Enter your Email Address to subscribe to our newsletters
जम्मूः, 16 अप्रैलमासः (हि.स.)। एनआईटी श्रीनगरे “नेशनल एकेडमी ऑफ साइंसेज, इण्डिया (एनएएसआई)” चण्डीगढ़-विस्तारित-क्षेत्र-अध्यायेन, एनआईटी श्रीनगरस्य भौतिकी-विभागेन तथा “सोसाइटी फॉर प्रमोशन ऑफ साइंस एण्ड टेक्नोलॉजी इन इण्डिया” इत्येतयोः संयुक्ततत्त्वावधानेन विशेष-व्याख्यान-शृङ्खलायाः आयोजनम् अभवत्। अस्मिन् कार्यक्रमे घाटीप्रदेशस्य विभिन्नसंस्थाभ्यः प्रायः १४० छात्राः, शोधार्थिनः, अध्यापकाः च उत्साहेन सहभागित्वं कृतवन्तः। कार्यक्रमस्य उद्देश्यः युवानां वैज्ञानिकजिज्ञासां प्रोत्साहयितुं तथा तान् शोधाधारित-व्यवसायदिशि प्रेरयितुम् आसीत्।
कार्यक्रमस्य आरम्भः भौतिकीविभागाध्यक्षेन प्रो. प्रिन्स अहमद गनई इत्यस्य स्वागतभाषणेन अभवत्। तेन उक्तं यत् एतादृशाः शैक्षणिककार्यक्रमाः छात्राणां मूलभूतज्ञानस्य उन्नतशोधस्य च मध्ये विद्यमानां दूरीं न्यूनीकर्तुं सहायकाः भवन्ति।
प्रथमं व्याख्यानं प्रो. रविन्द्रकुमार कोहली इत्यनेन “शोधः व्यवसायरूपेण किमर्थं कथं च स्वीकरणीयः” इति विषये प्रस्तुतम्। तेन भारते शोधस्य विशालाः सम्भावनाः प्रकाश्य छात्राः स्वीयां जिज्ञासां राष्ट्रियवैश्विकआवश्यकताभिः सह संयोजयितुं प्रेरिताः।
द्वितीयं व्याख्यानं प्रो. के.के. भसीन इत्यनेन “रसायनशास्त्रस्य रोचकाः पक्षाः” इति विषये प्रस्तुतम्। तेन उक्तं यत् रसायनशास्त्रं अस्माकं दैनन्दिनजीवने महत्त्वपूर्णां भूमिकां निर्वहति तथा जलवायुपरिवर्तनम्, आरोग्यसेवाः, सततविकासः इत्यादीनां वैश्विकसमस्याः समाधानाय केन्द्रीयां भूमिकां वहति।
कार्यक्रमे निदेशकः प्रो. बिनोदकुमार कनौजिया एतस्य उपक्रमस्य प्रशंसां कृत्वा उक्तवान् यत् एतादृशाः संवादाः छात्रेषु नवोन्मेषं वैज्ञानिकचिन्तनं च विकसितुं सहायकाः भवन्ति। रजिस्ट्रारः प्रो. अतिकुर रहमान अपि एतत् छात्राणां कृते प्रेरणादायकमञ्चं इति उक्तवान्।
अस्मिन् अवसरः कश्मीरविश्वविद्यालयस्य प्रो. जफर अहमद रेशी तथा एनआईटी श्रीनगरस्य रसायनविभागस्य प्रो. काउसर मजीद अपि उपस्थितौ आस्ताम्। कार्यक्रमसमन्वयकः डॉ. विजयकुमारः “हाइड्रोजेल माध्यमेन सततविकासः” इति विषये व्याख्यानं दत्त्वा शोधाधारितचिन्तनस्य प्रोत्साहने बलं दत्तवान्।
कार्यक्रमस्य अन्ते सहभागिनः सम्मानिताः तथा आयोजकैः सर्वेभ्यः वक्तृभ्यः धन्यवादाः व्यक्ताः। एषा व्याख्यानशृङ्खला छात्राणां कृते ज्ञानवर्धिनी प्रेरणादायिनी च अभवत्।
हिन्दुस्थान समाचार