Enter your Email Address to subscribe to our newsletters
जयपुरम्, 24 अप्रैलमासः (हि.स.)।
विश्वपुस्तकदिवसस्य अवसरे अखिलभारतीयसाहित्यपरिषदः जयपुरविभागेन बंकिमचन्द्रचट्टोपाध्यायस्य अमरकृतौ “आनन्दमठ” इति विषये परिचर्चायाः आयोजनं कृतम्। कॉन्स्टिट्यूशनक्लब जयपुरस्य मन्थनसभागारे आयोजितायां अस्यां परिचर्चायां प्रदेशस्य विभिन्नस्थानभ्यः आगताः शिक्षाविदः पत्रकाराः रचनाकाराः च बहुसंख्यया समागता आसन्।
अखिलभारतीयसाहित्यपरिषदः प्रदेशमहामन्त्री डॉ केशवशर्मा अवदत् यत् अस्मिन् कार्यक्रमे हरिदेवजोशीपत्रकारिताविश्वविद्यालय जयपुरस्य कुलगुरुः प्रो नन्दकिशोरपाण्डेयः, राजस्थानसाहित्यअकादम्याः पूर्वाध्यक्षः डॉ इन्दुशेखरतत्पुरुषः, शिक्षाविद् डॉ जितेन्द्रकुमारसिंहः च “आनन्दमठ” उपन्यासस्य विविधपक्षेषु स्वविचारान् व्यक्तवन्तः।
कार्यक्रमस्य प्रारम्भः मातृभारत्याः चित्रे पुष्पार्पणेन अभवत्। ततः अनन्तरं रविपारीकेन परिषद्गीतं प्रस्तुतम्।
डॉ जितेन्द्रकुमारसिंहः “आनन्दमठ” उपन्यासे सामाजिकयथार्थविषये भाषमाणः अवदत् यत् अस्मिन् उपन्यासे बंगप्रदेशस्य भीषणदुर्भिक्षस्य वर्णनम् अस्ति, यत्र तत्कालीनक्रूरशासकस्य मीरजाफरस्य अत्याचारैः उत्पन्नस्य व्यापकस्य संन्यासिआन्दोलनस्य पृष्ठभूमिः सजीवत्वेन चित्रिता अस्ति। अस्मिन् जातिभेदं विस्मृत्य मातृभूमेः रक्षणार्थं सर्वे संन्यासिनः संयुक्ततया युध्यन्ते स्म।
डॉ इन्दुशेखरतत्पुरुषः राष्ट्रीयचेतनायाः विषये विचारान् प्रकटयन् अवदत् यत् अस्यां कृतौ वर्णितं “सन्तानधर्म” महाव्रतं तथा संन्यासिआन्दोलनस्य विजयस्य अनन्तरं निर्मितः शासनतन्त्रः प्रजातान्त्रिकराज्यस्य संकल्पनायाः प्रेरणाम् अदात्।
प्रो नन्दकिशोरपाण्डेयः संन्यासिविद्रोहस्य तथा “वन्दे मातरम्” इत्यस्य ऐतिहासिकसन्दर्भे विचारान् प्रकटयन् अवदत् यत् अस्मिन् आन्दोलनम् अन्तर्गतं स्त्रीभ्यः अपि शस्त्रसञ्चालनस्य शिक्षां दीयते स्म, येन मातृशक्तेः सक्रिययोगदानं स्पष्टं भवति। अस्मिन् वर्णितः वैष्णवधर्मः हिन्दूमुस्लिमसम्प्रदायभेदरूपेण न दृष्टव्यः, अपितु राष्ट्रैक्याय कृतस्य संघर्षस्य दृष्ट्या अवलोकनीयः।
मुख्यवक्तॄणां व्याख्यानानन्तरं सत्रं मुक्तसंवादाय उद्घाटितम्, यस्मिन् उपस्थितैः श्रोतृभिः “आनन्दमठ” उपन्याससम्बद्धाः बहवः प्रश्नाः पृष्टाः, तेषां समाधानं आमन्त्रितवक्तृभिः कृतम्।
---------------
हिन्दुस्थान समाचार