाः एकः आवश्यकः अङ्गः भवितुम् अर्हति। क्रीडामन्त्री अवदत्— “फिट् इण्डिया आन्दोलनं केवलं अभियानं नास्ति, अपितु स्वस्थस्य सशक्तस्य च राष्ट्रस्य निर्माणदिशि जनान्दोलनम् अस्ति। यदि जनाः स्वदैनिकजीवने क्रीडां व्यायामं च समावेशयन्ति, तर्हि स्वास्थ्यं स्वभावरूपेण अभ्यस्तं भवितुम् शक्नोति। एतादृशानि आयोजनानि समाजे स्वास्थ्यजागरूकतां वर्धयितुं तथा युवान् क्रीडासु प्रेरयितुं महत्त्वपूर्णां भूमिकां निर्वहन्ति।” ततः पूर्वं कार्यक्रमस्य आरम्भः उत्साहपूर्णेन जुम्बा सत्रेण अभवत्, यस्मिन् सर्वेषां वयोगतानां जनानां सक्रियः सहभागः अभवत्। अनन्तरं पारम्परिकदीपप्रज्वलनेन कार्निवलस्य औपचारिकम् उद्घाटनं कृतम्। फिट् इण्डिया कार्निवलस्य समये क्रीडकैः ताइक्वाण्डो, वुशु तथा योग इत्यादीनां क्रीडानां उत्कृष्टं प्रदर्शनं कृतम्। विविधक्रीडासङ्घानां पक्षतः मार्गेषु प्रदर्शनसत्राणि अपि आयोजितानि, येषां उद्देश्यः क्रीडानां शारीरिकक्रियाणां च प्रोत्साहनं तथा जनानां तेषु जागरूकता वर्धनं आसीत्। कार्यक्रमस्थले मल्लखम्ब, जिम्नास्टिक, अत्या-पत्या, स्केटिङ्ग, बास्केटबॉल, ताइक्वाण्डो, वुशु, सेपक टकरा, योगासन, जुम्बा तथा लघु व्यायामशाला इत्यादीनां क्रीडानां विविधाः प्रदर्शनी-स्थालिकाः स्थापिताः आसन्। उद्घाटनानन्तरं क्रीडामन्त्री श्रेयसी सिंह सर्वाणि क्रीडास्थालिकानि प्रदर्शनसत्राणि च अवलोक्य क्रीडकैः प्रतिभागिभिः सह संवादं कृत्वा तेषां उत्साहं वर्धितवती। अस्मिन् कार्निवले बहुसंख्यकाः युवानः क्रीडकाः स्वास्थ्यप्रेमिणः च सहभागी अभवन्। अस्य आयोजनस्य मुख्यः उद्देश्यः जनानां मध्ये स्वास्थ्यजागरूकतां वर्धयितुं तथा युवान् क्रीडाक्रियाभिः सह संयोजयितुं आसीत्। ---------------

हिन्दुस्थान समाचार