मसूरी-नगरम्, ०२ मईमासः (हि.स.)। राज्यपालः लेफ्टिनेंट-जनरल गुरमीत-सिंह: शनिवासरे मसूरी-स्थितं लाल-बहादुर-शास्त्री-राष्ट्रीय-प्रशासन-अकादमी (एलबीएसएनएए) इति संस्थानं भ्रमणं कृत्वा विविध-स्थानानां निरीक्षणं कृतवान् तथा तत्र सञ्चालितानां गतिविधीनां अवलोकनं कृतवान्।

निर्धारित-कार्यक्रमानुसारं प्रातःकाले राज्यपालः पोलो-प्रांगणं प्राप्तवान्, यत्र तेन व्यवस्थाः गतिविधयः च अवलोकिताः। ततः अनन्तरं तेन हैप्पी-वैली-क्रीडा-सङ्कुलस्य निरीक्षणं कृत्वा क्रीडा-सुविधानां प्रशिक्षण-व्यवस्थानां च विषये सूचना प्राप्ता। अस्मिन् अवसरे तेन उक्तं यत् अकादम्यां उपलब्धाः क्रीडा-सुविधाः अधिकारिणां समग्र-विकासे महत्त्वपूर्णां भूमिकां निर्वहन्ति।

राज्यपालः अकादम्याः छात्रावासानाम् अपि निरीक्षणं कृतवान् तथा अधिकारिभिः सह संवादं कृत्वा प्रशिक्षण-गतिविधीनां कार्यप्रणाल्याः च विषये सूचनां प्राप्तवान्।

तेन अकादम्याम् उपलब्धानां उच्च-स्तरीय-प्रशिक्षण-सुविधानां प्रशंसा कृत्वा उक्तं यत् एतादृशानि संस्थानानि देशस्य प्रशासनिक-नमूनाया: सुदृढीकरणे महत्त्वपूर्णं योगदानं ददति।

हिन्दुस्थान समाचार / अंशु गुप्ता