जयपुर-नगरम्, २८ अप्रैलमासः (हि.स.)। संस्कृति-युवा-संस्थया ‘सनातन-संवाद-प्रथम-कडी’ इत्यस्य आयोजनं मङ्गलवासरे स्टेच्यू-सर्किल-समीपे स्थिते एकस्मिन् आतिथ्य-गृहे अभवत्। अस्मिन् कार्यक्रमे राजस्थान-विधानसभा-अध्यक्षः वासुदेव-देवनानी मुख्यातिथि-रूपेण उपस्थितः आसीत्। संवादे सनातन-मूल्यानां प्रासंगिकता, मन्दिर-प्रबन्धनम्, परिवार-व्यवस्था, सामाजिक-समरसता तथा जन-जागरणम् इत्यादिषु विषयेषु विस्तृतं मन्थनम् अभवत्।

मुख्यातिथिना वासुदेव-देवनानिना उक्तं यत् सनातन-संस्कृतिः समाजस्य आधारशिला अस्ति, तस्याः सुदृढीकरणाय संवादः, जागरूकता तथा समाजस्य सक्रिय-सहभागिता अतीव आवश्यकाः सन्ति। एतादृशाः मंचाः समाजाय सम्यक्-दिशा-प्रदाने सहायकाः भवन्ति इति तेन प्रतिपादितम्।

राज्य-वित्त-आयोग-अध्यक्षः अरुण-चतुर्वेदी अवदत् यत् गृहस्थ-परम्परया सञ्चालितानि मन्दिराणि अद्यापि समाजे जीवन्ताः प्रभाविनः च सन्ति। एषु श्रद्धा, उत्तरदायित्वं पारदर्शिता च संतुलितरूपेण दृश्यन्ते, येन मन्दिराणि समाजेन सह सम्बद्धाः भवन्ति।

संस्थाध्यक्षः पण्डित-सुरेश-मिश्रः उक्तवान् यत् अद्यतन-काले संवादस्य समन्वयस्य च अतीव आवश्यकता अस्ति। द्रुत-परिवर्तनेन परिवार-व्यवस्था प्रभाविताभवत्, अतः सनातन-मूल्यानां आचरणे अधिकं ध्यानं दातव्यम्। सः अपि अवदत् यत् प्रदेशे अद्यापि अनेकानि मन्दिराणि परिवार-आधारित-सेवा-परम्परया सफलतया सञ्चालितानि सन्ति।

तेन खाटू-श्याम-मन्दिरम्, श्रीनाथजी-मन्दिरम्, करणी-माता-मन्दिरम्, मोती-डूंगरी-गणेश-मन्दिरम्, सालासर-बलाजी, मेहंदीपुर-बलाजी, एकलिङ्गजी-मन्दिरम्, चारभुजा-जी-मन्दिरम्, रणछोड़जी-मन्दिरम्, ब्रह्मा-मन्दिरम्, रानी-सती-मन्दिरम्, जीण-माता-मन्दिरम्, त्रिपुरा-सुन्दरी-मन्दिरम्, गोविन्द-देव-जी-मन्दिरम्, कैलादेवी-मन्दिरम्, जगदीश-मन्दिरम्, रामदेवरा-मन्दिरम्, नाकोडा-जी-मन्दिरम् इत्यादीनि उदाहरणरूपेण निर्दिष्टानि।

सः अवदत् यत् एतानि मन्दिराणि केवलं आस्था-केन्द्राणि न, अपितु सामाजिक-मार्गदर्शनस्य, संस्कार-निर्माणस्य तथा सेवा-कार्याणां प्रमुख-केन्द्राणि अपि सन्ति। आपत्कालेषु सहयोगे, सामाजिक-कार्यक्रमेषु च एषां महत्त्वपूर्णा भूमिका भवति। श्रद्धालूनां वर्धमान-संख्यां दृष्ट्वा मन्दिरेषु सुविधाविस्ताराय सरकारी-सहयोगस्य आवश्यकता अपि तेन निर्दिष्टा।

कार्यक्रम-संयोजकः पण्डित-राजकुमार-चतुर्वेदी उक्तवान् यत् ‘सनातन-संवादः’ इति कार्यक्रमः प्रदेशस्य विभिन्न-जनपदेषु अपि आयोजितः भविष्यति। संरक्षकः एच.सी. गणेशिया अवदत् यत् एषः कार्यक्रमः सामाजिक-परिवर्तनस्य सतत-प्रक्रिया अस्ति।

अस्मिन् कार्यक्रमे विधायकः स्वामी-बलमुकुन्दाचार्यः, विविध-पीठाधीश्वराः, सन्त-महात्मानः तथा गणमान्य-जनाः बहुसंख्यया उपस्थिताः आसन्।

हिन्दुस्थान समाचार / अंशु गुप्ता