कोरबानगरम्, ०७ मार्चमासः (हि.स.)। छत्तीसगढ–राज्य–शासनस्य महत्त्वाकाङ्क्षिणी महतारी–वन्दन–योजना महिलानां आर्थिक–सशक्तीकरणस्य दिशि महत्त्वपूर्ण-प्रयत्नरूपेण सिद्धा भवति। मुख्यमन्त्रिणः विष्णुदेव–सायस्य नेतृत्वे सञ्चाल्यमाना अस्या: योजनाया: माध्यमेन महिलाभ्यः प्रतिमासं आर्थिक–सहायता प्रदीयते, येन तासां जीवनेषु सकारात्मक–परिवर्तनानि दृश्यन्ते। एषा योजना न केवलं महिलाभ्यः आर्थिक–समर्थनं ददाति, अपितु तासां मध्ये आत्मविश्वासस्य आत्मनिर्भरता–भावनायाश्च दृढीकरणं करोति।

कोरबा–जनपदस्य नगरीय–क्षेत्रे पोडीबहार–निवासिनी परमेश्वरी–प्रजापति अपि अस्याः योजनायाः लाभं प्राप्य स्वजीवने नूतनं परिवर्तनम् अनुभवन्ती अस्ति। साधारण–गृहिणी–रूपेण सा स्वपरिवारस्य उत्तरदायित्वानां निर्वहणं कुर्वती आसीत्। परिवारस्य आर्थिक–स्थितिः सामान्यत्वात् बहुशः गार्हस्थ्य–व्ययेषु तथा बालिकानां भविष्य–विषये चिन्ता तस्याः जायते स्म। तादृशे समये यदा तस्यै महतारी–वन्दन–योजनायाः विषये सूचना प्राप्ता तथा तया तस्याः कृते आवेदनं कृतम्, तदा तत् केवलं औपचारिक–प्रक्रिया नाभवत्, अपितु तस्याः जीवने आशाया: आत्मविश्वासस्य च नूतनः अध्यायः आरब्ध:।

योजनायाः अन्तर्गतं तस्यै प्रतिमासं एकसहस्र–रूप्यकाणां सहायता–राशिः प्रत्यक्षं तस्याः धनागारे प्राप्यते। अस्याः राशेः उपयोगं सा गृहस्य दैनिक–व्ययेषु सहयोगं कर्तुं तथा स्वद्वयोः दुहितृणोः उज्ज्वल–भविष्याय संचयं कर्तुं करोति। एतदतिरिक्तं गार्हस्थ्य–आवश्यक–वस्तूनां पूर्तौ तथा बालिकानां अध्ययन–कार्येषु अपि एषा राशि: तस्यै साहाय्यकारी सिद्धा भवति।

सा अवदत् यत् महतारी–वन्दन–योजना तस्यै केवलं आर्थिक–सहायतां न दत्तवती, अपितु तस्याः मनसि आत्मविश्वासम् अपि जागृतवती। अधुना सा पूर्वापेक्षया अधिकं विश्वासं आत्मबलं च अनुभवन्ती अस्ति। तस्याः कथनम् अस्ति यत् एतादृशाभिः योजनाभिः महिलाभ्यः अग्रे गन्तुं अवसरः प्राप्यते तथा ताः स्वपरिवारेण सह समाजस्य विकासे अपि योगदानं दातुं शक्नुवन्ति।

सा उक्तवती यत् शासनस्य अस्य प्रयत्नस्य कारणात् महिलाभ्यः सम्मानस्य आत्मनिर्भरता–आधारस्य च नूतनं बलं प्राप्तम् अस्ति। अधुना लघु–लघु–आवश्यकतानां पूर्त्यर्थं अन्येषां समक्षं हस्तप्रसारणस्य आवश्यकता न भवति। यदि एतादृश्य: योजनाः निरन्तरं सञ्चाल्येरन्, तर्हि समाजे महिलानां स्थितिः अधिका सुदृढा भविष्यति इति अपि तया उक्तम्।

सा जनकल्याण–परियोजनायाः कृते मुख्यमन्त्रिणं विष्णुदेव–सायं प्रति आभारं व्यक्तवती तथा उक्तवती यत् अद्य महिलाः पूर्वात् अपि अधिकया आशया विश्वासेन च अग्रे गच्छन्ति। शासनस्य उद्देश्यं महिलानां उत्थान–सशक्तीकरणयोः प्रति सदैव प्रशंसनीयम् अस्ति, तेन समाजे सकारात्मक–परिवर्तनं दृश्यते।

हिन्दुस्थान-समाचार:/ हरीश: तिवारी

हिन्दुस्थान समाचार / अंशु गुप्ता