सुलतानपुरम्, १४ अप्रैलमासः (हि.स.)। भीमराव-रामजी-अम्बेडकर-महाभागस्य जयन्त्यां भाजपा-दलेन जनपदे १९०० अधिकेषु स्थानेषु कार्यक्रमाः आयोजिताः। संविधान-प्रस्तावनाया: वाचनं कृत्वा सामाजिक-समरसतायाः संकल्पः पुनरुच्चारितः।

भाजपा-जनपदाध्यक्षः सुशील-त्रिपाठी उक्तवान् यत् नरेन्द्र-मोदिनः नेतृत्वे बाबासाहेबस्य स्वप्नानां यथार्थ-रूपेण कार्यान्वयनं जातम्, दलित-वञ्चित-वर्गाणां च वास्तविक-सशक्तीकरणं कृतम्।श्री-त्रिपाठी उक्तवान् यत् पूर्व-सर्वकाराः दलित-समाजं केवलं मत-सङ्ग्रहणस्य साधनरूपेण अपश्यन्, किन्तु भाजपासर्वकारः “सबका साथ, सबका विकास” इति मन्त्रं साकारं कृत्वा योजनानां लाभं समाजस्य अन्तिम-जनपर्यन्तं प्रापितवान्। सः अवदत् यत् नरेन्द्र-मोदी-सर्वकारेण बाबासाहेब-संबद्धानि पञ्च प्रमुख-स्थानानि ‘पञ्चतीर्थ’-रूपेण विकसितानि, येन तस्मै वास्तविक-श्रद्धाञ्जलिः अर्पिता।

भाजपा-जनपद-पत्रकार-प्रमुखः विजय-सिंह-रघुवंशी अवदत् यत् जनपदे १९०० अधिकेषु बूथेषु कार्यकर्तारः उत्साहपूर्वकं भीमराव-रामजी-अम्बेडकर-जयन्तीम् आचरितवन्तः, संविधान-प्रस्तावनाया: वाचनं कृत्वा सामाजिक-समरसतायाः सन्देशं गृहं गृहं प्रापितवन्तः।

अन्येषु कार्यक्रमेषु वक्तारः बाबासाहेबं विश्वस्य ज्ञान-प्रतीकमिति वर्णयन्तः तेषां विचाराणाम् अनुसरणस्य महत्वं प्रतिपादितवन्तः। अस्मिन् अवसरे स्वास्थ्य-शिविराणि, जागरूकता-कार्यक्रमाः, शोभायात्राः च आयोजिताः, येन समग्रं नगरं “जय भीम” इति उद्घोषेण गुंजितम्।

हिन्दुस्थान समाचार / अंशु गुप्ता