हुगली-जनपदः, २६ अप्रैलमासः (हि.स.)। विधानसभानिर्वाचनात् पूर्वं हुगली-जनपदस्य जंगीपाड़ा-क्षेत्रे राजनैतिक-कोलाहल: तीव्रः जातः। भाजपा-पक्षस्य अभ्यर्थी प्रसेनजीत-बागः आरोपं कृतवान् यत् शनिवासरस्य रात्रौ तस्य वाहनं परिवृत्य तेन सह दुर्व्यवहारः कृतः तथा तस्मिन् आक्रमणस्य प्रयासः अपि अभवत्।प्राप्त-सूचना-अनुसारं शनिवासर-रात्रौ बोरहोल-मोड़-निकटे प्रसेनजीत-बागं निरोध्य टीएमसी-समर्थकैः “जय बांग्ला” इति घोषाः कृताः। भाजपा-अभ्यर्थिन: आरोपः अस्ति यत् जनसमूहः तस्य वाहनं परिवृत्य तं बहिः निष्कासयितुं प्रयासं कृतवान्। तेन उक्तं यत् तस्मिन् समये तत्र आरक्षक: उपस्थितः नासीत्, अनन्तरं आरक्षक: तथा केन्द्रीय-बलानि आगत्य तं सुरक्षिततया निष्कासितवन्तः।

प्रसेनजीत-बागः तृणमूल-काङ्ग्रेसं प्रति लक्ष्यं कृत्वा उक्तवान् यत् तृणमूल-काङ्ग्रेस: स्वस्य संभावित-पराजयं पूर्वमेव ज्ञातवान् अस्ति, अतः एव एतादृश्य: घटनाः क्रियन्ते। तेन आरक्षक-भूमिकायाः विषये अपि प्रश्नाः उत्थापिताः तथा निष्पक्ष-कार्यवाह्याः आग्रहः कृतः।

अन्यतः, तृणमूल-काङ्ग्रेसस्य स्थानीय-नेतृत्वेन एते आरोपाः पूर्णतया निराकृताः। तेषां कथनम् अस्ति यत् तेषां शान्तिपूर्ण-शोभायात्रा तत्र गच्छन्ती आसीत्, तस्मिन् समये एव भाजपा-अभ्यर्थिन: वाहनं मध्ये आगतम्। तैः उक्तं यत् कस्यापि प्रकारस्य दुर्व्यवहारः न अभवत्, अपि तु भाजपा ज्ञात्वा वातावरणं निर्मातुं प्रयासं करोति।

अस्याः घटनायाः केचन वीडियो इत्यपि प्रकाशं प्राप्तवन्तः, येषु घोषाः तथा विवादा: दृश्यन्ते। निर्वाचनात् पूर्वं जातया अनया घटनया क्षेत्रस्य राजनैतिक-वातावरणं अधिकं उष्णं जातम्। उल्लेखनीयम् यत् जंगीपाड़ा-क्षेत्रे द्वितीय-चरणस्य अन्तर्गतं २९ अप्रैल-दिने मतदानं भविष्यति, अतः प्रशासनस्य सजगता तथा सुरक्षा-व्यवस्थायाः विषये अपि विशेष-दृष्टिः स्थापिता अस्ति।

हिन्दुस्थान समाचार / अंशु गुप्ता