Enter your Email Address to subscribe to our newsletters
भोपालनगरम्, १७ मार्चमासः (हि.स.)। मध्यप्रदेशस्य पशुपालन–डेयरी-विभागस्य राज्य-मन्त्री (स्वतन्त्र-प्रभारः) लखन–पटेलः मङ्गलवासरे मन्त्रालये विभागीय-अधिकारिभिः सह सभां कृतवान्। तेन एक-अप्रैल-मासे मण्डला-जनपदस्य कान्हारी-कला-ग्रामे राज्यपालस्य मंगुभाई–पटेलस्य गरिमामय-उपस्थितौ आयोज्यमानस्य ‘मुख्यमन्त्री–दुधारु–पशु–प्रदाय–योजना’-अन्तर्गतं पशु-वितरण-कार्यक्रमस्य सज्जायाः समीक्षां कृत्वा आवश्यक-निर्देशाः दत्ताः।
सभायां मन्त्री पटेलः ‘मुख्यमन्त्री–डेयरी–प्लस–योजना’ तथा ‘कामधेनु–योजना’ इत्येतयोः अपि समीक्षां कृतवान्। तेन योजनासु हितग्राही-चयनम्, पशु-वितरणम्, लक्ष्य-पूर्तिः, व्यापक-प्रचार-प्रसारः तथा सतत-निरीक्षणम् इत्यादिषु विशेष-निर्देशाः दत्ताः। ‘मुख्यमन्त्री–डेयरी–प्लस’-योजनायाम् गावः अपि सम्मिलनीयाः इति विचारः अपि तेन दत्तः।
तथा च स्वावलम्बी-गौशालानां कृते LOA-प्रदानेन कार्यारम्भः शीघ्रं क्रियताम्, पशु-प्रदायकर्तॄणां संख्या वर्ध्यताम्, मानकानुसारं पशूनां मूल्य-सीमां निर्दिश्य सूची अन्तर्जाल-रूपेण प्रदर्श्यताम्, येन हितग्राहिभ्यः अधिक-विकल्पाः उपलब्धाः स्युः- इति विषयेषु अपि चर्चा कृता। पशु-मेलापकानां माध्यमेन पशु-चयनस्य विषयः अपि विचारितः।
अन्ते मार्गेषु विचरन्तीनां निराश्रित-पशूनां स्वावलम्बी-गोशालासु स्थापनम् तथा राजमार्गान् निराश्रित-पशु-मुक्तान् कर्तुं उपायाः अपि चर्चिताः। अस्मिन् अवसरे प्रमुख-सचिवः उमाकान्त–उमरावः, संचालकः डॉ.पी.एस.–पटेलेन सह अन्ये अधिकारिणः उपस्थिताः आसन्।
हिन्दुस्थान समाचार / अंशु गुप्ता