कोलकाता-नगरम्, २५ अप्रैलमासः (हि.स.)। असम-राज्यस्य मुख्यमन्त्री डॉ.हिमन्त-बिस्व-सरमा शनिवासरे उक्तवान् यत् पश्चिमबङ्ग-विधानसभा-निर्वाचनं केवलं एकस्य राज्यस्य निर्वाचनं नास्ति, अपि तु सम्पूर्ण-देशेन सह सम्बद्धः विषयः अस्ति। तेन आरोपः कृतः यत् बाङ्ग्लादेशीय-अवैधप्रवेशकानां कारणेन राज्यस्य जनसंख्या-संरचना परिवर्तमाना अस्ति, अस्य प्रभावः च समीपवर्ती-राज्येषु अपि दृश्यते।

कोलकाता-नगरे आयोजिते संवाददाता-सम्मेलने सम्बोधयन् सः उक्तवान् यत् असम-राज्ये भारतीय-जनता-पक्षः (भाजपा) १२६ आसनेषु १०० अधिक-आसनानि जेष्यति। सः अपि अवदत् यत् पश्चिमबङ्गे प्रथम-चरणस्य १५२ आसनेषु ११० आसनेषु पक्षः विजयम् अधिगमिष्यति।सः उक्तवान् यत् पश्चिमबङ्गे भाजपा २०० अधिक-आसनानि अपि प्राप्तुं शक्नोति। तस्य अनुसारं प्रथम-चरणे प्रायः ९३ प्रतिशत-मतदानं एतत् सूचयति यत् भयस्य वातावरणं नास्ति, जनाः च मुक्ततया समर्थनं प्रदर्शयन्ति।

डॉ. हिमन्त-बिस्व-सरमः उक्तवान् यत् पश्चिमबङ्गस्य निर्वाचनं सम्पूर्ण-पूर्वीय-पूर्वोत्तर-भारतस्य कृते महत्त्वपूर्णम् अस्ति। तेन तृणमूल-काँग्रेस-पक्षे बाह्य-नेतृणां विषयम् उत्थाप्य आरोपः कृतः यत् अवैधप्रवेशस्य प्रभावः केवलं बङ्ग-आसम-राज्ययोः सीमितः नास्ति, अपि तु झारखण्ड-बिहार-आदि-राज्येषु अपि प्रसारितः अस्ति। सः अपि उक्तवान् यत् यदि पश्चिमबङ्गे सत्ता-परिवर्तनं न भवति, तर्हि राज्यं “बाङ्ग्लादेशस्य विस्तारः” इव भवितुम् अर्हति। तस्य मतम् आसीत् यत् एकवारं जनसंख्या-सन्तुलनं परिवर्तिते सति तत् पुनः स्थापयितुं कठिनं भवति।

मुख्यमन्त्री उक्तवान् यत् भारत-बाङ्ग्लादेश-सीम्नः ५४ प्रतिशत-भागः पश्चिमबङ्गेन सह सम्बद्धः अस्ति, यदा त्रिपुरा-राज्यस्य २१ प्रतिशत, मेघालयस्य ११ प्रतिशत, मिजोरमस्य ८ प्रतिशतं, असमस्य च ६ प्रतिशत-भागः सीम्ना सह सम्बद्धः अस्ति। सः उक्तवान् यत् यदि कस्यचित् एकस्य राज्यस्य सीमा उद्घाटिता भवति, तर्हि तस्य प्रभावः सर्वेषु सीमावर्ती-राज्येषु भवति।

तेन आरोपः कृतः यत् मालदा-मुर्शिदाबाद-जनपदाभ्यां प्रविशन्तः घुस्पैठकाः केवलं पश्चिमबङ्गे न तिष्ठन्ति, अपि तु असम-राज्यं तथा अन्येषु देश-भागेषु अपि गच्छन्ति।

डॉ. हिमन्त-बिस्व-सरमा सीमायां वेष्टन-निर्माण-विषये तृणमूल-काँग्रेस-सर्वकारं प्रति असहयोगस्य आरोपम् अकरोत्। तेन उक्तं यत् असम-राज्ये शत-प्रतिशतं वेष्टन-निर्माणं सम्पन्नम् अस्ति, त्रिपुरा-राज्ये च कार्यं प्रवर्तते, किन्तु पश्चिमबङ्गे कार्यं न क्रियते।

सः अपि उक्तवान् यत् उत्तर-दिनाजपुर, मालदा, मुर्शिदाबाद, दक्षिण-उत्तर-चतुर्विंशति-परगणा, जलपाईगुड़ी, कूचबिहार, नदिया-इत्यादिषु सीमावर्ती-जनपदेषु मतदातृणां संख्या शीघ्रं वर्धते।

डॉ. हिमन्त-बिस्व-सरमा उक्तवान् यत् यदि पश्चिमबङ्गे भाजपा-सर्वकारः स्थाप्यते, तर्हि सः केन्द्रीय-गृहमन्त्री अमित-शाहं प्रति अनुरोधं करिष्यति यत् पश्चिमबङ्ग:, असम:, त्रिपुरा, मेघालय:, मिजोरम-राज्यानां मुख्यमन्त्रिणां संयुक्त-कार्यदलम् निर्मीयताम्, येन अवैधप्रवेश-विषये प्रभावी-कार्यवाही कर्तुं शक्येत।

अन्ते सः उक्तवान् यत् पश्चिमबङ्गं गुजरात-महाराष्ट्र-इत्यादिभिः औद्योगिक-राज्यैः सह स्पर्धां कर्तुं अर्हति। तस्य मतानुसारं भाजपायाः प्रमुखः लक्ष्यः तीव्र-औद्योगिकीकरणं तथा जनसंख्या-सन्तुलनस्य संरक्षणम् अस्ति।

हिन्दुस्थान समाचार / अंशु गुप्ता