Enter your Email Address to subscribe to our newsletters
काठमांडूः, 06 मईमासः (हि.स.)।
नेपाल मार्गेण भारतीयतीर्थयात्रिकाणां कृते कैलाश मानसरोवर यात्रायाः कालः आरब्धः। आगामिसप्ताहात् यात्रां प्रारब्धुं व्यवसायिनः शीघ्रतया आरक्षणानि स्वीकुर्वन्ति।
व्यवसायिनाम् अनुसारम् अद्यावधि प्रायः ५००० भारतीयश्रद्धालवः तीर्थयात्रार्थं यात्रा-आरक्षणं कृतवन्तः। कैलाशमानसरोवरयात्रायै तीर्थयात्रिकाः नेपालस्य रसुवा जनपदस्य केरूंगनाका तथा हुम्ला जनपदस्य हिल्सानाका मार्गेण स्थलमार्गेन गच्छन्ति।
सिन्धुपाल्चोक जनपदस्य तातोपानीनाका अधुना पिहितः अस्ति, यदा कतिपये तीर्थयात्रिकाः ल्हासा मार्गेण वायुमार्गेण अपि मानसरोवरं प्राप्नुवन्ति। अलीकाले भारतचीनदेशयोः मध्ये लिपुलेख दर्रा मार्गेण यात्रां पुनः उद्घाटयितुं सहमतिः जाता। तथापि वातावरणं, भौगोलिकस्थितिः, दूरी तथा व्ययस्य दृष्ट्या अधिकांशयात्रिकाणां आकर्षणं हिल्सानाकायाः प्रति दृश्यते।
अस्मिन् वर्षे भारतीयतीर्थयात्रिकाः ३५ पर्यटनयात्रासंस्थाभिः माध्यमेन कैलाशमानसरोवरयात्रार्थं आरक्षणं कुर्वन्ति। व्यवसायिनां अनुसारं हिल्सामार्गेण गच्छन्तः तीर्थयात्रिकाः भारतस्य लखनऊ नगरात् नेपालगंज नगरं प्राप्नुवन्ति, ततः हुम्लाजनपदं गच्छन्ति।
एसोसिएशन फॉर कैलाश टूर ऑपरेटर्स नेपालस्य अध्यक्षः विमल नहर्की उक्तवान् — “नेपालस्य समीपस्थं भारतीयविमानस्थानकं लखनऊ अस्ति। तस्मात् नेपालगंजपर्यन्तं दूरी १९० किलोमीटर अस्ति, या प्रायः त्रिषु घण्टासु पूर्णा भवति। नेपालगंजात् विमानमार्गेण सिमकोट मार्गेण हिल्सां प्राप्यते तथा तस्मात् प्रायः १०५ किलोमीटरदूरस्थं मानसरोवरं चतुर्षु घण्टासु प्राप्यते।”
तस्य अनुसारं प्रथमदिने पर्यटकाः नेपालगंजे तिष्ठन्ति, द्वितीयदिने सिमकोटं गच्छन्ति, तृतीयदिने उदग्रविमानमार्गेण नेपालचीनसीमास्थं हिल्सां प्राप्य दार्चेनबेसकॅम्पे निवसन्ति। चतुर्थदिने प्रायः ६० किलोमीटरदूरस्थं कैलाशपर्वतं गत्वा दर्शनं कुर्वन्ति तथा पुनः प्रत्यागच्छन्ति।
अन्यः पर्यटनव्यवसायी विजय सिंह उक्तवान् — “ये जनाः पदयात्रायाः समर्थाः भवन्ति, ते कैलाशस्य ५२ किलोमीटरपरिमितां परिक्रमां कुर्वन्ति, किन्तु असमर्थाः यात्रिकाः दार्चेनबेसकेम्पतः एव दर्शनं कृत्वा प्रत्यागच्छन्ति। ततः ते सिमकोटं पुनः नेपालगंजं च गच्छन्ति। एषः सम्पूर्णः मार्गः प्रायः सप्तदिनेषु पूर्णः भवति।”
पर्यटनव्यवसायिनां अनुसारं नेपालस्य अन्यमार्गेण एषा यात्रा कर्तुं न्यूनातिन्यूनं दशदिनानि आवश्यकानि भवन्ति।
जिला पुलिस कार्यालय हुम्ला इत्यस्याङ्कानुसारं गतवर्षे हिल्सानाका मार्गेण ६०४२ जनाः कैलाशमानसरोवरयात्रां कृतवन्तः। चीन देशेन कोरोना-महामार्याः अनन्तरं गतवर्षे एव एषा यात्रा पुनः उद्घाटिता।
आङ्कानुसारं गतवर्षे ५७१७ भारतीयाः तथा ३२५ अन्यदेशीयनागरिकाः हुम्लामार्गेण मानसरोवरयात्रां कृतवन्तः, तेषु ३३३४ पुरुषाः तथा २७०८ महिलाः आसन्।
---------------
हिन्दुस्थान समाचार