बीकानेर-नगरम्, २५ अप्रैलमासः (हि.स.)। स्वामी-केशवानन्द-राजस्थान-कृषि-विश्वविद्यालयस्य अध्यापन-कर्मचारिणां समीक्षा-प्रतिवेदनं वेतन-वृद्ध्या (इन्क्रीमेंट्) सह संयोज्यते। शनिवासरे आयोजितायां समीक्षा-सभायां कुलगुरुः डॉ.राजेन्द्र-बाबू-दुबे उक्तवान् यत् मई-मासे कर्मचारीभिः प्रस्तुतीकरणं प्रदातव्यं, यस्य समीक्षाया: आधारेण वैज्ञानिकानां क्षमतानां उत्तमः उपयोगः कर्तुं शक्यते।

तेन सर्वेषां विभागानां प्रति निर्देशाः दत्ताः यत् मानव-संसाधनानां पूर्ण-उपयोगाय समयबद्धतया गम्भीरतया च कार्यं क्रियताम्। महाविद्यालयानां अध्यापन-कर्मचारिणां व्याख्यान-कार्यक्रमः सोमवासरपर्यन्तं प्रदातव्यः इति समयः निर्धारितः। छात्रहिताय आवश्यकतानुसारं अतिथि-अध्यापकानां नियोजनम् अपि कर्तव्यम् इति उक्तम्। यूजी-तथा पीजी-पाठ्यक्रमयोः प्रायोगिक-पुस्तिकाः निर्मातुं तथा सर्वेषां कर्मचारिणां कृते बायोमेट्रिक-उपस्थितिः अनिवार्या भविष्यति इति निर्देशाः अपि दत्ताः।

वित्त-नियन्त्रकः भैरूरत्न-छंगाणी उक्तवान् यत् वित्त-समितेः अग्रिम-सभां दृष्ट्वा सर्वे विभागाः स्व-स्व-वित्त-प्रस्तावान् समये प्रेषयन्तु, सर्वासां योजनानां उपयोगिता-प्रमाणपत्राणि (यूसी) च समर्पयन्तु, तथा प्रतिमासं धनागार-समायोजन-विवरणं (रिकन्सिलिएशन-स्टेटमेंट्) प्रस्तुवन्तु। अनुपयोगी-सामग्रीणां नीलाम्यर्थं प्रस्तावाः अपि प्रेषणीयाः। सर्वेषां विभागानां लेखाः ‘ऑटो-स्वीप्’ स्थितौ स्युः, येन विश्वविद्यालयस्य राजस्व-हानिः न भवेत्।

कुलगुरुणा निर्देशितं यत् निवृत्तेः पूर्वं षड्मासात् पूर्वमेव कर्मचारिणां पेंशन-सम्बद्धाः कागदपत्राणि सज्जीकृत्य सर्वा प्रक्रिया पूर्णा क्रियेत, येन समये पेंशन-प्रदानं सम्भवेत्। आवश्यकतायां प्रोविजनल-पेंशनस्य अनुमोदनम् अपि दातव्यम्।

तेन उक्तं यत् निविदा-प्रक्रियायां पारदर्शिता अनिवार्या, नियमपालनं च सुनिश्चितं क्रियताम्। विश्वविद्यालयस्य आय-वृद्धये विभागैः वित्त-समितेः प्रति प्रस्तावाः प्रेषणीयाः। कृषि-विज्ञान-केन्द्रेषु बीज-उत्पादन-प्रशिक्षणस्य आयोजनं तथा कृषक-भागीदारी-वृद्ध्यर्थं विभागीय-समन्वयस्य सुदृढीकरणं कर्तव्यम् इति अपि निर्देशाः दत्ताः।अस्यां सभायां सर्वे डीन-निदेशकाः उपस्थिताः आसन्।

हिन्दुस्थान समाचार / अंशु गुप्ता