अमेठीनगरम्, २३ मार्चमासः (हि.स.)। जनपदस्य सामुदायिक-स्वास्थ्य-केंद्रे सङ्ग्रामपुरे सोमवासरे स्वेच्छया रक्तदान-शिविरस्य आयोजनम् अभवत्। कार्यक्रमस्य शुभारम्भः मुख्य-चिकित्सा-अधिकारी डॉ.अंशुमान-सिंहेन शहीद-ए-आजम-भगतसिंहस्य अन्येषां च वीर-सपूतानां चित्रेषु माल्यार्पणं कृत्वा श्रद्धांजलि-प्रदानेन कृतः। शिविरक्षेत्रे सर्वे जनाः स्वेच्छया रक्तदानं कृत्वा मानव-सेवासु आदर्शं प्रदर्शितवन्तः। रक्तदानं कृत्वा प्रतिभागी मुख्यातिथे: डॉ.अंशुमानसिंहस्य हस्तेन प्रमाणपत्रेण सम्मानितः।

अस्मिन् अवसरे डॉ.अंशुमानसिंहेन उक्तम् यत् देशस्य स्वातन्त्र्याय वीर-सपूता: हास्येन सह स्वप्राणान् समर्पितवन्तः। तेषां बलिदान-दिनस्य अवसरे आयोजितं रक्तदान-शिविरं समाजं प्रति उत्तरदायित्वस्य सेवाया: च प्रतीकम्। स्वेच्छया रक्तदानात् संकलितं रक्तं आवश्यकजनानां, निर्धनानां असहाय-रोगिणाम् च जीवनरक्षणे महत्त्वपूर्णं योगदानं करोति। एतादृशानि आयोजनानि समाजे जागरूकतां वर्धयन्ति, अधिकाः जनाः रक्तदानाय प्रेरिताः भवन्ति। कार्यक्रमे स्वास्थ्य-केंद्रस्य चिकित्सकाः कर्मचारिणः अन्ये गण्यमान्य-नागरिकाः च उपस्थिताः, ये शिविरस्य सफल-सञ्चालनाय योगदानं दत्तवन्तः।

हिन्दुस्थान समाचार / अंशु गुप्ता