आसनसोलनगरम्, ११ अप्रैलमासः (हि.स.)। पश्चिम-बङ्गाल-विधानसभा-निर्वाचनम् २०२६ इत्यस्य पूर्वं राज्ये राजनैतिक-चेष्टा तीव्रा जाता अस्ति। अस्यैव क्रमस्य अन्तर्गतं तृणमूल-काङ्ग्रेस-पक्षस्य अभ्यर्थिनां समर्थनार्थं मुख्यमन्त्री ममता-बनर्जी इत्यस्याः विशाल-जनसभा १२ अप्रैलमासे आसनसोल-स्थिते गोविन्द-नगर-पादकन्दुक-प्राङ्गणे आयोजिता भविष्यति।

सभायाः सज्जताः अन्तिम-चरणे सन्ति। मञ्च-निर्माणं, उपवेशन-व्यवस्था, बैरिकेड-प्रबन्धनं तथा सुरक्षा-व्यवस्था इत्यादीनि कार्याणि शीघ्रतया क्रियमाणानि सन्ति। कार्यक्रमं सुव्यवस्थितं कर्तुं विशेष-क्षेत्रस्य निर्माणमपि क्रियते।

एषा जनसभा न केवलं आसनसोल-उत्तर-विधानसभा-स्थानस्य, अपितु जनपदस्य अन्येषां स्थानानां अभ्यर्थिनां समर्थनार्थमपि आयोजिता अस्ति। कार्यक्रमस्य माध्यमेन जनसमर्थनं सङ्ग्रहीतुं तथा अग्रिम-निर्वाचनाय पक्षस्य स्थितिं सुदृढीकर्तुं प्रयासः क्रियते। कार्यकर्तृषु सामान्य-जनतायां च मुख्यमन्त्रिण्याः आगमनं प्रति विशेषः उत्साहः दृश्यते।

हिन्दुस्थान समाचार / अंशु गुप्ता