हरिद्वार-नगरम्, ०२ मईमासः (हि.स.)। गोविन्द-बल्लभ-पन्त-कृषि-प्रौद्योगिकी-विश्वविद्यालयस्य नवनियुक्तः कुलपतिः डॉ.शिवेन्द्र-कुमार-कश्यपः कार्यभारं स्वीकृत्य एव प्रसार-तन्त्रस्य सुदृढीकरणस्य दिशि सक्रियोप्रक्रमम् आरब्धवान्। अस्यैव क्रमस्य अन्तर्गतं सः शनिवासरे कृषि-विज्ञान-केन्द्रं धनौरी-स्थितं हरिद्वारं गत्वा तत्र व्यवस्थाः गतिविधयः च गहनतया निरीक्षितवान्।

कुलपतिना केन्द्रस्य विविध-सुविधानां, कृषिक्षेत्रस्य (फार्म) तथा प्रवर्तमाना-प्रशिक्षण-कार्यक्रमाणां अवलोकनं कृतम्। अस्मिन् अवसरे तेन वैज्ञानिकैः सह संवादं कृत्वा रोजगारपरक-प्रशिक्षणम्, सेवाकालीन-प्रशिक्षणम्, क्षेत्रीय-दत्तांश-सङ्ग्रहणस्य विधयः तथा तस्मात् अनुसन्धान-पत्र-प्रकाशनस्य सम्भावनाः इत्यादिषु विषये विस्तृतया चर्चा कृता।

डॉ.कश्यपः अवदत् यत् प्रसार-तन्त्रं समग्र-विश्वविद्यालयस्य मेरुदण्डः अस्ति, अस्य विना संस्थानस्य विकासः असम्भवः। तेन अग्रिम-भ्रमणेषु लघु-सीमान्त-कृषकाणां कृते सञ्चालितानां योजनानां तेषां परिणामानां च प्रत्यक्ष-निरीक्षणस्य अपि उल्लेखः कृतः। निरीक्षण-समये कुलपतिना केन्द्रस्य वैज्ञानिकानां समस्याः श्रुताः तथा तासां शीघ्र-समाधानस्य आश्वासनं दत्तम्।

उल्लेखनीयं यत् डॉ. कश्यपः स्वयम् अपि प्रसार-शिक्षायाः विशेषज्ञः आसीत् तथा कृषि-विज्ञान-केन्द्रेषु दीर्घकालं यावत् कार्यं कृतवान्, येन तस्य अनुभवस्य लाभः संस्थानं प्राप्नोति।

तस्य भ्रमणेन संवादेन च केन्द्रस्य वैज्ञानिकेषु नूतनः उत्साहः दृष्टः। कुलपतिना सर्वैः वैज्ञानिकैः सह व्यक्तिगतया संवादः कृतः, तेषां कार्याणां प्रशंसा कृता तथा केन्द्र-प्रभारी डॉ.पुरुषोत्तमस्य विशेष-प्रशंसा कृत्वा भविष्य-रणनीत्याः विषये मार्गदर्शनं दत्तम्।

अस्मिन् अवसरे कुलपतिना केन्द्र-परिसरे रुद्राक्ष-वृक्षाणां सजावटीय-पादपानां च रोपणं कृतम्। कार्यक्रमे डॉ.विनोदः, डॉ.योगेन्द्र-सैनी, अभियन्ता उमेश-कुमार-सक्सेना, डॉ.रेनू, डॉ.सरिता तथा अन्ये कर्मचारिण: —विनोदः, फकीर-चन्दः, अमितः च उपस्थिताः आसन्।

हिन्दुस्थान समाचार / अंशु गुप्ता