भोपालनगरम्, १४ अप्रैलमास: (हि.स.)।मध्यप्रदेशे संविधान-निर्माता बाबा-साहेब-डॉ.भीमराव-अम्बेडकरस्य जयंती उत्साहेन आचर्यते। अस्मिन् अवसर-समये मङ्गलवासरे डॉ.अम्बेडकर-नगर-स्थे महू-नगरे स्थिते तस्य जन्मस्थल-सम्बद्धे भव्य-स्मारके विशालः समागमः आयोज्यते, यस्मिन् मुख्यमंत्रीः डॉ.मोहन-यादवः विशेषरूपेण सम्मिलितः भविष्यति।

जनसम्पर्क-अधिकारी महिपाल-अजयः अवदत् यत् प्रतिवर्षम् इव अस्मिन् वर्षे अपि इन्दौर-जनपदे स्थिते डॉ.अम्बेडकर-नगर- (महू) इत्यस्मिन् तस्य जयंती-समारोहः पूर्णोत्साहेन, उमङ्गेन, श्रद्धया च आचर्यते। अस्मिन् आयोजन-समये श्रद्धालूनां आगमन-परम्परा निरन्तरं प्रवर्तते। आगत-श्रद्धालवः अतिथिवत् ससम्मानं सेविताः भवन्ति। तेषां कृते आवास-भोजन-शीतल-जलादीनां विशेष-व्यवस्था कृता अस्ति। जन्मस्थले स्थिते भव्य-स्मारके विशेष-सज्जा अपि कृता।

तेन उक्तं यत् अत्र जयंती-उत्सवे मध्यप्रदेशात् अन्य-प्रदेशेभ्यः च बहुसङ्ख्यकाः श्रद्धालवः आगच्छन्ति। आगमन-प्रक्रिया १२ अप्रैल-सायं एव प्रारब्धा। श्रद्धालूनां भोजन-व्यवस्था स्वर्ग-मन्दिर-परिसरे कृता अस्ति। भिक्षुकानां भोजन-व्यवस्था माहेश्वरी-विद्यालये कृता, तेषां निवास-व्यवस्था अपि तत्रैव कृता। श्रद्धालूनां सुविधार्थं पर्याप्त-सङ्ख्यकाः अस्थायी-शौचालयाः निर्मिताः सन्ति तथा पेयजल-व्यवस्थायै विविध-स्थानेषु पयः-जल-पानकूपाः (प्याऊ) स्थापिताः।

अम्बेडकर-जयंती-समये आगच्छतां श्रद्धालूनां निवासार्थं धर्मशालासु, केन्ट-बोर्ड-हायर-सेकेण्डरी-विद्यालये तथा केन्ट-बोर्ड-कन्या-विद्यालये व्यवस्था कृता अस्ति। तदतिरिक्तं त्रयः विशालाः डोमाः अपि निवासार्थं निर्मिताः सन्ति।

समग्र-व्यवस्थायै कार्यक्रम-स्थलानि सप्त-सेक्टरेषु विभक्तानि। एते सेक्टराः महेश्वरी-विद्यालयः महू, डॉ.अम्बेडकर-जन्मस्थली, केन्ट-प्राथमिक-विद्यालयः, स्वर्ग-मन्दिर-परिसरः, रेल्वे-स्थानकात् सप्त-मार्गः, केन्ट-बोर्ड-कन्या-विद्यालयः तथा उत्कृष्ट-विद्यालयः महू इत्यत्र स्थापिताः सन्ति। एतेषु सप्त-सेक्टरेषु दल-निर्माणं कृत्वा सर्वविभागानां कर्मिणः नियुक्ताः सन्ति। आगत-श्रद्धालूनां सुविधा-हेतोः मराठी-भाषिणः शिक्षकाः अपि नियुक्ताः सन्ति। कार्यक्रम-व्यवस्थायै त्रिषु स्थानेषु नियन्त्रण-कक्षाः (कण्ट्रोल-रूम) स्थापिताः—तहसील-परिसरः महू, अम्बेडकर-जन्मस्थली-स्मारकम्, स्वर्ग-मन्दिर-परिसरः च।

महू-नगरस्य जयंती-समारोह-समये षट्-स्थानेषु आपात-चिकित्सा-व्यवस्था कृता अस्ति। स्वास्थ्य-विभागेन चिकित्सक-दलानि नियुक्तानि। कार्यक्रम-समये स्वच्छता-व्यवस्थायै इन्दौर-नगर-निगमस्य स्थानीय-निकायानां च कर्मचारीवर्गः नियुक्तः अस्ति। अग्निशमन-व्यवस्था अपि सुनिश्चिता कृता।

हिन्दुस्थान समाचार / अंशु गुप्ता