वाशिंग्टन/नवदिल्लीनगरम्, २४ अप्रैलमासः (हि.स.)। राष्ट्रिय-स्वयंसेवक-संघस्य सरकार्यवाहः दत्तात्रेय-होसबाले उक्तवान् यत् पश्चिम-एशिया-प्रदेशे प्रवर्तमाने युद्ध-परिस्थितौ वयं भारत-सर्वकारस्य नीति-प्रतिक्रिया-चिन्तनस्य च पूर्णतया समर्थनं कुर्मः। अस्माकं पृथक् काचित् अभिप्रायः नास्ति। सः प्रधानमन्त्रिणः मोदी-महोदयस्य विषये उक्तवान् यत् अस्माकं तेषु गर्वः अस्ति, ते अपि अस्माकं संस्थया सह सम्बद्धत्वे गर्वं अनुभवति।

वाशिंग्टन (डी.सी.)-नगरस्य प्रसिद्धे हड्सन-इन्स्टिट्यूट् इत्यस्य अधीनतया आयोजितायां चर्चायां वरिष्ठ-पत्रकारेण ‘द वॉल स्ट्रीट जर्नल’ इत्यस्य स्तम्भकारेण वाल्टर-रसेल-मीद् सह संवादे भारतीय-जनता-पक्षस्य सर्वकारः तथा संघः इत्येतैः सम्बद्धानां प्रश्नानां उत्तरं दत्वा सः एतत् अवदत्। सः अपि उक्तवान् यत् १९८० वर्षे भारतीय-जनता-पक्ष-स्थापनातः आरभ्य तस्य नेतारः संगठनकर्तारश्च अस्माभिः सह सम्बद्धाः सन्ति। संघ-विचारेण प्रेरितानि अद्य चत्वारिंशत्-अधिकानि संघटनानि राष्ट्रव्यापि-जालेन युक्तानि सन्ति।

अमेरिका-देशस्थित-भारतीय-प्रवासीजनानां प्रश्नानां उत्तरं दत्त्वा सः उक्तवान् यत् एतत् तेषां दायित्वं यत् ते स्वदेशे (अमेरिका-देशे) नागरिक-कर्तव्यपालनं कुर्वन्तः अपि स्वस्य सांस्कृतिक-देशस्य गौरवं वर्धयन्ति।

अन्यस्मिन् प्रश्ने सः स्वीकृतवान् यत् न केवलं अमेरिकादेशे अपि तु भारतेऽपि अस्माकं संघटनस्य विषये बहवः भ्रान्तयः सन्ति। अस्माकं शताब्दी-वर्षे वयं “पञ्च-परिवर्तन”-कार्यक्रमान् जनं जनं प्रति नयामः। एषः विचारः न केवलं भारतस्य, अपि तु सम्पूर्ण-विश्वस्य कृते ग्राह्यः अस्ति। भारतस्य दर्शनं समग्रं विश्वं एकं कुटुम्बं मन्यते—एषा आध्यात्मिकी विचारधारा अस्माकं सांस्कृतिक-मूल्येषु निहिता अस्ति।

अमेरिका-प्रवासे स्थितः सः उक्तवान् यत् यदा वयं स्वस्य शतवर्षीयां यात्रां पश्यामः, तदा ज्ञायते यत् अस्माकं शक्तिः निरन्तरं वर्धिता, किन्तु अस्मासु अहंकारः न जायते, अपि तु विनम्रता वर्धते। अस्माकं चिन्तनं दृढं भवति यत् वयं सत्यम् मानवतायाः सेवायै निरन्तरं कार्यं कुर्मः। शतवर्षपूर्वं कतिचिद्भिः बालकैः सह आरब्धः संघः अद्य दैनन्दिन-शाखा-पद्धत्याः बलात् विश्वस्य महत्तमं संघटनम् अभवत्।

स्वयंसेवक-शब्दस्य विषये सः उक्तवान् यत् अन्येषु संघटनेषु ‘वालिन्टियर्’ केवलं किञ्चित् कालं कार्यं कुर्वन्ति, यत्र किञ्चित् पारितोषिकं वा यशः वा लभ्यते; किन्तु संघस्य स्वयंसेवकाः तु निःस्वार्थ-सेवा-भावेन प्रेरिताः भवन्ति—एषा जीवन-शैली अस्ति।

वाल्टर-रसेल-मीदेन कृतस्य प्रश्नस्य उत्तरे सः उक्तवान् यत् अमेरिकादेशे न केवलं संघस्य विषये, अपि तु भारतस्य विषयेऽपि कतिपयाः भ्रान्तयः सन्ति। केचन अद्यापि भारतं जनसंख्या, संस्कृतिः, सामाजिक-व्यवहारादिभिः दूषितं देशं मन्यन्ते, किन्तु भारतस्य दर्शनं समग्रं विश्वं एकं परिवारं इति महान् विचारं प्रददाति। अद्य भारतदेशः स्वसंस्कृत्या सह आधुनिक-विकास-पथे गच्छन् विश्वस्य चतुर्थी बृहत् अर्थव्यवस्था अभवत्, चन्द्रं प्रति अपि गमनं कृतवान्।

सः अवदत् यत् भारतस्य विषये, अल्पसंख्यकानां विषये, पार्श्व-देशैः सह सम्बन्धेषु, वैश्विक-भूमिकायां च—अस्माकं मतं स्पष्टम् अस्ति यत् निरन्तर-संवादेन जन-जनयोः सम्बन्धैः च सर्वाः भ्रान्तयः निवर्तन्ते, समस्याः नश्यन्ति, सद्भावस्य वातावरणं च निर्मीयते।

हिन्दुस्थान समाचार / अंशु गुप्ता