Enter your Email Address to subscribe to our newsletters
वाशिंगटनम्, 26 अप्रैलमासः (हि.स.)।राष्ट्रपतिः डोनाल्ड ट्रंप उक्तवान् यत् अमेरिकीय-गणतन्त्रे आक्रमणं नूतनं नास्ति, पूर्वमपि राष्ट्रं रक्तरञ्जितं कृतम् अस्ति। सः देशवासिनः प्रति परस्पर-विरोधान् शान्तिपूर्वकं समाधानयितुं आह्वानम् अकरोत्। वाशिंगटन डीसी नगरे शनिवासरसायं अभेद्य-सुरक्षाव्यवस्थायां प्रवर्तमानस्य ‘व्हाइट हाउस कॉरेस्पोंडेंट्स डिनर’ कार्यक्रमस्य बहिः जातस्य गोलीकाण्डस्य विषये चिन्तां व्यक्तवान्, संघीय-एजेन्टानां विधिपालन-संस्थाभ्यः च प्रशंसां कृतवान्।
फॉक्स न्यूज इत्यस्य प्रतिवेदनानुसारं राष्ट्रपतिः डोनाल्ड ट्रंप घटना-समयानन्तरं प्रायः त्रिंशन्मिनटानन्तरं व्हाइट हाउस-स्थितात् ब्रीफिंग-रूमात् संवाददाता-सम्मेलने उक्तवान् यत् वार्षिक-भोज-समारोहः वाशिंगटन हिल्टन होटल-नाम्नः स्थले बॉलरूमे आयोजितः आसीत्। तस्मिन् काले बहुभिः अस्त्रैः सुसज्जितः कश्चन पुरुषः सुरक्षावेष्टनं प्रति अग्रसरः अभवत्। एजेन्टाः अन्ये च सुरक्षा-कर्मचारिणः तम् अवरोधयन् गृहीतवन्तः। सः उक्तवान् यत् सन्दिग्धेन एकः एजेन्टः अत्यन्त-समीपे गोलीकृतः, किन्तु तेन बुलेट-प्रूफ-वस्त्रं धृतम् आसीत्, अतः अनर्थः न जातः; सः अधिकारी सुरक्षितः अस्ति।
संवाददाता-सम्मेलने भागं ग्रहीतुं बहवः पत्रकाराः वाशिंगटन हिल्टन होटल तः प्रत्यक्षं आगतवन्तः। ट्रंप महोदयः पूर्वमेव ‘ट्रुथ सोशल’ इत्यत्र सन्दिग्धस्य चित्राणि दृश्यांश्च प्रकाशितवान्। सः एतां घटनां कार्यक्रमस्य मूल-उद्देश्ये प्रत्यक्ष-आक्रमणम् इति अवदत्। सः उक्तवान्—“अयं कार्यक्रमः अभिव्यक्ति-स्वातन्त्र्याय समर्पितः आसीत्, यस्य उद्देश्यं द्वयोः पक्षयोः सदस्याः तथा पत्रकाराः एकत्र आनयितुम् आसीत्।”
सः अवदत् यत् अस्य घटनाया: कारणेन सुरक्षाव्यवस्था अधिकं दृढा कर्तव्या। सः उक्तवान् यत् वाशिंगटन हिल्टन होटल पूर्णतया सुरक्षितं नास्ति; अस्य स्थानात् व्हाइट हाउस-स्थितः निर्माणाधीनः बॉलरूमः श्रेयस्करः, यत्र ड्रोन-प्रूफ-सुरक्षा बुलेट-प्रूफ-काच-भित्तयः च भविष्यन्ति।
सः एतस्मात् उत्पन्नं भयम् अमेरिकादेशस्य उपरि विद्यमानानां व्यापक-भय-सङ्कटानां श्रेण्या सह अपि सम्बद्धवान्। सः अवदत्—“अतीतेषु वर्षेषु एतादृशं प्रथमवारं नास्ति यत् कश्चित् आक्रमणकारी जनहान्युद्देशेन अस्माकं गणतन्त्रे आक्रमणं कृतवान्।” सः अमेरिकीयान् प्रति प्रार्थितवान्—“हृदयेन संकल्पं कुर्वन्तु यत् यूयं परस्पर-विरोधान् शान्तिपूर्वकं समाधानयिष्यथ।” सः अपि अवदत् यत् अयं डिनर-समारोहः त्रिंशद्दिनान्तरं पुनः अधिकभव्यतया आयोजितः भविष्यति।
अधिकारिणां अनुसारं सन्दिग्धस्य परिचयः ३१ वर्षीयः कोल एलन इति। विधिपालन-संस्थानां मतानुसारं सः सम्भवतः वाशिंगटन हिल्टन होटल मध्ये अतिथिरूपेण स्थितः आसीत्। अस्मिन् विषये डिस्ट्रिक्ट-ऑफ-कोलम्बिया-स्थितया यूएस-अटॉर्नी जीनिन पिरो उक्तवती यत् एलनस्य विरुद्धं पूर्वमेव बहवः अभियोगाः सन्ति, सः पूर्वं अपि शस्त्र-हिंसां कृतवान्, संघीय-अधिकारी-आक्रमणस्य दोषः अपि अस्ति।
अस्मिन् काले पूर्व-हाउस-स्पीकरा नैन्सी पेलोसी एतां घटनां भयावहां निरूप्य उक्तवती यत् राष्ट्रपतिः, प्रथममहिला, अन्ये सर्वे च सुरक्षिताः सन्ति, इति सन्तोषजनकम् अस्ति।
---------------
हिन्दुस्थान समाचार