Enter your Email Address to subscribe to our newsletters
नारनौल-नगरम्, ३० अप्रैलमासः (हि.स.)। महेन्द्रगढ़-जनपदस्य स्वास्थ्य-व्यवस्थायाः सुदृढीकरणस्य दिशि महत्त्वपूर्णं पदक्षेपं कृत्वा त्रयोदश नूतनाः विशेषज्ञ-चिकित्सकाः नियुक्ताः। एतेषां चिकित्सकानां सम्मिलनेन अधुना जनपदे विशेषज्ञ-चिकित्सकानां संख्या अष्टपञ्चाशत् (५८) अभवत्, येन रोगिभ्यः उत्तमाः शीघ्राश्च चिकित्सा-सेवाः उपलब्धाः भविष्यन्ति।
स्वास्थ्य-मन्त्री आरती-सिंह-राव: गुरुवासरे उक्तवती यत् सरकारः निरन्तरं स्वास्थ्य-सेवानां विस्ताराय विशेषज्ञ-चिकित्सकानां न्यूनतां च निवारयितुं प्रयतते। तया उक्तं यत् सर्वकारस्य मुख्यं लक्ष्यं अन्तिम-जनपर्यन्तं गुणवत्तापूर्णाः सुलभाश्च स्वास्थ्य-सेवाः प्रापयितुम् अस्ति।
नियुक्तेषु एतेषु त्रयोदशेषु चिकित्सकेषु षट् कनीना-क्षेत्रे, द्वौ महेन्द्रगढ़-नगरे, पञ्च च नारनौल-नगरे नियोजिताः। एतेषां नियुक्त्या सम्बन्धित-क्षेत्रेषु राजकीय-चिकित्सालयेषु स्वास्थ्य-केन्द्रेषु च विशेषज्ञ-सेवानां उपलब्धता वर्धिष्यते। अनेन रोगिणः सामान्य-व्याधिभ्यः आरभ्य जटिल-रोगपर्यन्तं चिकित्सार्थं महानगराणि अन्य-जनपदान् वा गन्तुं न्यूनतया बाध्याः भविष्यन्ति।
स्वास्थ्य-मन्त्रिणा अपि उक्तं यत् विशेषज्ञ-संख्या-वृद्ध्या जनपद-नागरिक-चिकित्सालयेन सह अन्येषां चिकित्सालयानां कार्यक्षमतायां सुधारः भविष्यति। आधुनिक-चिकित्सा-सुविधाभि: सह विशेषज्ञ-परामर्शः अपि अधुना स्थानीय-स्तरे एव उपलब्धः भविष्यति, येन रोगिणां समय-व्ययः धन-व्ययश्च न्यूनः भविष्यति। सा अपि अवदत् यत् सरकारः भविष्येऽपि स्वास्थ्य-क्षेत्रस्य सुदृढीकरणाय एतादृशान् पदक्षेपान् स्वीकर्तुं निरन्तरं यत्नं करिष्यति। नूतन-चिकित्सक-नियुक्त्या न केवलं स्वास्थ्य-सेवानां गुणवत्ता वर्धिष्यते, अपितु समये उपचार-प्राप्य गम्भीर-व्याधीनां घटनासु अपि न्यूनता अपेक्ष्यते।
हिन्दुस्थान समाचार / अंशु गुप्ता