पटना-नगरम्, १७ अप्रैलमासः (हि.स.)। मुख्यमन्त्री सम्राट-चौधरी अद्य ‘नारी-शक्ति-वन्दन-अभियानस्य’ अन्तर्गतं आयोजिते ‘नारी-शक्ति फॉर विकसित-भारत रन’ कार्यक्रमे सहभागी अभवत्।

मुख्यमन्त्री जेपी-गङ्गा-पथस्थिते दीघा-गोलम्बर-स्थले आयोजितेऽस्मिन् कार्यक्रमे उपस्थिताभ्यः महिलाभ्यः हरित-ध्वजं दर्शयित्वा ताः प्रेषितवान्। ‘नारी-शक्ति-वन्दन-अभियानस्य’ अन्तर्गतं प्रवर्तमाने हस्ताक्षर-अभियानेऽपि सः स्व-हस्ताक्षरं कृत्वा स्व-उपस्थितिं दत्तवान्। मुख्यमन्त्रिणः स्वागतं विधायकया श्रेयसी-सिंह-इत्यनया पुष्प-गुच्छेन अङ्गवस्त्रेण च कृतम्। कार्यक्रमे सहभागीभिः सर्वाभिः महिलाभिः हस्त-चालनपूर्वकं मुख्यमन्त्रिणः अभिनन्दनं कृतम्।

कार्यक्रमं सम्बोधयन् मुख्यमन्त्री ‘नारी-शक्ति फॉर विकसित-भारत रन’ इत्यस्य आयोजकेभ्यः अभिनन्दनं शुभाशंसाश्च अदात्। सः अवदत्— “एषः नारी-शक्तेः कार्यक्रमः अस्ति। अद्यतनः दिवसः ऐतिहासिकः भविष्यति। स्वातन्त्र्योत्तर-कालात् अनन्तरं यदि एषः विधेयकः लोकसभायां पारितः भवति, तर्हि अद्यतनः (१७ अप्रैल) दिवसः अस्य देशस्य महिलानां कृते क्रान्तिकारी दिवसः भविष्यति।” सः अपि उक्तवान् यत् अस्य विधेयकस्य पारिते सति लोकसभायाः आसन-संख्या ५४३ तः वर्धमानाः ८१६ भविष्यन्ति, तेषु एक-तृतीयांशः भागः केवलं महिलाभ्यः आरक्षितः भविष्यति। एतेन महिलाः संसदे स्व-स्वरं सशक्ततया प्रस्तोतुं शक्नुवन्ति, अपि च राष्ट्र-निर्माणे प्रमुखां भूमिकां निर्वहिष्यन्ति।

मुख्यमन्त्री अवदत् यत् अद्य नारी-शक्तिः अग्रे प्रसरति। बिहार-राज्ये नीतीशकुमारेण पञ्चायती-राज-संस्थासु नगर-निकायेषु च महिलाभ्यः पञ्चाशत्-प्रतिशत-आरक्षणं प्रदत्तम्, येन महिलानां सशक्तिकरणं जातम् अस्ति, ताः आत्मनिर्भराः भवन्ति। नरेन्द्रमोदी अपि एतादृशं निर्धारणं कृतवान् यत् देशस्य लोकसभायां विधानसभासु च एक-तृतीयांश-आसनानि महिलाभ्यः आरक्षितानि भविष्यन्ति। अस्य निर्णयस्य सर्वे बिहार-निवासिनः एकतया स्वागतं कुर्वन्तु इति सः आह।

अस्मिन् अवसरे विधायकाः श्रेयसी-सिंह, रमा-निषाद, संगीता-कुमारी, पटना-नगर-निगमस्य महापौरा सीता-साहू, जनपदाधिकारी डॉ.त्यागराजन-एस.एम., वरीय-पुलिस-अधीक्षकः कार्तिकेय-के-शर्मा इत्यादयः अन्ये च गणमान्याः व्यक्तयः बहवः महिलाश्च उपस्थिताः आसन्।

हिन्दुस्थान समाचार / अंशु गुप्ता