पूर्वी-सिंहभूम-जनपदम्, ०३ मईमासः (हि.स.)। बिरसानगर-प्रदेशे निर्मीयमाणानां प्रधानमन्त्री-आवास-योजनायाः शताधिकानां लाभार्थिनां धैर्यं अधुना क्षीणं जातम्। रविवासरे प्रातःकाले द्विशताधिकाः लाभार्थिनः जमशेदपुर-पश्चिम-क्षेत्रस्य विधायकस्य सरयू-रायस्य बिष्टुपुर-स्थितं निवासस्थानं गत्वा स्वसमस्याभिः तं अवगतवन्तः। जनाः उक्तवन्तः यत् पूर्णराशिं समर्प्य अपि अद्यपर्यन्तं स्वगृहस्य कुञ्जिका न प्राप्ता, येन तेषां आर्थिक-स्थिति: निरन्तरं दुर्वस्था भवति।

लाभार्थिनः उक्तवन्तः यत् ते विवशतया भाटकगृहेषु वसन्ति, अपरतः तु धनागारात् गृहीतस्य ऋणस्य प्राय: अपि निरन्तरं दातव्य: भवति। द्विधा-पीडां वहन्तः एते परिवाराः वदन्ति यत् अधुना प्रतीक्षायाः कापि अवकाशः न अवशिष्टः।

अस्य विषयस्य गाम्भीर्यं दृष्ट्वा सरयू-रायः उक्तवान् यत् बिरसानगरे समग्रतया २१ खण्डाः (ब्लॉकाः) निर्मातव्याः आसन्, किन्तु अद्यपर्यन्तं केवलं द्वौ एव खण्डौ सिद्धौ जातौ। एतेषु खण्डेषु आवंटनं कृतं, अनेकेषां लाभार्थिनां विद्युत्-संयोजनाय आवेदनानि अपि दत्तानि, तथापि तेषां प्रवेशः अनुमतः न भवति।

सः प्रशासनिक-प्रक्रियां प्रति प्रश्नान् उत्थाप्य उक्तवान् यत् उप-नगर-आयुक्तेन तस्मै सूचितं यत् अद्यापि ‘जुडको’ संस्थया एते आवासाः ‘जेएनएसी’ इत्यस्मै न समर्पिताः। अपरतः विभागीय-मन्त्रिणा एषा विलम्ब-स्थिति: सामान्य-सर्वकारी-कार्यस्य अंशः इति उक्तम्, यस्य प्रति सरयू-रायः तीव्रं विरोधं प्रकटितवान्, एषः विलम्बः सामान्यः न, अपितु अत्यधिकः इति च उक्तवान्।

अस्मिन् अन्तरे लाभार्थिनः ६ मई-दिनं शुभ-मुहूर्तं मन्यमानाः तस्मिन्नेव दिने स्वगृहेषु गृहप्रवेशं कर्तुं निश्चयं कृतवन्तः। सरयू-रायः अपि तेषां समर्थनं कृत्वा उक्तवान् यत् यदि शासन-पक्षतः कश्चन प्रयास: न भवति, तर्हि सः स्वयमेव लाभार्थिनां कृते पूजां, पण्डितम्, शामियानं, आसन्द-तालिकादीनि तथा पूजन-सामग्रीणां व्यवस्थां करिष्यति।

सः उक्तवान् यत् अस्य विषयस्य सम्बन्धे सः मुख्यमन्त्रिणा सह मिलितुं प्रयासं करिष्यति तथा शीघ्रमेव औपचारिकताः सम्पाद्य ऑनलाइन-उद्घाटनं कर्तुं निवेदनं करिष्यति, येन जनाः स्वगृहेषु प्रवेशं कर्तुं शक्नुयुः।

सरयू-रायः एतदपि आरोपितवान् यत् येषां गृहाणां निर्माणं सम्पन्नं जातम्, तेष्वपि कतिपयेषु स्थलेषु गुणवत्ता विषये प्रश्नाः उत्पद्यन्ते, केषुचित् स्थलेषु भित्तयः अपि क्षतिग्रस्ताः दृश्यन्ते। एतत् दुर्भाग्यपूर्णम् इति उक्त्वा सः अवदत् यत् अन्येषु राज्येषु प्रधानमन्त्री-आवास-योजनायाः स्थिति: उत्तमा अस्ति, किन्तु झारखण्ड-राज्ये एतादृश्य: समस्याः दृश्यन्ते।

हिन्दुस्थान समाचार / अंशु गुप्ता