Enter your Email Address to subscribe to our newsletters
चित्तौड़गढ़म्, 18 अप्रैलमासः (हि.स.)। भाजपादलस्य पूर्वप्रदेशाध्यक्षः चित्तौड़गढ-सांसदश्च सीपी जोशी महोदयः लोकसभायां महिलाआरक्षणसम्बद्धे विषये काङ्ग्रेस-विपक्षीदलानां च उपरि तीक्ष्णां प्रतिक्रियाम् व्यक्तयन् अवदत् यत् काङ्ग्रेस-दलस्य रीतिः, नीतिः, मुखं च सर्वदा महिलाविरोधि एव अभवत्। सः उक्तवान् यत् यदा देशे महिलानां सशक्तिकरणाय ऐतिहासिकपदक्षेपस्य अवसरः प्राप्तः, तदा काङ्ग्रेस-विपक्षीदलैः तस्य समर्थनं न कृत्वा देशस्य प्रायः ५० प्रतिशतं महिलाजनसंख्यायाः आकाङ्क्षाभिः सह अन्यायः कृतः।
सांसदः सीपी जोशी महोदयः शुक्रवासरे विलम्बरात्रौ वक्तव्यं निर्गत्य अवदत् यत् केन्द्रसर्वकारेण आनीतः 'नारी शक्ति वंदन अधिनियमः' देशस्य महिलाभ्यः राजनीतिषु समानसहभागितां प्रदातुं दिशि एकः ऐतिहासिकः दूरगामी च निर्णयः वर्तते। अस्य नियमस्य माध्यमेन संसदि विधानसभासु च महिलाभ्यः ३३ प्रतिशतं (३३%) आरक्षणं प्रदातुं प्रावधानं कृतं, येन देशस्य महिलाः निर्णयप्रक्रियासु अधिकां सक्रियां भूमिकां निर्वोढुं शक्नुयुः राष्ट्रनिर्माणं च सुदृढं कर्तुं शक्नुयुः। सः अवदत् यत् प्रधानमन्त्रिणः नरेन्द्र मोदिनः नेतृत्वे केन्द्रसर्वकारेण महिलानां सम्मान-सुरक्षा-सशक्तिकरणेभ्यः अनेके ऐतिहासिकाः निर्णयाः स्वीकृताः। अद्य देशस्य महिलाः प्रत्येकस्मिन् क्षेत्रे अग्रे सरन्ति, सर्वकारस्य नीतीनां लाभश्च ताभ्यः साक्षात् प्राप्यते। ईदृशे समये महिलासशक्तिकरणसम्बद्धस्य महत्त्वपूर्णविधेयकस्य विरोधः काङ्ग्रेस-विपक्षयोः सङ्कुचितमानसिकतां दर्शयति। सांसदः सीपी जोशी उक्तवान् यत् काङ्ग्रेस-दलेन सर्वदा महिलाधिकाराणां विषये केवलं राजनैतिकप्रलापः कृतः, परं यदा वास्तविकनिर्णयस्य समयः आगतः तदा तैः विकासस्य अस्याः ऐतिहासिकपहलयाः विरोधः कृतः। अनेन स्पष्टं भवति यत् काङ्ग्रेसस्य वास्तविकं मुखं महिलाविरोधि अस्ति, सा च महिलानां सशक्तिकरणं प्रति गम्भीरा नास्ति।
सांसदः सीपी जोशी महोदयः राजस्थानस्य पूर्वतनकाङ्ग्रेससर्वकारस्य समये महिलानां स्थितेः विधिव्यवस्थायाश्च उल्लेखं कुर्वन् अवदत् यत् काङ्ग्रेससर्वकारस्य शासने कन्याः असुरक्षिताः अभवन्। राजस्थानं महिलानां विरुद्धम् अपराधे निरन्तरं उच्चराज्येषु अभवत्। अलवर-जोधपुर-भीलवाड़ा-उदयपुरक्षेत्रेषु घटिताभिः घटनाभिः प्रदेशः लज्जितः जातः। प्रत्येकं वारं सर्वकारेण केवलम् अन्वेषणस्य वचनानि दत्तानि, अपराधिनः च निर्भयाः अभवन्। महिलासुरक्षायाः नाम्ना घोषणाः तु बह्व्यः अभवन्, परं 'निर्भया-कोषस्य' उपयोगः, महिला-गश्ती-दलम्, 'सीसीटीव्ही' यन्त्राणि च - धरातले कार्याणि अपूर्णानि एव आसन्। निर्वाचनात् पूर्वं प्रियंका गान्धी महोदयया 'लड़की हूँ लड़ सकती हूँ' (पुत्री अस्मि, योद्धुं शक्नोमि) इति उद्घोषः दत्तः, परं राजस्थानस्य पुत्रीणां कृते सः उद्घोषः कुत्र गतः?
सांसदः सीपी जोशी महोदयः अवदत् यत् देशस्य महिलाः अद्य जागरूकाः सन्ति, ताः च सम्यक् जानन्ति यत् कः तासाम् अधिकाराणां सम्मानस्य च कृते कार्यं करोति। सः विश्वासं प्रकटितवान् यत् आगामिसमये जनतायाः न्यायालये काङ्ग्रेस-विपक्षीदलेभ्यः अस्य प्रत्युत्तरं निश्चितं प्राप्स्यते। जोशी महोदयः उक्तवान् यत् भाजपा-सर्वकारः महिलाभ्यः समानमवसरं प्रदातुं, तासाम् सुरक्षां सुनिश्चेतुं, ताः आत्मनिर्भरं कर्तुं च निरन्तरं कार्यं करोति। 'नारी शक्ति वंदन अधिनियमस्य' माध्यमेन देशस्य राजनीतिषु महिलानां सहभागिता नेतृत्वक्षमता च नवीनां दिशां प्राप्स्यति, या भारतस्य उज्ज्वलभविष्याय सुदृढा आधारशिला सिद्धा भविष्यति।
---------------
हिन्दुस्थान समाचार