पश्चिम-मेदिनीपुर-जनपदः, ०८ अप्रैलमासः (हि.स.)। जनपदस्य नारायणगढ़-क्षेत्रे बुधवासरे क्रान्तिकारी हेमचन्द्र-कानुनगो-नाम्नः महापुरुषस्य पञ्चसप्ततितमे (७५) महाप्रयाण-दिवसे श्रद्धया सम्मानपूर्वकं च आयोजनम् अभवत्। हेमचन्द्र-साहित्य-सभा तथा “अन्यमन-खाकुड़दा” इत्येतयोः संयुक्त-तत्त्वावधानेन आदिवसं विविध-कार्यक्रमाणां माध्यमेन अस्य महत: क्रान्तिकारिणः स्मरणम् कृतम्।

कार्यक्रमस्य आरम्भः प्रातःकाले सुशोभितया शोभायात्रया अभवत्। सा शोभायात्रा बेलदा-स्थाने स्थितात् हेमचन्द्रस्य प्रतिमास्थलात् आरभ्य खाकुड़दा-स्थं प्रतिमा-स्थलं यावत् प्राप्नोत्। अपरतः खण्डरुई-राजबाड्यां स्थितात् क्रान्तिकारिणः मातुल-गृहात् अपि पृथक् शोभायात्रा निर्गता, या खाकुड़दा-स्थाने आगत्य प्रथम-शोभायात्रया सह सम्मिलिता अभवत्।

उभे अपि शोभायात्रे एकत्र राधानगर-स्थं क्रान्तिकारिणः पैतृक-गृहं यावत् प्राप्य तत्र पुष्पाञ्जलिं समर्प्य तस्मै श्रद्धाञ्जलिः अर्पिता। अस्मिन् अवसरे वक्तारः हेमचन्द्र-कानुनगो-नाम्नः महापुरुषस्य स्वातन्त्र्य-संग्रामे योगदानं स्मारयन्तः देशभक्ति-गीतैः वंशी-वादनस्य मधुर-ध्वन्या च सह श्रद्धां प्रकटितवन्तः।

नारायणगढ़-क्षेत्रे हेमचन्द्रस्य प्रतिमा-समक्षं हेमचन्द्र-साहित्य-सभा तथा नारायणगढ़-कल्चरल-एसोसिएशन इत्येतयोः पक्षाभ्यां प्रायः शतसंख्याकानां जनानां उपस्थितौ पुष्पाञ्जलिः अर्पिता। कार्यक्रमे काव्य-पाठः, सङ्गीत-प्रस्तुतिः, विचार-गोष्ठी च आयोजिताः।

कार्यक्रमस्य विशेष-आकर्षणरूपेण दातव्य-चिकित्सा-शिविरस्य अपि आयोजनम् अभवत्, यस्मिन् स्थानीय-प्रदेशस्य प्रायः शतसंख्याकाः जनाः चिकित्सासुविधायाः लाभम् अलभन्त।

आयोजकैः उक्तं यत् एतादृशैः कार्यक्रमैः क्रान्तिकारी-हेमचन्द्र-कानुनगो-नाम्नः आदर्शाः नूतन-वंशं प्रति प्रेषयितुं प्रयत्नः क्रियते।

हिन्दुस्थान समाचार / अंशु गुप्ता